09/07/2025
Kinilala ng Korte Suprema na ang biglaan at hindi mapigilang bugso ng damdamin bunga ng maraming taong pang-aabuso ng ama ng akusado ay maituturing na passion o obfuscation o matinding damdamin o pagkalito na isang mitigating circumstance na magpapababa sa parusa sa parricide.
Sa Desisyon na isinulat ni Associate Justice Ramon Paul L. Hernando, pinagtibay ng First Division ng Korte Suprema ang hatol na guilty o maysala kay Leopoldo Singcol (Singcol) sa pagpatay sa kanyang ama, pero ibinaba ang kanyang parusa dahil sa pagkakaroon ng nasabing mitigating factor.
Batay sa court record, sa gitna ng pagtatalo, tinangkang atakehin ng bolo si Singcol ng kanyang ama pero nadapa ito. Kinuha ni Singcol ang bolo at sinaksak sa dibdib ang ama, na siyang ikinamatay nito.
Napatay din ni Singcol sa pamamagitan ng saksak ang kanyang hipag habang nasugatan niya ang dalawang-taong-gulang na anak nito.
Inamin ni Singcol sa paglilitis na siya ang sumaksak sa kanyang ama, hipag, at pamangkin. Pinaliwanag niya na nagdilim ang kanyang paningin nang sandaling iyon dahil na rin sa pang-aabuso sa kanya ng kanyang ama mula pagkabata.
Habang sumang-ayon ang Korte Suprema sa trial court at Court of Appeals na hindi mailalapat ang konsepto ng self-defense, nagpasya ito na maaaring ituring ang passion o obfuscation bilang mitigating circumstance na magpapababa sa parusa. Hinatulan si Singcol ng dalawang bilang ng reclusion perpetua o aabot sa 40 taon sa kulungan para sa kasong parricide sa pagpatay sa kanyang ama at pagpatay sa kanyang hipag.
Sa ilalim ng Revised Penal Code, nagagawa ang krimen na parricide kapag ang akusado ay nakapatay ng kanyang magulang o anak, lehitimo man o hindi, o sinuman sa kaniyang mga ascendant o descendant, o legal na asawa.
Sa kabilang banda, ang passion o obfuscation ay isang estado ng pag-iisip kapag nakagawa ng isang krimen dahil sa hindi mapigilang bugso ng damdamin dala ng hindi makatarungan at hindi tamang karanasan.
Itinuring ng Korte Suprema ang parricide bilang resulta ng matagal nang kinikimkim na sama ng loob ng akusado laban sa ama, na ipinakita sa pamamagitan ng kaniyang hindi maipaliwanag na pananakit sa sarili matapos mapatay ang ama.
Basahin ang buong press release sa https://tinyurl.com/5yk5j7sr.
Basahin ang buong Desisyon sa https://tinyurl.com/4xm6xee3.
Sumunod sa Credit Attribution Policy ng SC PIO: https://sc.judiciary.gov.ph/credit-attribution-policy/.
