24/03/2019
وارثت کی تقسیم کے طریقہ کارکو آسان بنانے کے لئے سینیٹ کا ایک اچھا فیصلہ - قانون اور انصاف کی قائمہ کمیٹی نےآج کے اجلاس میں ایک قانونی مسودہ کو اصولی منظوری دے دی ہے ، جس کی بدولت وارثت نامہ (Succession Certificate) جاری کرنے کا اختیارعدالتوں کی بجایے نادرا (NADRA) کودے دیا جاۓ گا - وارثت کے سلسلے میں عدالت سے رجوع صرف اس صورت میں کیا جایے گا جہاں ورثاء میں لڑائی ہو - پہلے مرحلے میں یہ نیا نظام صرف اسلام آباد میں نافذ ہو گا - اگر کامیاب ہوا تو صوبوں میں بھی اس کی تقلید متوقع ہے -
یہ قانونی مسوّدہ حکومت نے سینیٹ ہی کی ہدایت پر تیار کیا تھا- بعض حلقے اس تجویز پر کڑی تنقید کر رہے ہیں - ان کا کہنا ہے کہ تقسیم وارثت اصلاً ایک عدالتی کام ہے اور اسے کسی حکومتی ادارے کے سپرد نہیں کرنا چاہیے - لیکن سینیٹ کمیٹی کی اکثریت نے اس تجویز کو قبول کر لیا ہے ، چونکہ اس سے شہریوں کو آسانی ہو گی- جہاں ورثاء سب متفق ہوں، وہاں عدالت جانا چنداں ضروری نہیں - دیوانی عدالتیں ویسے بھی مقدمات کے بوجھ تلے دبی ہوئی ہیں -
اب یہ مسوّدہ وفاقی کابینہ میں پیش ہو گا اور وہاں سے منظوری کے بعد وزیر قانون اسے پارلیمان میں با قاعدہ بل کے طور پر پیش کریں گے - امید ہے کہ وفاقی کابینہ اسے حتمی شکل دینے سے پہلے تمام قانون سقم دور کرے گی -
