27/08/2025
Nagpasya ang na awtomatikong natatapos ang bisa ng isang Special Power of Attorney sa pagkamatay ng taong nagbigay nito. Anumang hakbang na gagawin ng kinatawan matapos ang pagkamatay ng principal ay walang bisa, maliban kung sakop ng mga exception sa ilalim ng batas.
Sa isang Desisyon na isinulat ni Associate Justice Henri Jean Paul B. Inting, sinabi ng Ikatlong Dibisyon ng Korte Suprema na nawalan ng awtoridad si Jessica Alova Uberas (Jessica) na kumilos sa ngalan ng kanyang amang si Meliton Alova (Meliton), dahil natapos na ang bisa ng SPA sa pagkamatay ni Meliton noong 1998.
Taong 1998 nang nagpagawa si Meliton ng isang SPA pabor sa anak na si Jessica kaugnay ng ari-arian nilang mag-asawa. Namatay siya sa huling bahagi ng parehong taon. Sa kabila nito, ginamit ni Jessica ang SPA noong 2003 para makakuha ng loan mula sa San Miguel Foods, Inc. (SMFI) sa pamamagitan ng pagsangla sa ari-arian ng kanyang yumaong ama. Nabigong bayaran ni Jessia ang loan at na-foreclose ang ari-arian kung saan ang SMFI ang nanalong bidder.
Nagsampa ng kaso upang mapawalang-bisa ang mortgage at foreclosure sale sina Felicidad Alova at Decelyn Alova Pution, ang balo at iba pang anak ni Meliton.
Parehong nagpasya ang Regional Trial Court (RTC) at Court of Appeals (CA) na natapos ang bisa ng SPA sa pagkamatay ni Meliton. Gayunman, sinabi ng RTC na dahil may pagsang-ayon sa SPA ang asawa ni Meliton na si Felicidad, may bisa ang sangla sa kanyang kalahating bahagi ng conjugal property. Sa kabilang banda, idineklara ng CA na walang bisa ang mortgage dahil hindi ito isinagawa sa ngalan ng mag-asawang Meliton at Felicidad.
Umapela ang SMFI sa Korte Suprema na bahagyang nagpasya pabor dito nang itinaguyod ang pagwawakas ng ahensiya pero binigyang-bisa ang mortgage at foreclosure sale kaugnay sa bahagi ni Jessica sa ari-arian.
Paliwanag ng Korte Suprema, sa ilalim ng SPA na isang kontrata ng ahensiya, pinahihintulutan ng principal ang isang ahente na kumilos sa ngalan niya sa mga transaksiyon kaugnay ng ibang partido. Ang ahensiya ay personal, kinatawan, at hinango, at nagtatapos ito sa pagkamatay ng alinman sa prinsipal o ahente.
Walang bisa ang anumang aksiyon ng ahente pagkatapos mamatay ang prinsipal maliban kung napapailalim ito sa dalawang exception sa Civil Code: (1) kapag ang ahensiya ay para sa karaniwang interes ng mga partido, at (2) kapag ang ahente, na hindi batid ang pagkamatay o pagtatapos ng ahensiya, ay nakipagkontrata sa isang ikatlong partido nang may good faith.
Sa kasong ito, walang pagpapakita na naaangkop ang mga exception na ito. Ganap na alam ni Jessica ang pagkamatay ng kanyang ama at hindi ginawa ang SPA para sa benepisyo nilang dalawa.
Iginiit ng Korte Suprema na para maitali ang principal sa aksiyon ng isang ahente, dapat malinaw ang kasulatan na ginawa, pinirmahan, at sinelyuhan sa pangalan ng principal. Dito, nilagdaan ang mortgage ni Jessica sa kanyang personal na kapasidad bagama't inilarawan siya nito bilang attorney-in-fact ni Meliton.
Hindi rin nakasaad bilang principal sa ilalim ng SPA ang asawa ni Meliton na si Felicidad.
Gayunman, nilinaw ng Korte Suprema na hindi ganap na walang bisa ang mortgage at foreclosure sale. Awtomatikong naging co-owner ng property si Jessica pagkatapos ng pagkamatay ng kanyang ama. Noong pinirmahan niya ang mortgage, inilagay niya ang kanyang bahagi sa ari-arian upang matiyak ang kanyang obligasyon sa SMFI. Samakatuwid, may bisa lamang ang mortgage at foreclosure sale para sa bahagi ni Jessica sa ari-arian.
Ibinalik ng Korte Suprema ang kaso sa RTC para matukoy ang bahagi ni Jessica sa nasabing pag-aari at i-annotate ang mga bahagi ng iba pang tagapagmana ni Meliton, at ng SMFI na nakakuha ng interes ni Jessica.
Basahin ang press release sa https://tinyurl.com/27t9k6vy.
Basahin ang Desisyon sa https://t.co/hNAbdz5jd0.
Sumunod sa Credit Attribution Policy ng SC PIO: https://sc.judiciary.gov.ph/credit-attribution-policy/.
