25/09/2026
صدر کوئٹہ بار ایسوسی ایشن، صدر ہائی کورٹ بار ایسوسی ایشن اور بلوچستان بار کونسل سے خصوصی اپیل
روزانہ کی بنیاد پر وکلاء کے واٹس ایپ اکاؤنٹس ہیک کیے جا رہے ہیں اور فیس بک اکاؤنٹس بھی ہیک ہونے کے واقعات سامنے آ رہے ہیں۔ یہ صورتحال انتہائی تشویشناک ہے۔ اگر قانون کے محافظ اور وکلاء ہی سائبر جرائم سے محفوظ نہیں تو عام شہریوں کے تحفظ کا کیا ہوگا؟
ہماری معزز بار قیادت سے مطالبہ ہے کہ اس معاملے کا فوری نوٹس لیتے ہوئے متعلقہ سائبر کرائم حکام اور دیگر متعلقہ اداروں کے ذمہ دار افسران کو بار میں مدعو کیا جائے، وکلاء کو درپیش سائبر سیکیورٹی کے مسائل پر تفصیلی بریفنگ لی جائے اور ایسے واقعات کی روک تھام کے لیے سخت اور مؤثر قانونی کارروائی کو یقینی بنایا جائے۔
ہم وکلاء قانون کے محافظ اور معاشرے میں قانون کی بالادستی کے داعی ہیں۔ اگر ہم خود محفوظ نہیں تو یہ ایک سنجیدہ مسئلہ ہے۔ لہٰذا وقت کا تقاضا ہے کہ بار کی سطح پر اس معاملے کو سنجیدگی سے اٹھایا جائے اور عملی اقدامات کیے جائیں۔
ہم محفوظ ہوں گے تو قانون کی حفاظت بھی مؤثر انداز میں کر سکیں گے۔
