09/04/2026
پنجاب حکومت کا بڑا ریلیف،
موٹرسائیکل ٹرانسفر فیس اور رجسٹریشن چارجز معاف، فیول سبسڈی سے مشروط سہولت۔۔۔۔۔!!!
حکومت پنجاب نے عوام کو ریلیف فراہم کرنے کے لیے اہم اقدام اٹھاتے ہوئے موٹرسائیکل ٹرانسفر فیس اور دیگر رجسٹریشن چارجز معاف کر دیے ہیں۔
یہ فیصلہ وزیراعلیٰ پنجاب مریم نواز شریف کی جانب سے اعلان کردہ فیول سبسڈی اسکیم کے تسلسل میں کیا گیا ہے۔
محکمہ ایکسائز اینڈ ٹیکسیشن پنجاب کے مطابق شہریوں کو سہولت فراہم کرنے کے لیے موٹرسائیکل ٹرانسفر فیس 605 روپے، ایڈیشنل رجسٹریشن مارک فیس 1000 روپے اور اسمارٹ کارڈ فیس 1300 روپے مکمل طور پر معاف کر دی گئی ہیں۔
*اس سہولت سے شہری 6 اپریل تا 5 مئی 2026 تک فائدہ اٹھا سکیں گے۔*
حکام کے مطابق اس رعایت سے مستفید ہونے کے لیے ضروری ہے کہ موٹرسائیکل درخواست دہندہ کے اپنے نام پر رجسٹرڈ ہو، تاکہ وہ فیول سبسڈی اسکیم کے لیے اہل قرار پا سکے۔
محکمہ ایکسائز کے مطابق اس ریلیف پیکج کے ذریعے عوام کو مجموعی طور پر تقریباً 20 کروڑ روپے کا فائدہ پہنچایا جائے گا، جس کے اخراجات محکمہ خود برداشت کرے گا۔ تاہم واضح کیا گیا ہے کہ یہ رعایت لائف ٹائم ٹوکن ٹیکس پر لاگو نہیں ہوگی۔
ڈائریکٹر جنرل محکمہ ایکسائز اینڈ ٹیکسیشن پنجاب عمر شیر چٹھہ نے شہریوں سے اپیل کی ہے کہ وہ اس سنہری موقع سے فائدہ اٹھاتے ہوئے اپنی موٹرسائیکل اپنے نام پر رجسٹر کروائیں تاکہ حکومتی فیول سبسڈی اسکیم سے بھرپور استفادہ کیا جا سکے۔
