02/09/2026
پریس ریلیز
مورخہ 2 ستمبر 2026،
خیبر پختونخوا بار کونسل کا مہنگائی، پٹرولیم مصنوعات اور لیوی میں مسلسل اضافے کے خلاف صوبہ گیر ہڑتال کا اعلان، ایبٹ آباد میں وکلاء پر مبینہ تشدد کی شدید مذمت
پشاور: خیبر پختونخوا بار کونسل نے حکومت کی جانب سے روزمرہ استعمال کی اشیاء کی قیمتوں میں مسلسل اضافے، پٹرولیم مصنوعات اور مختلف لیویز کے نام پر عوام پر بڑھتے ہوئے مالی بوجھ، صوبے میں جاری بدامنی اور ایبٹ آباد میں اسسٹنٹ کمشنر و ڈپٹی کمشنر ایبٹ آباد کے مبینہ اہلکاران اور وکلاء کے درمیان پیش آنے والے ناخوشگوار واقعے، ہاتھا پائی اور پتھراؤ کی شدید مذمت کی ہے، جس کے نتیجے میں متعدد وکلاء کے زخمی ہونے کی اطلاعات ہیں۔
خیبر پختونخوا بار کونسل نے مہنگائی، پٹرولیم مصنوعات اور لیوی کی مد میں مسلسل اضافوں، بدامنی اور عوام کو درپیش مشکلات کے خلاف کل پورے صوبہ خیبر پختونخوا میں مکمل ہڑتال کا اعلان کیا ہے۔ ہڑتال کے دوران صوبے بھر میں وکلاء عدالتوں میں پیش نہیں ہوں گے۔
بار کونسل نے کہا ہے کہ روزمرہ استعمال کی اشیاء کی قیمتوں میں روزانہ کی بنیاد پر اضافہ عوام کے لیے ناقابلِ برداشت ہو چکا ہے۔ حکومت کی ذمہ داری ہے کہ عوام کو ریلیف فراہم کرے، مصنوعی مہنگائی پر قابو پائے اور پٹرولیم مصنوعات، لیویز اور دیگر محصولات کے ذریعے عوام پر مسلسل بڑھتے ہوئے مالی بوجھ کا سدباب کرے۔
خیبر پختونخوا بار کونسل نے صوبے میں بڑھتی ہوئی بدامنی، دہشت گردی اور امن و امان کی خراب صورتحال پر بھی شدید تشویش کا اظہار کرتے ہوئے حکومت سے مطالبہ کیا ہے کہ شہریوں اور وکلاء کو تحفظ فراہم کیا جائے اور صوبے میں پائیدار امن کے قیام کے لیے مؤثر اور عملی اقدامات کیے جائیں۔
بار کونسل نے ایبٹ آباد کے حالیہ واقعے کی شدید مذمت کرتے ہوئے کہا کہ وکلاء کے ساتھ ہاتھا پائی، مبینہ تشدد اور پتھراؤ کسی صورت قابلِ قبول نہیں۔ وکلاء کے زخمی ہونے کا واقعہ انتہائی افسوسناک اور تشویشناک ہے۔
خیبر پختونخوا بار کونسل نے چیف سیکریٹری خیبر پختونخوا سے مطالبہ کیا ہے کہ ایبٹ آباد کے متعلقہ اسسٹنٹ کمشنر کو فوری طور پر تبدیل کیا جائے اور واقعے کی غیر جانب دارانہ انکوائری کرائی جائے۔
اسی طرح بار کونسل نے ڈی پی او ایبٹ آباد سے مطالبہ کیا ہے کہ وکلاء کے ساتھ مبینہ ہاتھا پائی، تشدد اور پتھراؤ میں ملوث سرکاری اہلکاران کے خلاف فوری طور پر مقدمہ درج (FIR) کیا جائے اور قانون کے مطابق کارروائی عمل میں لائی جائے۔
خیبر پختونخوا بار کونسل نے واضح کیا ہے کہ وکلاء کے وقار، عزت، جان و مال اور بار ایسوسی ایشنز کے جائز حقوق پر کسی قسم کا سمجھوتہ نہیں کیا جائے گا۔ سرکاری اہلکاروں کی جانب سے وکلاء کے ساتھ کسی بھی قسم کی بدسلوکی یا غیر قانونی مداخلت کو برداشت نہیں کیا جائے گا۔
بار کونسل نے حکومت سے مطالبہ کیا ہے کہ مہنگائی کو فوری طور پر کنٹرول کیا جائے، پٹرولیم مصنوعات اور لیویز میں غیر ضروری اضافے کا سلسلہ روکا جائے، عوام کو فوری ریلیف فراہم کیا جائے اور صوبے میں بدامنی کے خاتمے کے لیے مؤثر اقدامات کیے جائیں۔
خیبر پختونخوا بار کونسل نے صوبہ بھر کے وکلاء سے اپیل کی ہے کہ وہ کل کی صوبہ گیر ہڑتال کو کامیاب بنائیں اور کوئی بھی وکیل کسی عدالت میں پیش نہ ہو۔
بتسلیمات
نواز خان عادل
پبلک ریلیشنز آفیسر
خیبر پختونخوا بار کونسل، پشاور
