Umair Shafique Mughal

26/04/2026

28/02/2026

28/02/2026

پولیس کیریکٹر سرٹیفکیٹ میں بریت یافتہ مقدمات کے اندراج پر پابندی۔

لاہور ہائیکورٹ نے اپنے ایک اہم اور اصولی فیصلے میں قرار دیا ہے کہ جب کسی ملزم کو مجاز عدالت کی جانب سے باقاعدہ طور پر بری کر دیا جائے اور بریت کا فیصلہ حتمی حیثیت اختیار کر چکا ہو، تو قانون کی نظر میں وہ شخص تمام الزامات سے مکمل طور پر مبرا تصور کیا جائے گا۔

لاہور ہائیکورٹ نے واضح کیا کہ ایسی صورت میں کسی سرکاری دستاویز، بالخصوص پولیس کیریکٹر سرٹیفکیٹ میں متعلقہ ایف آئی آر یا مقدمہ کا ذکر کرنا، جب کہ بریت قطعی ہو چکی ہو، غیر ضروری، غیر قانونی اور بدنیتی پر مبنی اقدام شمار ہوگا۔

لاہور ہائیکورٹ نے مزید قرار دیا کہ یہ طرزِ عمل آئینِ پاکستان کے آرٹیکل 14 کے تحت شہری کے حقِ وقار (Right to Dignity) کی صریح خلاف ورزی ہے، کیونکہ ایک ایسے شخص پر دائمی بدنامی کا داغ لگایا جاتا ہے جو عدالتی عمل کے ذریعے بے قصور ثابت ہو چکا ہو۔

فیصلے میں اس امر پر بھی زور دیا گیا کہ حتمی بریت کے بعد کسی شہری کو دوبارہ مجرمانہ الزام سے منسلک کرنا نہ صرف عدالتی فیصلے کی روح کے منافی ہے بلکہ اصولِ انصاف، وقارِ انسانی اور قرینۂ معصومیت کو بھی مجروح کرتا ہے۔

لہذا لاہور ہائیکورٹ نے حکم دیا کہ درخواست گزار پولیس کیریکٹر سرٹیفکیٹ کا حق دار ہے، اور ایسا سرٹیفکیٹ جاری کیا جائے جس میں اس کی بریت اور کسی بھی موجودہ مجرمانہ ذمہ داری کی عدم موجودگی واضح طور پر ظاہر ہو۔

عبدالرحمن فریاد بنام حکومت پنجاب وغیرہ
PLJ 2026 LHR 84