21/08/2026
✅“БЭЛЧЭЭРИЙН ЭРХИЙГ ХАНГАХАД НИЙГМИЙН НӨЛӨӨЛЛИЙГ ҮНЭЛЭХ ЭРХ ЗҮЙН ОРЧНЫГ БҮРДҮҮЛЭХ НЬ” ХЭЛЭЛЦҮҮЛЭГ ЗОХИОН БАЙГУУЛАГДАНА
🔹НҮБ-ын Цөлжилттэй тэмцэх конвенцын Талуудын 17 дугаар бага хурал (COP17)-ын хүрээнд Монгол Улсын Хүний эрхийн Үндэсний Комисс (ХЭҮК), Жендэрийн үндэсний хороо, Олон улсын эрх зүйн хөгжлийн байгууллага (IDLO), “Хил хязгааргүй алхам” ТББ, Оксфордын Их Сургуулийн Газарзүй, байгаль орчны сургууль хамтран малчдын нутаг, бэлчээр, амьжиргаа болон хүний эрхийг хамгаалах, хариуцлагатай, тогтвортой хөгжлийг дэмжихэд нийгмийн нөлөөллийн үнэлгээний ач холбогдлыг хэлэлцэх салбар арга хэмжээг наймдугаар сарын 22-ны өдөр COP17 хурлын Хөх бүсийн “А” хэсэгт MET-06 павильонд зохион байгуулах юм.
🔹Монгол Улсад Нийгмийн нөлөөллийн үнэлгээний тухай хуулийн төсөл боловсруулагдаж буйтай холбогдуулан нийгмийн нөлөөллийн үнэлгээг хөгжлийн төсөл хэрэгжүүлэхийн өмнө болон хэрэгжүүлэх явцад хэрхэн үр дүнтэй ашиглах, нөлөөлөлд өртөж буй иргэдийн оролцоо, эрхийг хэрхэн хангах талаар олон улсын болон дотоодын туршлагад тулгуурлан санал солилцож, хэлэлцүүлэг өрнүүлэх юм.
🔹Мөн Дундговь, Дорноговь аймгийн малчид хөгжлийн төслүүдийн улмаас уламжлалт нутаг, бэлчээр болон нүүдлийн амьдралд нь тулгарч буй өөрчлөлт, хүндрэл, бодит туршлагаа хуваалцана.
🔹Энэ үеэр ХЭҮК-оос хөгжлийн төслийн нөлөөллийн бүсэд амьдарч буй иргэдийн хүний эрхийн нөхцөл байдал, тулгамдаж буй асуудлыг танилцуулж, байр сууриа илэрхийлэх юм.
📍Дараах QR-аас хөтөлбөртэй танилцана уу.
COP17 Mongolia
