05/11/2025
#မျှော်လင့်ချက်ဖြင့်_အသက်ရှင်ပါ
မူရင်း - တင်ညွန့်
--------------------------------
ကျွန်တော်ဖတ်ဖူးသည့် ပုံပြင်လေးတစ်ပုဒ်အကြောင်း ပြောချင်ပါသည်။
ဘုရင်က လူနှစ်ယောက်ကို သေဒဏ်ချလိုက်သည်။ ထိုလူက ဘုရင်မည်သည့်အရာကို နှစ်သက် သဘောကျ ကြောင်း သိထားသည်။ သူကဘုရင့်ထံစကားပါးလိုက်သည်။
သူ့ကိုသာအသက်ချမ်းသာပေးပါလျှင် ဘုရင်၏စီးတော်မြင်းကို တစ်နှစ်အတွင်း ပျံသန်းနိုင်အောင် လုပ်ပေး ပါမည်ဟူ၍ဖြစ်သည်။
ဘုရင်ကထိုစကားကိုကြားလိုက်လျှင် ဝမ်းမြောက်သွားသည်။ မြင်းပျံကြီးကိုစီးပြီး တိုင်းခမ်းလှည့်လည်နိုင်တော့ မည်ဟုစိတ်ကူးကာ အကျဉ်းသားကို လွှတ်စေဟု ပြောလိုက်သည်။ အကျဉ်းသားအနေဖြင့် တစ်နှစ်အတွင်း မြင်းကို ပျံအောင် လုပ်ပေးရမည်ဖြစ်သည်။ မလုပ်နိုင်လျှင် သတ်မည်။
ဒုတိယအကျဉ်းသားက မြင်းပျံနိုင်အောင်လုပ်ပေးမည်ဆိုသောသူကို မေးလိုက်သည်။
“မင်းဘာဖြစ်လို့ မဖြစ်နိုင်တာတွေ ပြောလိုက်ရတာလဲ”
“မင်းကွယ် မြင်းဆိုတာ ပျံနိုင်လို့လား။ မြင်းပျံဆိုတာ ဒဏ္ဍာရီထဲမှာပဲရှိတာ။ အပြင်မှာဖြစ်နိုင်လို့လား”
“အဲဒါဆိုလည်း မင်းကဘာဖြစ်လို့ ပေါကြောင်ကြောင်ကတိကို ပေးလိုက်ရတာလဲ”
“ဒီလိုရှိတယ်ကွ။ ငါပေးတဲ့ကတိကို လက်ခံလိုက်တယ်ဆိုကတည်းက ဘုရင်လည်းပေါကြောင်ကြောင်ဆိုတာ သိသာတာပဲ။ ငါဘာကြောင့် ဒီကတိကိုပေးသလဲဆိုတော့ လေးချက်ရှိတယ်ကွ”
#တစ် - အဲဒီဘုရင် တစ်နှစ်အတွင်း သေသွားနိုင်တာပဲ
#နှစ် - ငါလည်း တစ်နှစ်အတွင်း သေသွားနိုင်တာပဲ
#သုံး - တစ်နှစ်အတွင်း မြင်းလည်း သေသွားနိုင်တာပဲ
#လေး - ငါကိုယ်တိုင်က မြင်းကိုပျံအောင် လုပ်ပေးချင်လည်း လုပ်ပေးနိုင်မှာပဲ။
ထိုပုံပြင်လေးက ဘာကိုပြောသနည်း။ မည်သည့် အခြေအနေရောက်နေသည်ဖြစ်စေ မျှော်လင့်ချက်တွေ မဆုံးရှုံးရန်ဖြစ်သည်။
ကျွန်တော်တို့ မျှော်လင့်ချက်တွေ အမြဲထားနေရမည်။ ဘယ်တော့မှ အရှုံးမပေးရန်လိုသည်။ မျှော်လင့်ချက် ဆိုသည်မှာ အနာဂတ်တွင် ကောင်းတာတစ်ခုခုဖြစ်လာလိမ့်မည်ဟူ၍ ယုံကြည်ခြင်းဖြစ်သည်။ မျှော်လင့်ချက် ဆိုသည်မှာ ဦးနှောက်နှင့် ခန္ဓာကိုယ်ကို လှုပ်ရှားစေသော စွမ်းအားလည်းဖြစ်သည်။
မျှော်လင့်ချက်ရှိလျှင် အခက်အခဲများကို ကျော်လွှားရမည့် စိန်ခေါ်မှုတစ်ခုအနေဖြင့် ရှုမြင်လာမည်။ ထို့ကြောင့် “ထွက်ပေါက်မရှိ၊ လမ်းပိတ်နေပြီ” ဟု မမြင်တော့။ ထိုအချိန်တွင် စိတ်ဖိစီးမှုတွေ လျော့နည်းလာပြီး စိတ်ဓာတ် ကျခြင်းကိုလည်း အကာအကွယ်ပေးပြီးသားဖြစ်သွားသည်။
လူတစ်ယောက်သည် အရှုံးမပေးဘဲ ဆက်လက်ကြိုးစားနေသည်ဆိုခြင်းမှာ “ငါကြိုးစားရင် တစ်နေ့ အောင်မြင် ရမည်” ဆိုသည့် မျှော်လင့်ချက်ကြောင့်ဖြစ်သည်။ မျှော်လင့်ချက်သာ ပျောက်ဆုံးသွားလျှင် ငါသည် ဘုံးဘုံး လဲကျသွားလိမ့်မည်။
အခက်အခဲတွေကြုံလာသည့်အခါတွင် အမြန်ဆုံးပြန်လည်ထူထောင်နိုင်ခြင်းသည် မျှော်လင့်ချက်အပေါ်တွင် အခြေခံသည်။ အရှုံးမပေးသောစိတ်သည် “လဲကျလည်း ငါပြန်ထနိုင်တယ်” ဆိုသည့် ခံယူချက်ကို ဖြစ်ပေါ်စေ နိုင်သည်။
လူတစ်ယောက်၏တန်ဖိုးသည် အောင်မြင်မှုနှင့် ချမ်းသာမှုအပေါ်တွင်မတည်ပါ။ မည်သည့် အခက်အခဲတွင်မဆို ကြိုးစားရုန်းကန်ရဲသည့် စိတ်ဓာတ်အပေါ်တွင်သာတည်သည်။ အရှုံးမပေးဘဲ ဆက်လက်ရပ်တည်နိုင်ခြင်းက မိမိဘဝကို လေးစားတန်ဖိုးထားကြောင်း ပြသခြင်းဖြစ်သည်။
ကံကြမ္မာဆိုသည်မှာ မပြောင်းလဲနိုင်သည့် အရာမဟုတ်။ မြင်းကို ပျံနိုင်အောင်လေ့ကျင့်ပေးနိုင်မှာပဲဆိုသည့် စိတ်ဓာတ်မျိုးကလည်း ဖြစ်နိုင်ခြေရှိသော အနာဂတ်များအပေါ်တွင် အာရုံစိုက်ခြင်းဖြစ်သည်။ ယနေ့ခက်ခဲ ကျပ်တည်းနေမှုများသည် နောက်တစ်လ သို့မဟုတ် နောက်တစ်နှစ်အတွင်း မပြောင်းလဲနိုင်ဘူးဟု မည်သူမျှ အာမ, မခံနိုင်ပေ။ အရှုံးမပေးဘဲ စောင့်ဆိုင်းနေခြင်းကလည်း အပြောင်းအလဲအတွက် အခွင့်အရေးကို ဖန်တီးပေးခြင်းဖြစ်သည်။
အရှုံးမပေးလိုက်ပါနှင့်။
အရှုံးပေးလိုက်ခြင်းသည် ရုပ်ပိုင်းဆိုင်ရာအန္တရာယ်မဖြစ်သည့်တိုင် စိတ်ပိုင်းဆိုင်ရာတွင် ကြီးမားသော ဆုံးရှုံးမှု များကို ဖြစ်စေနိုင်သည်။
ကျွန်တော်တို့မျှော်လင့်ချက်တွေထားကာ ရပ်တည်နိုင်အောင်ကြိုးစားရမည်။
ဘယ်တော့မှ အရှုံးမပေးဘူးဆိုသည့် စိတ်ဓာတ်သည် မည်သည့်အခြေအနေကမဆို ငါ့အားထုတ်မှုကို မဖျက်ဆီး နိုင်ဘူးဆိုသည့် စိတ်ဓာတ်ကိုလည်း ဖြစ်စေသည်။
မျှော်လင့်ချက်ပျက်သွားလျှင် အားထုတ်ခဲ့သမျှ အဓိပ္ပာယ်မဲ့သွားလိမ့်မည်။
ဓါတ်ပုံ - အင်တာနက်
