22/07/2019
VEILING OP MIDDELBURG
Soms kry ek die gevoel dat die gewone publiek maar half skrikkerig, selfs bang is om ’n veiling by te woon. Die gevoel spruit gewoonlik uit die feit dat mense onkundig is oor die proses en d**k dit is slegs vir ’n paar elite beskore, amper iets soos die aandelemark.
Meneer/mevrou, jy maak ’n groot fout. ’n Veiling is ’n bleddie lekker ding, veral op die platteland. Amper soos ’n kerkbasaar op Pofadder. Dit is ’n verkoping, ’n wedstryd, ’n museumbesoek, ’n gemeenskapsamekoms, álles in een.
Hier kry jy nou uiteindelik die geleentheid om jou oerinstinkte sonder skaamte na vore te bring en oor prys te kibbel en te stry.
Soms koop jy items teen die lagwekkendste “bargains”, soms voel jy, jy’t ’n kat in die sak gekoop. Wat dit lekker maak, is dat dit soos dobbel is, maar heel wettig en in die geloof. Ek kon nog nie een Bybelversie kry wat hom uitspreek teen openbare veilings nie.
Goed, jy weet nou dat dit lekker is, maar jy weet nog nie hóé die lekker werk nie.
Veilings vind gewoonlik in groot lokale of sommer in die buitelug plaas. Gewoonlik is daar ’n magdom items oral uitgestal. Dit kan wissel van enigiets van ’n broodrooster tot ’n motorboot. Hierdie items staan as “lotte” bekend. Soms , veral met kleiner items en stelle (soos ’n eetkamerstel) kan ’n lot uit meer as een item bestaan.
In hierdie groot lokaal is daar iewers ’n registrasiepunt waar jy as bieër móét registreer. Dit is gewoonlik sommer ’n tafel met ’n rekenaar met ’n paar persone wat bril en “name tags” dra en besonders slim vir hul omgewing lyk. Jy kry dan ’n unieke bieërnommer wat aan jou naam gekoppel word. Soms is daar ’n minimale registrasie fooi, tensy dit anders adverteer word, is registrasie gewoonlik heeltemal gratis.
Jy het nou jou nommer en is gereed om te bie. Aan die stuur van sake is die afslaer, sy woord is wet en hy praat baie hard, vinnig en deurmekaar, amper soos die getuies by die Zondo-kommissie. Moenie verskrik voel as jy nie die gesprek kan volg nie, al wat nodig is om uit te ken is die bieër nommer en die bodprys wat tans ter sprake is. Indien jy voel dat jy bereid is om meer vir die item te betaal, steek jy bloot jou kaartjie met die nommer in die lug en sê ’n hoër bedrag. En siedaar! Die afslaer praat nog net so vinnig, maar hy praat nou van jou en die nuwe prys. As niemand verder bie nie, roep hy uit dat die lot teen daardie prys aan jou toegeken is.
Miskien is dit hier nodig om kortliks stil te staan by die wetlike aspek. Ja, in die SA reg kan jy ’n geldige kontrak sluit deur bloot jou vinger te lig. So as jy nié wil bie nie, moet in hemelsnaam nie jou neus krap of hare regskuif terwyl jou bie-kaartjie in jou hand is nie!
As jy niks anders wil koop nie, kan jy terugbeweeg na die tafel met die slim mense met die brille (gee hulle darem net kans om die laaste data in te voer), jou bieër-kaart vir hulle gee, waarna hulle vir jou ’n faktuur ter betaling sal gee. Na betaling het jy so pas jou eerste aankoop op ’n veiling gemaak.
Let wel dat items op ’n veiling gewoonlik geen waarborg dra nie en jy dra die risiko in hierdie verband. Hier kom ons terug na die “dobbelspel”, maar dit is darem ’n berekende risiko en sóú daar enige onsigbare defek op ’n item wees, is dit gewoonlik minimaal en herstelbaar.
Minnaar en de K**k Prokureurs bied hierdie Vrydag 26 Julie 2019 OM 09:30 ’n publieke veiling aan te Kerkstraat 2 (agter Sneeuberg-gebou). Lotte kan van 08:30 besigtig word. Daar wag ’n magdom van items wat nuwe base soek, asook ’n magdom van plattelandse lekkerte en samesyn.
Sien jou daar!
Ilze Nel
