M.A.W Legal Consultants

02/05/2026

Master ပြီးထားပြီး Dispute Settlement, IP rights , Environmental , Trade နဲ့ပတ်သက်ပြီး အတွေ့အကြုံရှိတဲ့ ဥပဒေနယ်ပယ်က ရှေ့နေလူငယ်များ လျှောက်ထားသင့်ပါတယ်။

https://wto.wd103.myworkdayjobs.com/en-US/External/job/CWR/Young-Professionals_JR104137

🌍 WTO Young Professionals Program 2027 (Fully Funded – Switzerland 🇨🇭)
World Trade Organization (WTO) ရဲ့ YPP မြန်မာလူငယ်များအတွက် အခွင့်အရေးပါ။

📍 နေရာ- Geneva
⏳ အချိန် - (၁) နှစ် (၂၀၂၇ ဇန်နဝါရီ စတင်မည်)
📅 နောက်ဆုံးလျှောက်ထားရန်: ၇ မေ ၂၀၂၆

💰 လစဉ်လစာ (CHF 4,000+)
• ကျန်းမာရေးအာမခံ၊
• ခရီးစရိတ်အထောက်အပံ့ (တချို့အခြေအနေများတွင်)
• လက်တွေ့အတွေ့အကြုံနှင့် နိုင်ငံတကာ network ချဲ့ထွင်နိုင်သည့် အခွင့်အရေးဖြစ်သည်။

🎯 လုပ်ငန်းနယ်ပယ်များ:

Trade policy, Law, Economics, Intellectual Property, Dispute Settlement, Agriculture အစရှိသည်… (link တွင် အသေးစိတ်ဝင်ကြည့်ရန်)

✅ လျှောက်ထားရန်လိုအပ်ချက်များ:
• အသက် ၃၂ နှစ်အောက်
• Master’s degree (သို့) တန်းတူအဆင့်
• Trade / Economics / Law / Political Science နယ်ပယ်အတွေ့အကြုံရှိရမည်
• အင်္ဂလိပ်ဘာသာကောင်းမွန်ရမည်
• WTO အဖွဲ့ဝင်နိုင်ငံသား ဖြစ်ရမည်။
✨ နိုင်ငံတကာအတွေ့အကြုံရရှိပြီး career တိုးတက်ရန် အကောင်းဆုံးအခွင့်အရေးတစ်ခုပါ။

👉 Deadline မတိုင်မီ WTO careers portal : https://www.wto.org/english/thewto_e/vacan_e/ypp_e.htm?fbclid=IwVERDUARi3pJleHRuA2FlbQIxMQBzcnRjBmFwcF9pZAo2NjI4NTY4Mzc5AAEezxCDk79CkGvOL0liPV_twxlAj1JwazMbfZZi6W4CrjMPfXlKSSFuaYdFtUE_aem_6smgHEV7k-ngIuCb1e5lsA

မှတဆင့် လျှောက်ထားနိုင်ပါသည်။

24/04/2026

ပိုးသတ်ဆေးဥပဒေအား အထူးသဖြင့် စိုက်ပျိုးရေးလုပ်ငန်း လုပ်ကိုင်သူများနှင့် ပိုးသတ်ဆေး အရောင်းဆိုင်ရှင်များ အနေဖြင့် မိမိတို့ ကိုင်တွယ်နေသည့် ဆေးဝါးများသည် ဥပဒေနှင့် ညီညွတ်မှု ရှိမရှိ သိရှိထားရန် အလွန်အရေးကြီးပါသည်။
၂၀၁၆ ခုနှစ်၊ ပိုးသတ်ဆေးဥပဒေ တွင် ဥပဒေအရ ပိုးသတ်ဆေးလက်လီ လက်ကား ရောင်းချခွင့်လိုင်စင်ရရှိသူ၏ တာဝန်နှင့် လုပ်ပိုင်ခွင့်များမှာ အောက်ပါအတိုင်းဖြစ်သည်။
⚙️ ပုဒ်မ- ၂၅။ ပိုးသတ်ဆေးလက်လီ လက်ကားရောင်းချခွင့် လိုင်စင်ရရှိသူသည်-
(က) လိုင်စင်ပါသက်တမ်းနှင့်အညီ လုပ်ကိုင်ဆောင်ရွက်ခွင့်ရှိသည်။
(ခ) သတ်မှတ်သော လိုင်စင်ခကို ပေးဆောင်ပြီးဖြစ်ရမည်။
(ဂ) လိုင်စင်ကို ဆိုင်တွင် မြင်သာအောင် ချိတ်ဆွဲထားရမည်။
(ဃ) ရောင်းချသည့်ပိုးသတ်ဆေးများ၏ အာနိသင်ပြောင်းလဲစေရန် အခြားအရာဝတ္ထုပစ္စည်း တစ်စုံတစ်ရာ ရောနှောခြင်း၊ ပြုပြင်ခြင်းနှင့် မမှန်မကန် ကြော်ငြာရောင်းချခြင်း မပြုလုပ်ရ။
(င) လိုင်စင်တွင် ဖော်ပြပါရှိသော စည်းကမ်းချက်များကို တိကျစွာ လိုက်နာရမည်။
(စ) ဦးစီးမှူး သို့မဟုတ် စစ်ဆေးရေးမှူးက အခါအားလျော်စွာ စစ်ဆေးခြင်းကို ခံယူရမည်။
(ဆ) မြို့နယ်ဦးစီးမှူးက တောင်းခံလာပါက မိမိလက်ဝယ်ရှိ ပိုးသတ်ဆေး နမူနာများကို ပေးအပ်ရမည်။
(ဇ) ပိုးသတ်ဆေး ဝယ်ယူရောင်းချသည့် မှတ်တမ်းများ ထားရှိရမည်။
(ဈ) လိုင်စင်သက်တမ်းကုန်ဆုံးပါက ဆက်လက်လုပ်ကိုင်လိုလျှင် သက်တမ်းမကုန်ဆုံးမီ ရက်ပေါင်း ၃၀ ကြိုတင်၍ သက်တမ်း တိုးမြှင့်ပေးရန် သက်ဆိုင်ရာ ခရိုင်ဦးစီးမှူးထံ လျှောက်ထားရမည်။

ပိုးသတ်ဆေးသုံးစွဲသူလိုက်နာရမည့် စည်းကမ်းများမှာ အောက်ပါအတိုင်းဖြစ်သည်
⚙️ ပုဒ်မ- ၂၆။ ပိုးသတ်ဆေးသုံးစွဲသူသည်-
(က) ပိုးသတ်ဆေးအညွှန်းစာပါအတိုင်း လိုက်နာ သုံးစွဲရမည်။
(ခ) ဦးစီးဌာနက အခါအားလျော်စွာ ထုတ်ပြန်သော ပိုးသတ်ဆေး အန္တရာယ်ကင်းရှင်းစွာ ကိုင်တွယ်ခြင်း နည်းလမ်းများအတိုင်း လိုက်နာသုံးစွဲရမည်။
(ဂ) ပိုးသတ်ဆေးများကို အစားအသောက်များနှင့် နီးကပ်စွာထားရှိခြင်း၊ ကလေးသူငယ်များ အလွယ်တကူ လက်လှမ်းမီသော နေရာတွင် ထားရှိခြင်းမပြုလုပ်ရ။
(ဃ) သုံးစွဲပြီးသော ပိုးသတ်ဆေးဘူးအခွံနှင့် ထုပ်ပိုးပစ္စည်းများကို ဦးစီးဌာန၏ ညွှန်ကြားချက်နှင့်အညီ စွန့်ပစ် ဖျက်ဆီးခြင်း နည်းလမ်းများအတိုင်း လိုက်နာဆောင်ရွက်ရမည်။
(င) စိုက်ခင်းများတွင်လည်းကောင်း၊ ရိတ်သိမ်းပြီးသီးနှံများကို သိုလှောင်ရာတွင်လည်းကောင်း ပိုးသတ်ဆေး သုံးစွဲခြင်းနှင့် စပ်လျဉ်း၍ ဦးစီးဌာနက အခါအားလျော်စွာ ထုတ်ပြန်သော ပညာပေးလမ်းညွှန်မှုများကို လိုက်နာရ မည်။

ဤဥပဒေပါ တားမြစ်ချက်များကို အောက်တွင်ဖော်ပြထားပါသည်
📍ပုဒ်မ-၃၁။ မည်သူမျှ မှတ်ပုံတင်အဖွဲ့၏ ခွင့်ပြုချက်မရှိဘဲ ပိုးသတ်ဆေး သို့မဟုတ် အဆိပ်ရှိပစ္စည်းကို ပြည်ပမှ တင်သွင်းခြင်း၊ ပြည်ပသို့တင်ပို့ခြင်း မပြုလုပ်ရ။

📍ပုဒ်မ- ၃၂။ မည်သူမျှ လိုင်စင်မရှိဘဲ ပြည်ပမှတင်သွင်းလာသော အဆိပ်ရှိပစ္စည်းကို ပိုးသတ်ဆေးအဖြစ် ဖော်စပ်ရောင်းချ သည့် လုပ်ငန်း၊ ပြည်ပမှ ပြည်တွင်းသို့ တင်သွင်းလာသော ပိုးသတ်ဆေးကို ပြန်လည်ထုပ်ပိုးရောင်းချသည့် လုပ်ငန်း၊ ပိုးသတ်ဆေးကို လက်လီလက်ကား ရောင်းချသည့်လုပ်ငန်းနှင့် ပိုးသတ်မှိုင်းတိုက်ခြင်း လုပ်ငန်းများကို မပြုလုပ်ရ။

📍ပုဒ်မ- ၃၃။ မည်သူမျှ ပိုးသတ်ဆေးကိုဖြစ်စေ၊ အဆိပ်ရှိပစ္စည်းကိုဖြစ်စေ ပိုးကျသည့် အန္တရာယ်ကာကွယ်နှိမ်နင်း သည့်ကိစ္စမှအပ လူအများစားသုံးသည့်သီးနှံ၊ အစားအစာ သို့မဟုတ်
အဖျော်ယမကာ စသည်များတွင် ထည့်သွင်း သုံးစွဲခြင်း၊ ပိုးသတ်ဆေး သို့မဟုတ် အဆိပ်ရှိပစ္စည်းကို သုံးစွဲလျက် မည်သည့်သတ္တဝါကိုမျှ ဖမ်းယူခြင်း၊ သတ်ဖြတ်ခြင်း မပြုလုပ်ရ။

📍ပုဒ်မ- ၃၄။ မည်သူမျှ အသက် ၁၈နှစ် နှင့် ၁၈ နှစ်အောက် ကလေး၊ ကိုယ်ဝန်ဆောင် မိန်းမ သို့မဟုတ် ကလေး နို့တိုက်သောမိန်းမကို ပိုးသတ်ဆေးကိုင်တွယ်ရာတွင်
လည်းကောင်း၊ သုံးစွဲရာတွင်လည်းကောင်း စေခိုင်းခြင်း မပြုလုပ်ရ။

📍ပုဒ်မ- ၃၅။ ပိုးသတ်ဆေးသုံးစွဲသူ မည်သူမဆို ပုဒ်မ ၂၆ ပါ စည်းကမ်းချက် တစ်ရပ်ရပ်ကို ဖောက်ဖျက်ခြင်းကြောင့် ပတ်ဝန်းကျင်ကိုဖြစ်စေ၊
တစ်စုံတစ်ယောက်ကိုဖြစ်စေ ထိခိုက်နစ်နာခြင်း မရှိစေရ။

📍ပုဒ်မ- ၃၆။ ပိုးသတ်ဆေးသုံးစွဲသူ မည်သူမဆို ပုဒ်မ ၂၆ ပါ စည်းကမ်းချက်တစ်ရပ်ရပ်ကို ဖောက်ဖျက်ခြင်းကြောင့် တစ်စုံတစ်ယောက်သောသူအား အသက်ဆုံးရှုံးမှုကို ဖြစ်ပေါ်စေပါက ရာဇသတ်ကြီးအရ ပြစ်ဒဏ်ထိုက်သင့်စေ ရမည်။

📍ပုဒ်မ- ၃၇။ မည်သူမျှ သီးနှံများကို သိုလှောင်ရာတွင် မှတ်ပုံတင်အဖွဲ့က သတ်မှတ်ထားသည့် ပိုးသတ်ဆေးအမျိုးအစား နှင့် သုံးစွဲနည်းများမှအပ
အခြားပိုးသတ်ဆေးအမျိုးအစားနှင့် သုံးစွဲနည်းများကို သုံးစွဲခြင်း မပြုရ။

📍ပုဒ်မ- ၃၈။ မည်သူမျှ ပိုးသတ်ဆေးကို အစားအစာနှင့် အတူတွဲ၍ရောင်းချခြင်းသော်လည်းကောင်း၊ သယ်ဆောင်ခြင်း သော်လည်းကောင်း မပြုလုပ်ရ။

📍ပုဒ်မ- ၃၉။ မည်သူမဆို ပုဒ်မ ၂၅၊ ပုဒ်မခွဲ (ဃ)၊ပုဒ်မ ၃၁၊ ၃၂၊ ၃၃ နှင့် ၃၄ ပါ ပြဌာန်းချက်တစ်ရပ်ရပ်ကို ဖောက်ဖျက် ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင်
ထိုသူကို ထောင်ဒဏ်ငါးနှစ်အထိဖြစ်စေ၊ ငွေဒဏ်ကျပ် တစ်ဆယ်သိန်း အထိဖြစ်စေ၊ ဒဏ်နှစ်ရပ်လုံးဖြစ်စေ ကျခံစေရမည်။
ထို့ပြင် ပြစ်မှုတွင် အကျုံးဝင်သည့် သက်သေခံ ပစ္စည်းများကိုလည်း သိမ်းယူခြင်းခံရမည်။

တားမြစ်ချက်အားဖောက်ဖျက်သူကို အောက်ဖော်ပြပါ ပြစ်မှုနှင့် ပြစ်ဒဏ်များဖြင့်အရေးယူဆောင်ရွက်ခြင်းခံရမည်။

💡ပုဒ်မ- ၄၀။ မည်သူမဆို ပုဒ်မ ၃၅ ပါ ပြဋ္ဌာန်းချက်ကို ဖောက်ဖျက် ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို ခြောက်လအထိ ထောင်ဒဏ်ဖြစ်စေ၊
ငွေဒဏ်ကျပ် သုံးသိန်းအထိဖြစ်စေ ကျခံစေရမည်။

💡ပုဒ်မ- ၄၁။ မည်သူမဆို ပုဒ်မ ၃၆ သို့မဟုတ် ပုဒ်မ ၃၇ ပါ ပြဋ္ဌာန်းချက်တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို ထောင်ဒဏ်တစ်နှစ်အထိဖြစ်စေ၊
ငွေဒဏ်ကျပ် တစ်ဆယ်သိန်းအထိ ဖြစ်စေ၊ ဒဏ်နှစ်ရပ်လုံးဖြစ်စေ ကျခံစေရမည်။ ထို့ပြင် ပြစ်မှုတွင် အကျုံးဝင်သည့် သက်သေခံပစ္စည်းများကိုလည်း သိမ်းယူခြင်းခံရမည်။

#ပိုးသတ်ဆေးဥပဒေ #တားမြစ်ချက် #ပြစ်ဒဏ်

21/04/2026

လူကုန်ကူးမှုတားဆီးနှိမ်နင်းရေးဥပဒေ အပိုင်း(၃)

လူကုန်ကူးမှုသည် လူ့အခွင့်အရေးကို ချိုးဖောက်သည့် ပြင်းထန်သော ပြစ်မှုတစ်ရပ်ဖြစ်ပြီး ယင်းပြစ်မှုကြောင့် ထိခိုက်နစ်နာရသူများကို ကာကွယ်စောင့်ရှောက်ပေးခြင်းနှင့် ပြန်လည်ထူထောင်ပေးခြင်းတို့သည် အရေးကြီးသော လုပ်ငန်းတစ်ရပ်ဖြစ်ပါတယ်။

ဒါ့ကြောင့် လူကုန်ကူးမှု တားဆီးနှိမ်နင်းရေးဆိုင်ရာ ဥပဒေမှာ လူကုန်ကူးခံရသူများ၏ လုံခြုံရေးနှင့် အခွင့်အရေးများကို အလေးထားပြီး ကာကွယ်စောင့်ရှောက်မှု၊ ပြန်လည်ထူထောင်ရေးနှင့် အကူအညီပေးရေးဆိုင်ရာ ပြဋ္ဌာန်းချက်များကို သတ်မှတ်ထားပါတယ်။

🔷ပထမပိုင်း (ပုဒ်မ ၁၃ ၊ ပုဒ်မ ၁၅)

လူကုန်ကူးခံရသူများနှင့် သက်သေများ၏ လုံခြုံရေးကို ကာကွယ်ပေးရန် အစီအစဉ်များ

လူကုန်ကူးမှုနှင့် ပတ်သက်သော အမှုများတွင် လူကုန်ကူးခံရသူနှင့် ၎င်းမိသားစုတို့၏ ကိုယ်ရေးကိုယ်တာ အချက်အလက်များကို လျှို့ဝှက်ထားရပြီး ပေါက်ကြားမှု မရှိစေရန် စီစဥ်ဆောင်ရွက်ရပါတယ်။ ဒါ့ပြင် အမျိုးသမီးများနှင့် ကလေးသူငယ်များ၏ လုံခြုံရေးနှင့် ကာယိန္ဒြေကို ထိန်းသိမ်းနိုင်ရန် တရားရုံးတွင် အများပြည်သူရှေ့ စစ်ဆေးခြင်း မပြုဘဲ သီးသန့်ရုံးခန်း (in camera) တွင် စစ်ဆေးစီရင်နိုင်ရန်လည်း ဥပဒေအရ စီစဉ်ပေးနိုင်ပါတယ်။

သက်သေထွက်ဆိုသူများကိုလည်း ခြိမ်းခြောက်မှုများနှင့် လက်တုံ့ပြန်မှုများမှ ကာကွယ်ပေးရန် လုံခြုံရေးအစီအမံများ ဆောင်ရွက်ပေးခြင်း၊ ယာယီနေရာထိုင်ခင်းများ စီစဥ်ပေးခြင်း၊ ကိုယ်ရေးအချက်အလက်များကို လျှို့ဝှက် အဆင့်ထား ဆောင်ရွက်ပေးရသည်။ ထို့အပြင် သက်သေအဖြစ် ထွက်ဆိုရာတွင် ဘေးအန္တရာယ်ကင်းဝေးစေရေးအတွက် ဗီဒီယိုဆက်သွယ်ဆောင်ရွက်ရေး (Video Conferencing) နည်းဖြင့် စစ်ဆေးခြင်း၊ ထွက်ဆိုချက်ကို မှတ်တမ်းတင်ခြင်း တို့ကို ခွင့်ပြုပြီး ယင်းနည်းဖြင့် စစ်ဆေးသော ထွက်ဆိုချက် မှတ်တမ်းကို တရားရုံးတွင် သက်သေခံအဖြစ် တင်သွင်းခြင်း၊ လက်ခံခြင်း ပြုနိုင်တယ် လို့ ဥပဒေမှာ ပြဌာန်းထားပါတယ်။

🔷ဒုတိယပိုင်း (ပုဒ်မ ၁၄)

လူကုန်ကူးခံရသူများ၏ နစ်နာဆုံးရှုံးမှုများအတွက် လျော်ကြေးနှင့် နစ်နာကြေးများ

လူကုန်ကူးခံရသူများ အထူးသဖြင့် အမျိုးသမီးနှင့် ကလေးသူငယ်များ၏ ရုပ်ပိုင်းဆိုင်ရာ၊ စိတ်ပိုင်းဆိုင်ရာနှင့် လူမှုရေးပိုင်းဆိုင်ရာ နစ်နာဆုံးရှုံးမှုများအတွက်‌ လျော်ကြေး သို့မဟုတ် နစ်နာကြေးများ တရားမကြောင်းအရ လျော်ကြေးတောင်းဆိုနိုင်ရန် ဥပဒေက ထောက်ပံ့ပေးထာပါတယ်။ ထိုသို့ တောင်းဆိုရာတွင် ဥပဒေဆိုင်ရာအထောက်အကူပေးရေးအဖွဲ့များမှ အကြံဉာဏ်ပေးခြင်း၊ ရှေ့နေငှားရမ်းပေးခြင်းနှင့် လူကုန်ကူးခံရသူသည် နိုင်ငံခြားသားဖြစ်ပါက သံတမန်နည်းလမ်းအရ ဆောင်ရွက်ပေးခြင်း၊ စကားပြန် ဖြင့်စစ်ဆေးရန် ဆောင်ရွက်ပေးနိုင်သည်။ ထို့အပြင် လူကုန်ကူးမှုကျူးလွန်သူအပေါ် ပြစ်မှုကြောင်းအရ တရားစွဲဆို စစ်ဆေးနေစဥ် ကာလအတွင်း လူကုန်ကူးခံရသူများ၏ စိတ်ပိုင်းဆိုင်ရာ ထိခိုက်မှုများကို ပြန်လည်ကုစားနိုင်ရန် ကျန်းမာရေးစောင့်ရှောက်မှုများ၊ ကာကွယ်စောင့်ရှောက်မှုများကိုလည်း စီစဉ်ပေးရသည်။

🔷တတိယပိုင်း (ပုဒ်မ ၁၆)

လူကုန်ကူးခံရသူများ၏ ကင်းလွတ်ခွင့်နှင့် ပြန်လည်ထူထောင်ရေးအစီအစဥ်များ

လူကုန်ကူးခံရသူများကို လူကုန်ကူးမှုကြောင့် တရားမဝင် နိုင်ငံဝင်ရောက်ခြင်း၊ နိုင်ငံအတွင်း နေထိုင်ခြင်း သို့မဟုတ် မမှန်ကန်သော ခရီးသွားစာရွက်စာတမ်းများ အသုံးပြု လက်ဝယ်ထားခဲ့ရသော်လည်း ယင်းအခြေအနေများအတွက် လူကုန်ကူးခံရသူကို အရေးယူခြင်း၊ အပြစ်ပေးခြင်းမပြုရဟု ဥပဒေတွင် သတ်မှတ်ထားသည်။ ဒါက ဘယ်လိုမျိုးလဲဆိုရင် လူကုန်ကူးခံရသူဟာ လိမ်လည်ပြုလုပ်ထားတဲ့စာရွက်စာတမ်းတွေနဲ့ တရားမဝင်နေထိုင်၊ အလုပ်လုပ်တယ်ဆိုရင် ဒီဥပဒေပုဒ်မတွေ အရ အရေးယူမခံရနိုင်ပါဘူး။ ပုဒ်မ ၃၇ တွင်လည်း လူကုန်ကူးခံရသူမှအပ အထက်ပါလုပ်ရပ်များလုပ်ရင် အနည်းဆုံး သုံးနှစ်မှ အများဆုံး ခုနစ်နှစ်အထိ ထောင်ဒဏ်ချမှတ် ရမည့်အပြင် ငွေဒဏ်လည်း ချမှတ်နိုင်ကြောင်း ပြဌာန်းထားပါတယ်။

လူကုန်ကူးခံရသူများကို ပြည်ပနိုင်ငံများမှ ပြန်လည်ပို့ဆောင်ရာတွင် သံရုံးများသည် လူကုန်ကူးခံရသူများ၏ လုံခြုံရေးကို အလေးထား၍ နိုင်ငံတော်သို့ အမြန်ဆုံး ပြန်လည်ပို့ဆောင်နိုင်ရန် ကြိုးပမ်းဆောင်ရွက်ရသည်။ လိုအပ်ပါက ခရီးသွားအထောက်အထားများ ထုတ်ပေးခြင်းနှင့် သက်ဆိုင်ရာအဖွဲ့အစည်းများနှင့် ညှိနှိုင်းဆောင်ရွက်ခြင်းတို့ကို ပြုလုပ်ရသည်။ နိုင်ငံတော်သို့ ပြန်လည်ရောက်ရှိလာသော လူကုန်ကူးခံရသူများ အတွက် လုံခြုံစိတ်ချရသော ယာယီနေထိုင်ရာနေရာများ စီစဉ်ပေးခြင်း၊ ကျန်းမာရေးစောင့်ရှောက်မှုများ ပံ့ပိုးပေးခြင်း၊ စိတ်ပိုင်းဆိုင်ရာ ကုစားပေးခြင်းနှင့် လူမှုဘဝ ပြန်လည်တည်ဆောက်နိုင်ရန် ပညာရေးနှင့် အသက်မွေးဝမ်းကျောင်း ပညာသင်ကြားပေးခြင်း၊ အလုပ်အကိုင်အခွင့်အလမ်းများ ဖန်တီးပေးခြင်းများ ပါဝင်ပါတယ်။

ဒါ့ကြောင့် လူကုန်ကူးမှု တားဆီးနှိမ်နင်းရေးဥပဒေသည် လူကုန်ကူးခံရသူများကို အကာအကွယ်ပေးခြင်း၊ အကူအညီပေးခြင်းနှင့် ပြန်လည်ထူထောင်ပေးခြင်းတို့ကို အဓိကထားသော ဥပဒေတစ်ရပ်ဖြစ်ပါတယ်။ ယခုဆိုရင် ဒီဥပဒေအကြောင်း ခြုံငုံ သိရှိသွားလိမ့်မယ်လို့ ထင်ပါတယ်။

20/04/2026

Big thanks to 𝐉 𝐀𝐠𝐫𝐢 for the festive surprise.
We are so grateful for your continued support and partnership.

Cheers to a successful new year! 🥂✨

06/04/2026

‎လောင်းကစားဝိုင်း၊ဒိုင် ပြုခြင်း နှင့် လောင်းကစားပြုရာတွင်ပါဝင်ခြင်းတို့အတွက် ပြစ်ဒဏ်များ
‎
‎၂၀၁၉ခုနှစ် လောင်းကစားဥပဒေအရ လောင်းကစားပြုရာတွင် ဒိုင်သို့မဟုတ် လောင်းကစားအိမ်ပြုခြင်း ၊ ထိုးသားအဖြစ်ပါဝင်ခြင်း ၊ လောင်းကစားအိမ်တွင်ရောက်ရှိနေခြင်းတို့သည် ဥပဒေအရ ထောင်ဒဏ်ငွေဒဏ်ထိုက်သော ရာဇဝတ်မှုဖြစ်သည်။
‎
‎🛑 လောင်းကစားဝိုင်းပြုလုပ်ခြင်းနှင့် စီမံခန့်ခွဲခြင်း
‎ပုဒ်မ-၁၇ သည် လောင်းကစားဝိုင်း ထောင်သူများ၊ ပိုင်ရှင်များ သို့မဟုတ် စီမံခန့်ခွဲသူများကို အဓိက အရေးယူခြင်းဖြစ်သည်။
‎🔶 ပြစ်မှု: မည်သူမဆို လောင်းကစားဝိုင်းထောင်ခြင်း၊ လောင်းကစားဝိုင်းအား ဦးစီးခြင်း သို့မဟုတ် စီမံခန့်ခွဲခြင်း၊ ထိုသို့ပြုလုပ်ရန် မိမိပိုင်ဆိုင်သော အဆောက်အအုံ သို့မဟုတ် နေရာအား ခွင့်ပြုခြင်းများ မပြုလုပ်ရ။
‎🔶 ပြစ်ဒဏ်: အနည်းဆုံး ထောင်ဒဏ် (၁) နှစ်မှ အများဆုံး (၃) နှစ်အထိ ဖြစ်စေ၊ ငွေဒဏ် အနည်းဆုံး ကျပ် ၅ သိန်းမှ အများဆုံး ၁၀ သိန်းအထိ ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည်။
‎ပုဒ်မ-၁၇။ မည်သူမဆို-
‎(က) ပုဒ်မ ၁၀ ပါ ပြဋ္ဌာန်းချက်တစ်ရပ်ရပ်ကိုကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို အနည်းဆုံးတစ်နှစ်မှ အများဆုံးသုံးနှစ်အထိ ထောင်ဒဏ်ချမှတ်ရမည့်အပြင် အနည်းဆုံး ကျပ်တစ်သိန်းမှ အများဆုံး ကျပ်ငါးသိန်းအထိ ငွေဒဏ်လည်းချမှတ်နိုင်သည်။ ထို့ပြင် ပြစ်မှုနှင့်အကျုံးဝင်သော သက်သေခံ ပစ္စည်းနှင့်ငွေကို ပြည်သူ့ဘဏ္ဍာအဖြစ် သိမ်းဆည်းခြင်းခံရမည်။
‎(ခ) ပုဒ်မ ၁၀ ပါ ပြဋ္ဌာန်းချက်တစ်ရပ်ရပ်ကို ထပ်မံကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို အနည်းဆုံးသုံးနှစ်မှ အများဆုံးငါးနှစ်အထိ ထောင်ဒဏ်ချမှတ်ရမည့်အပြင် အနည်းဆုံး ကျပ် ငါးသိန်းမှ အများဆုံး ကျပ်တစ်ဆယ်သိန်းအထိ ငွေဒဏ်လည်းချမှတ်နိုင်သည်။ ထို့ပြင် ပြစ်မှုနှင့်အကျုံး ဝင်သော သက်သေခံပစ္စည်းနှင့်ငွေကို ပြည်သူ့ဘဏ္ဍာအဖြစ် သိမ်းဆည်းခြင်းခံရမည်။
‎
‎၁၀။ မည်သူမျှ-
‎(က) လောင်းကစားအိမ်ဖွင့်လှစ်ခြင်း၊ တည်ထောင်ခြင်း၊ စီမံခန့်ခွဲခြင်း သို့မဟုတ် ထိုသို့ဆောင်ရွက်ခြင်းကို တစ်နည်းနည်းဖြင့် အားပေးကူညီခြင်းမပြုရ၊
‎(ခ) လက်ဝယ်ရှိသော သို့မဟုတ် အသုံးပြုခွင့်ရသော အိမ်၊ အဆောက်အအုံ၊ ကာရံထားသောနေရာ၊ ဝင်း၊ ခြံ၊ အခန်း၊ ယာဉ်တစ်ခုခုကို
‎လောင်းကစားအိမ်အဖြစ် ဖွင့်လှစ်ရန်၊ တည်ထောင်ရန် သို့မဟုတ် အသုံးပြုရန် ခွင့်မပြုရ။
‎
‎
‎
‎🛑 လောင်းကစားကို ကိုယ်တိုင်ပြုလုပ်ခြင်း
‎ဤပုဒ်မ-၁၈ သည် လောင်းကစားဝိုင်းအတွင်း ကိုယ်တိုင်ပါဝင် ကစားသူများ သို့မဟုတ်
‎ လောင်းကစားပြုလုပ်နေသည့် နေရာတွင် ရှိနေသူများကို ရည်ညွှန်းသည်။
‎🔶 ပြစ်မှု: မည်သူမဆို လောင်းကစားဝိုင်းတွင် ပါဝင်ကစားခြင်း သို့မဟုတ် ကစားရန် ရည်ရွယ်ချက်ဖြင့် ရောက်ရှိနေခြင်း မပြုလုပ်ရ။
‎🔶ပြစ်ဒဏ်: အနည်းဆုံး ထောင်ဒဏ် (၆) လမှ အများဆုံး (၁) နှစ်အထိ ဖြစ်စေ၊ ငွေဒဏ် အနည်းဆုံး ကျပ် ၁ သိန်းမှ အများဆုံး ၅ သိန်းအထိ ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည်။
‎ဤပုဒ်မသည် လောင်းကစားပြုလုပ်နေစဉ် ဖမ်းဆီးခံရသူများအတွက် အများဆုံး အသုံးပြုသည့် ပုဒ်မဖြစ်သည်။
‎
‎ပုဒ်မ-၁၈။ မည်သူမဆို-
‎(က) ပုဒ်မ ၁၁ ပါ ပြဋ္ဌာန်းချက်တစ်ရပ်ရပ်ကို ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို အနည်းဆုံးတစ်နှစ်မှ
‎အများဆုံးသုံးနှစ်အထိ ထောင်ဒဏ်ချမှတ်ရမည့်အပြင် အနည်းဆုံး ကျပ် တစ်သိန်းမှ အများဆုံး ကျပ်ငါးသိန်းအထိ ငွေဒဏ်လည်းချမှတ်နိုင်သည်။ ထို့ပြင် ပြစ်မှုနှင့်အကျုံးဝင်သော သက်သေခံပစ္စည်းနှင့်ငွေကို ပြည်သူ့ဘဏ္ဍာအဖြစ် သိမ်းဆည်းခြင်းခံရမည်။
‎(ခ) ပုဒ်မ ၁၁ ပါ ပြဋ္ဌာန်းချက်တစ်ရပ်ရပ်ကို ထပ်မံကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို အနည်းဆုံးသုံးနှစ်မှ အများဆုံးငါးနှစ်အထိ ထောင်ဒဏ်ချမှတ်ရမည့်အပြင်
‎အနည်းဆုံး ကျပ် ငါးသိန်းမှ အများဆုံး ကျပ်တစ်ဆယ်သိန်းအထိ ငွေဒဏ်လည်းချမှတ်နိုင်သည်။ ထို့ပြင် ပြစ်မှုနှင့်အကျုံး ဝင်သော သက်သေခံပစ္စည်းနှင့်ငွေကို ပြည်သူ့ဘဏ္ဍာအဖြစ် သိမ်းဆည်းခြင်းခံရမည်။
‎ပုဒ်မ-၁၁။ မည်သူမျှ ခွင့်ပြုချက်မရှိဘဲ အောက်ပါတို့ကို မပြုရ-
‎(က) ထီ သို့မဟုတ် ထီကဲ့သို့သော အခြားကံစမ်းကစားနည်းတစ်ခုခုကို ဖွင့်လှစ်ခြင်း၊ စီမံခန့်ခွဲခြင်း၊ လောင်းကြေးလက်ခံခြင်း၊
‎ဒိုင်အဖြစ်ဆောင်ရွက်ခြင်း၊ ငွေကြေးအကျိုးအမြတ်ရယူခြင်း သို့မဟုတ် ထိုသို့ ဆောင်ရွက်ခြင်းကို တစ်နည်းနည်းဖြင့် အားပေးကူညီခြင်း၊
‎
‎
‎🛑 အများပြည်သူနှင့် သက်ဆိုင်သော နေရာတွင် လောင်းကစားခြင်း
ပုဒ်မ-၁၉သည်မူ လမ်းပေါ်တွင် သို့မဟုတ် အများပြည်သူ သွားလာရာ နေရာများတွင် လောင်းကစားခြင်းကို တားမြစ်ခြင်းအတွက်ဖြစ်ပါသည်။
‎
‎🔶 ပြစ်မှု: မည်သူမဆို အများပြည်သူနှင့် သက်ဆိုင်သော နေရာတွင် လောင်းကစားခြင်း၊ တိရစ္ဆာန်များကို တိုက်ခိုက်စေခြင်းဖြင့် လောင်းကစားခြင်း (ဥပမာ- ကြက်တိုက်ခြင်း) များ ပြုလုပ်ခြင်းကို တားမြစ်သည်။
‎
‎🔶 ပြစ်ဒဏ်: အနည်းဆုံး ထောင်ဒဏ် (၆) လမှ အများဆုံး (၁) နှစ်အထိ ဖြစ်စေ၊ ငွေဒဏ် အနည်းဆုံး ကျပ် ၁ သိန်းမှ အများဆုံး ၅ သိန်းအထိ ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ခံရမည်ဖြစ်သည်။
‎
‎ပုဒ်မ-၁၉ တွင် မည်သူမဆို-
‎(က) ပုဒ်မ ၁၂ သို့မဟုတ် ပုဒ်မ ၁၃ ပါပြဋ္ဌာန်းချက်တစ်ရပ်ရပ်ကို ကျူးလွန်ကြောင်း ပြစ်မှုထင်ရှား စီရင်ခြင်းခံရလျှင် ထိုသူကို အနည်းဆုံးခြောက်လမှ အများဆုံးတစ်နှစ်အထိ
‎ထောင်ဒဏ်ချမှတ်ရမည့် အပြင် အနည်းဆုံး ကျပ်ငါးသောင်းမှ အများဆုံး ကျပ်တစ်သိန်းအထိ ငွေဒဏ်လည်းချမှတ်နိုင်သည်။
‎ထို့ပြင် ပြစ်မှုနှင့်အကျုံးဝင်သော သက်သေခံပစ္စည်းနှင့်ငွေကို ပြည်သူ့ဘဏ္ဍာအဖြစ် သိမ်းဆည်းခြင်း ခံရမည်။
‎
‎(ခ) ပုဒ်မ ၁၂ သို့မဟုတ် ပုဒ်မ ၁၃ ပါပြဋ္ဌာန်းချက်တစ်ရပ်ရပ်ကို ထပ်မံကျူးလွန်ကြောင်း ပြစ်မှုထင်ရှား စီရင်ခြင်းခံရလျှင်
‎ထိုသူကို အနည်းဆုံးတစ်နှစ်မှ အများဆုံးသုံးနှစ်အထိ ထောင်ဒဏ်ချမှတ်ရမည့်အပြင် အနည်းဆုံး ကျပ်တစ်သိန်းမှ အများဆုံး ကျပ်ငါးသိန်းအထိ
‎ငွေဒဏ်လည်းချမှတ်နိုင်သည်။ ထို့ပြင် ပြစ်မှုနှင့် အကျုံးဝင်သော သက်သေခံပစ္စည်းနှင့်ငွေကို ပြည်သူ့ဘဏ္ဍာအဖြစ် သိမ်းဆည်းခြင်းခံရမည်။
‎
‎ပုဒ်မ-၁၂: မည်သူမျှ ပုဒ်မ ၁၁ ပါ ကစားနည်းတစ်မျိုးမျိုးတွင် ပါဝင်လောင်းကစားခြင်း မပြုရ
‎
‎ပုဒ်မ-၁၃: မြန်မာနိုင်ငံသားမည်သူမျှ ကာစီနိုအတွင်း ဝင်ရောက်လောင်းကစားခြင်း မပြုရ။
‎
‎🛑 Lottery နှင့် အခြားလောင်းကစားများ
‎ဤ တွင် ပုဒ်မ-၂၀သည် အစိုးရက ခွင့်ပြုထားခြင်းမရှိသော ထီလုပ်ငန်း သို့မဟုတ် အလားတူ လောင်းကစားနည်းများကို အရေးယူရန်ဖြစ်ပါသည်။
‎
‎🔶 ပြစ်မှု: မည်သူမဆို ခွင့်ပြုချက်မရှိဘဲ ထီဖွင့်ခြင်း၊ ထီလက်မှတ်ရောင်းချခြင်း၊ ထီစာရင်းပြုလုပ်ခြင်း သို့မဟုတ် ထိုသို့သော လုပ်ငန်းများတွင် ပါဝင်ကူညီခြင်း မပြုလုပ်ရ။ (ဥပမာ- ၂ လုံး၊ ၃ လုံး နှင့် ဘောလုံးလောင်းကစားခြင်းများ ဤပုဒ်မအောက်တွင် အကျုံးဝင်သည်)။
‎
‎🔶 ပြစ်ဒဏ်: အနည်းဆုံး ထောင်ဒဏ် (၁) နှစ်မှ အများဆုံး (၃) နှစ်အထိ ဖြစ်စေ၊ ငွေဒဏ် အနည်းဆုံး ကျပ် ၅ သိန်းမှ အများဆုံး ၁၀ သိန်းအထိ ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည်။
‎
‎ပုဒ်မ-၂၀၏ အဓိပ္ပါယ်ဖွင့်ဆိုချက်မှာ
‎မည်သူမဆို-
‎(က) ပုဒ်မ ၁၄ ပါ ပြဋ္ဌာန်းချက်ကို ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို အနည်းဆုံးတစ်နှစ်မှ အများဆုံးသုံးနှစ်အထိ ထောင်ဒဏ်ချမှတ်ရမည့်အပြင် အနည်းဆုံး ကျပ်တစ်သိန်းမှ အများဆုံး ကျပ်ငါးသိန်းအထိ ငွေဒဏ်လည်းချမှတ်နိုင်သည်။ ထို့ပြင် ပြစ်မှုနှင့်အကျုံးဝင်သောငွေကို ပြည်သူ့ဘဏ္ဍာအဖြစ် သိမ်းဆည်းခြင်းခံရမည်။
‎(ခ) ပုဒ်မ ၁၄ ပါ ပြဋ္ဌာန်းချက်ကို ထပ်မံကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို အနည်းဆုံးသုံးနှစ်မှ အများဆုံးငါးနှစ်အထိ ထောင်ဒဏ်ချမှတ်ရမည့်အပြင် အနည်းဆုံး ကျပ်ငါးသိန်းမှ အများဆုံး ကျပ်တစ်ဆယ်သိန်းအထိ ငွေဒဏ်လည်းချမှတ်နိုင်သည်။ ထို့ပြင် ပြစ်မှုနှင့်အကျုံးဝင်သော ငွေကို ပြည်သူ့ဘဏ္ဍာအဖြစ် သိမ်းဆည်းခြင်းခံရမည်။
‎ပုဒ်မ- ၁၄ :မည်သူမျှ လောင်းကစားရန် ငွေချေးခြင်း သို့မဟုတ် ငွေကြေးထောက်ပံ့ခြင်း မပြုရ။
‎
‎ #လောင်းကစား #ဥပဒေ
‎

06/04/2026

လူကုန်ကူးမှုတားဆီးနှိမ်နင်းရေး‌ဥပဒေ အပိုင်း(၂)

🔷 ယခင်အပတ်က လူကုန်ကူးမှုဆိုတာ ဘာလဲ၊ ခေါင်းပုံဖြတ်တယ်ဆိုတာက ဘယ်လိုမျိုးတွေလဲ သိရှိသွားပြီဆိုတော့ ပြစ်မှုနဲ့ပြစ်ဒဏ်တွေ‌အကြောင်း ဖော်ပြပေးပါမယ်။

လူကုန်ကူးမှုဆိုတာ လူကုန်ကူးခံရသူရဲ့ သဘောတူညီချက်ရှိရှိ၊ မရှိရှိ ဒီဥပဒေရဲ့သတ်မှတ်ချက်တွေနဲ့ ကိုက်ညီတယ်ဆိုရင် လူကုန်ကူးခံရသူ (သို့) လူကုန်ကူးမှုမြောက်တယ်လို့ သတ်မှတ်မှာပါ။

လူတစ်ယောက်ကို အဓမ္မခိုင်းစေတယ်၊ ပြည့်တန်ဆာလုပ်‌ခိုင်းတယ်၊ အတင်းလက်ထပ်ခိုင်းတယ်၊ လမ်းတွေမှာ တောင်းရမ်းခိုင်းတယ်၊ ကိုယ်ဝန်အဌားဆောင်ခိုင်းတယ် စတဲ့ ကိစ္စတွေ ပြုလုပ်ခိုင်းပြီး ‌ခေါင်းပုံဖြတ်တယ်။ ထိုလူတစ်ယောက်ဆိုတာက အမျိုးသမီး (သို့) ကလေး(၁၈ နှစ်အောက်)ဖြစ်တယ် ဆိုရင် ဒီဥပဒေ ပုဒ်မ ၃၅ အရ အရေးယူခံရမှာပါ။ ဒါ့အပြင် ထိုသူတွေကို လူကုန်ကူးသူဟာ တစ်ယောက်မကဘဲ လူသုံးဦးနှင့်အထက် စနစ်တကျဖွဲ့စည်းထားတဲ့ ဂိုဏ်းဖြစ်တယ်ဆိုရင် ပုဒ်မ ၃၈(က)အရ အရေးယူခံရမှာပါ။

📌 ပုဒ်မ ၃၅

"မည်သူမဆို အမျိုးသမီးနှင့် ကလေးသူငယ်များအား လူကုန်ကူးမှု ကျူးလွန်ကြောင်း ပြစ်မှုထင်ရှား စီရင်ခြင်းခံရလျှင် ထိုသူကို အနည်းဆုံး ထောင်ဒဏ်တစ်ဆယ်နှစ်မှ အများဆုံး ထောင်ဒဏ်တစ်သက်အထိ ချမှတ်ရမည့်အပြင် ငွေဒဏ်လည်း ချမှတ်နိုင်သည်။"

📌 ပုဒ်မ ၃၈ (က)

"မည်သူမဆို ပုဒ်မ ၃၅ ပါ လူကုန်ကူးမှုကို ဂိုဏ်းဖွဲ့မှုခင်းကျူးလွန်သူ အုပ်စုဖြင့် ကျူးလွန်ကြောင်း ပြစ်မှုထင်ရှား စီရင်ခြင်းခံရလျှင် ပြစ်မှုကျူးလွန်ရာတွင် ကိုယ်တိုင်ပါဝင်သည်ဖြစ်စေ၊ မပါဝင်သည်ဖြစ်စေ ယင်းအုပ်စုဝင် တစ်ဦးချင်းကို အနည်းဆုံး ထောင်ဒဏ် နှစ် ၂၀ မှ အများဆုံး ထောင်ဒဏ်တစ်သက်အထိ ချမှတ်ရမည့် အပြင် ငွေဒဏ်လည်း ချမှတ်နိုင်သည်။"လို့ ပြဌာန်းထားပါတယ်။

🔷 အကယ်၍ ခေါင်းပုံဖြတ်ခံရတဲ့လူဟာ အမျိုးသားဖြစ်တယ်။ ဒါ့အပြင် အထက်ကလိုပဲ ဂိုဏ်းဖွဲ့ကျူးလွန်ခံရတယ်ဆိုရင် ပုဒ်မ ၃၆ နဲ့ ပုဒ်မ ၃၈ (ခ) အရ အရေးယူခံရမှာပါ။

📌 ပုဒ်မ ၃၆

"မည်သူမဆို အမျိုးသမီးနှင့် ကလေးသူငယ်များမှအပ အခြားသူတစ်ဦးဦးကို လူကုန်ကူးမှုကျူးလွန် ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို အနည်းဆုံး ငါးနှစ်မှ အများဆုံးတစ်ဆယ်နှစ်အထိ ထောင်ဒဏ်ချမှတ်ရမည့်အပြင် ငွေဒဏ်လည်းချမှတ်နိုင်သည်။"

📌 ပုဒ်မ ၃၈ (ခ)

"မည်သူမဆို ပုဒ်မ ၃၆ ပါ လူကုန်ကူးမှုကို ဂိုဏ်းဖွဲ့မှုခင်း ကျူးလွန်သူ အုပ်စုဖြင့် ကျူးလွန်ကြောင်း ပြစ်မှုထင်ရှား စီရင်ခြင်းခံရလျှင် ပြစ်မှုကျူးလွန်ရာတွင် ကိုယ်တိုင်ပါဝင်သည်ဖြစ်စေ၊ မပါဝင်သည်ဖြစ်စေ ယင်းအုပ်စုဝင် တစ်ဦးချင်းကို အနည်းဆုံး တစ်ဆယ်နှစ်မှ အများဆုံး နှစ် ၂၀ အထိ ထောင်ဒဏ် ချမှတ်ရမည့်အပြင် ငွေဒဏ်လည်း ချမှတ်နိုင်သည်။"

🔷 ဒီထက်မကဘဲ လူကုန်ကူးသူဟာ လူကုန်ကူးရင်း

ကြီးလေးတဲ့ပြစ်မှုတစ်ခုခု (ထောင်ဒဏ် ၄ နှစ်နဲ့အထက် ချခံရနိုင်တဲ့ပြစ်မှု) ကိုပါ ကျူးလွန်ရင် ပုဒ်မ ၃၉ အရ အရေးယူခံရမှာပါ။

ကြီးလေးတဲ့ပြစ်မှုဆိုတာ ဥပမာ - လူသေမှု၊ လူသတ်မှု၊ မုဒိန်းမှု၊ အပြင်းအထန်နာကျင်စေမှု စတဲ့ အမှုတွေပါ။ တည်ဆဲဥပဒေအရလို့ဆိုတဲ့အတွက် တခြားပြစ်မှုများ အများကြီးရှိပါသေးတယ်။

📌 ပုဒ်မ ၃၉

"မည်သူမဆို လူကုန်ကူးမှုကို ကျူးလွန်ရာတွင်-
(က) ကြီးလေးသော ပြစ်မှုတစ်ခုခုကိုပါ ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို ထောင်ဒဏ် တစ်သက်အထိ ချမှတ်ရမည်။

(ခ) လူကုန်ကူးခံရသူအား သေဆုံးစေခြင်း သို့မဟုတ် သူတစ်ပါး၏ အကူအညီကို အမြဲတမ်းရယူရသည့် မသန်စွမ်းခြင်းဖြစ်စေသည်အထိ ကျူးလွန်ကြောင်း ပြစ်မှုထင်ရှားစီရင်ခြင်းခံရပါက ထိုသူကို သေဒဏ် ချမှတ်ရမည်။" လို့ ပြဌာန်းထားပါတယ်။

ယနေ့ လမ်းပေါ်မှာ၊ မီးပွိုင့်တွေမှာ တောင်းရမ်းနေတဲ့ကလေးတွေ၊ လူပျောက်မှုတွေ၊ ကလေးမွေးစားတာတွေ၊ ဘယ်သူ့မယားလို့ အမည်တွင်နေတာတွေ၊ ပြည်ပမှာ အကြောင်းအမျိုးမျိုးကြောင့် ခေါင်းပုံဖြတ်ခံနေရသူတွေ အကြောင်း ကြားနေရတဲ့သတင်းတွေကို သေချာဆန်းစစ်ဖို့လိုပါတယ်။

ကဲ ဒါဆိုရင် လူကုန်ကူးမှုတားဆီးနှိမ်နင်းရေး‌ဥပဒေရဲ့ ပြစ်မှု၊ ပြစ်ဒဏ်တွေကို သိရှိသွားလိမ့်မယ်လို့ထင်ပါတယ်။ နောက်အပတ်မှာ ဆက်လက်ဖော်ပြပေးသွားပါဦးမယ်။

31/03/2026

လူကုန်ကူးမှုတားဆီးနှိမ်နင်းရေး‌ဥပဒေ အပိုင်း(၁)

လူကုန်ကူးမှုတားဆီးကာကွယ်ရေး‌ဥပဒေကို (၁၃.၉.၂၀၀၅) ရက်နေ့မှာ စတင်ပြဌာန်းခဲ့ပါတယ်။ (၁၆.၆.၂၀၂၂) ရက်‌နေ့ မှာတော့ အထက်ပါဥပဒေကို ရုပ်သိမ်းကာ လူကုန်ကူးမှုတားဆီးနှိမ်နင်းရေး‌ဥပဒေကို အတည်ပြုပြဌာန်းခဲ့ပါတယ်။ လူကုန်ကူးမှုဆိုတာ ဘာလဲ မသိရ‌ခင် လူကုန်ကူးမှုတားဆီးနှိမ်နင်းရေး‌ဥပဒေ ပုဒ်မ ၂ မှာ ဒီဥပဒေရဲ့ စီရင်ပိုင်ခွင့်နဲ့ပတ်သက်ပြီး ဘာတွေ ပြဌာန်းထားသလဲ ကြည့်ရအောင်ပါ။

📌 ပုဒ်မ ၂ -
"အောက်ပါ ကျူးလွန်မှုတစ်ရပ်ရပ်နှင့် သက်ဆိုင်သော လူကုန်ကူးမှုနှင့်စပ်လျဉ်း၍ ဤဥပဒေအရ စီရင်ပိုင်ခွင့် ရှိစေရမည်-

(က) မည်သူမဆို နိုင်ငံတော်အတွင်း ကျူးလွန်မှု၊

(ခ) မည်သူမဆို နိုင်ငံတော်၏တည်ဆဲဥပဒေအရ မှတ်ပုံတင်ထားသော ရေယာဉ် သို့မဟုတ် လေယာဉ် တစ်ခုခုပေါ်တွင် ကျူးလွန်မှု၊

(ဂ) မြန်မာနိုင်ငံသားကဖြစ်စေ၊ နိုင်ငံတော်တွင် အမြဲတမ်းနေထိုင်ပြီး နိုင်ငံခြားသား မှတ်ပုံတင် ကိုင်ဆောင်ထားသူကဖြစ်စေ၊ နိုင်ငံတော်တွင် အမြဲတမ်းနေထိုင်ခွင့် ရရှိထားသည့် နိုင်ငံခြားသားကဖြစ်စေ ပြည်ပတွင်ကျူးလွန်မှု၊

(ဃ) ပုဒ်မခွဲ (ဂ) ပါ မြန်မာနိုင်ငံသား သို့မဟုတ် နိုင်ငံခြားသားအပေါ် ပြည်ပတွင်ကျူးလွန်မှု၊

(င) နိုင်ငံတော်အတွင်းသို့ ရောက်ရှိနေပြီး လူကုန်ကူးမှုကျူးလွန်သည်ဟု စွပ်စွဲခြင်းခံရသူအား သက်ဆိုင်ရာပြည်ပနိုင်ငံသို့ တရားခံလွှဲပြောင်းပေးရန် တောင်းဆိုချက်ကို ခွင့်မပြုသည့်အခါ ထိုသူက ကျူးလွန်ခဲ့မှု။" လို့ ပြဌာန်းထားပါတယ်။

🔷 ဆိုတော့ .....ပုဒ်မ ၂(ဂ) အရ မြန်မာနိုင်ငံသား (သို့) မြန်မာမှာ အမြဲနေထိုင်သော်လည်း နိုင်ငံခြားသားမှတ်ပုံတင် ကိုင်‌ဆောင်ထားသူ (သို့) မြန်မာမှာ အမြဲနေထိုင်ခွင့်ရထားတဲ့ နိုင်ငံခြားသားက ပြည်ပတွင် ကျူးလွန်လျှင်သော်လည်းကောင်း၊ ထိုသူတွေအပေါ် မြန်မာနိုင်ငံသား (သို့) နိုင်ငံခြားသားက ပြည်ပတွင် ကျူးလွန်ခဲ့လျှင်သော်လည်းကောင်း ဒီဥပဒေ အရ အရေးယူခံရမှာ ဖြစ်ပါတယ်။

🔷 နောက်တစ်ခုက လူကုန်ကူးသူလို့ စွပ်စွဲခံရသူဟာ မြန်မာနိုင်ငံထဲရောက်နေပြီး သက်ဆိုင်ရာနိုင်ငံက တရားခံလွှဲပြောင်းပေးဖို့ တောင်းဆိုချက်ကို ခွင့်မပြုတဲ့အခါ ထိုသူကို ဒီနိုင်ငံတွင်းမှာပဲ စီရင်ပိုင်ခွင့်ရှိမှာပါ။

📢📢 ဒါဆို လူကုန်ကူးမှု ဆိုတာဘာလဲ??

📌 ပုဒ်မ ၃ (ခ) -
"လူကုန်ကူးမှု ဆိုသည်မှာ ပုဂ္ဂိုလ်တစ်ဦးဦးသည် အခြားပုဂ္ဂိုလ်တစ်ဦးဦးကို ထိုသူ၏ သဘောတူညီချက် ရှိသည်ဖြစ်စေ၊ မရှိသည်ဖြစ်စေ ခေါင်းပုံဖြတ်မှုပြုရန်အလို့ငှာ အောက်ပါနည်းလမ်းတစ်ရပ်ရပ်ကို အသုံးပြု၍ ထိုသူကို သိမ်းသွင်းစုဆောင်းခြင်း၊ သယ်ယူပို့ဆောင်ခြင်း၊ လွှဲပြောင်းခြင်း၊ ရောင်းချခြင်း၊ ဝယ်ယူခြင်း၊ ငှားရမ်းခြင်း၊ ငှားယူခြင်း၊ ခိုလှုံခွင့်ပေးခြင်း သို့မဟုတ် လက်ခံခြင်းကိုဆိုသည်-

(၁) ခြိမ်းခြောက်ခြင်း၊ အင်အားသုံးခြင်း သို့မဟုတ် အခြားနည်းဖြင့် အနိုင်အထက်ပြုခြင်း၊

(၂) သွေးဆောင်ခေါ်ယူခြင်း၊

(၃) လိမ်လည်ခြင်း၊

(၄) လှည့်ဖြားခြင်း၊

(၅) လုပ်ပိုင်ခွင့် သို့မဟုတ် အခွင့်အာဏာကို အလွဲသုံးစားပြုခြင်း၊

(၆) ဘဝရပ်တည်ရန် ခက်ခဲနေသော အခြေအနေကို အခွင့်ကောင်းယူ၍ အလွဲသုံးစားပြုခြင်း၊

(၇) ထိုသူအပေါ် ချုပ်ကိုင်နိုင်သူ သို့မဟုတ် တစ်နည်းနည်းလွှမ်းမိုးနိုင်သူ၏ သဘောတူညီချက်ရရှိရန် ငွေကြေး၊ ပစ္စည်း သို့မဟုတ် အခြားအကျိုးအမြတ် တစ်စုံတစ်ရာကိုပေးခြင်း သို့မဟုတ် လက်ခံရယူခြင်း။

ခြွင်းချက်။ ပုဒ်မခွဲ (ခ) ပါ နည်းလမ်းတစ်ရပ်ရပ်နှင့် အကျုံးဝင် သက်ဆိုင်ခြင်းရှိသည်ဖြစ်စေ၊ မရှိသည် ဖြစ်စေ ကလေးသူငယ်အား ခေါင်းပုံဖြတ်မှုတစ်ခုခုပြုလုပ်ရာတွင် သိမ်းသွင်းစုဆောင်းခြင်း၊ သယ်ယူ ပို့ဆောင်ခြင်း၊ လွှဲပြောင်းခြင်း၊ ရောင်းချခြင်း၊ ဝယ်ယူခြင်း၊ ငှားရမ်းခြင်း၊ ငှားယူခြင်း၊ ခိုလှုံခွင့်ပေးခြင်း သို့မဟုတ် လက်ခံခြင်း ပြုလုပ်ပါက လူကုန်ကူးမှုကျူးလွန်သည်ဟု မှတ်ယူရမည်။"လို့ ပြဌာန်းထားပါတယ်။

🔷 အထက်ပါ ပုဒ်မအရ လူတစ်ယောက်က အခြားလူတစ်ယောက်ကို ထိုလူရဲ့ သဘောတူညီချက်ရှိရှိ၊ မရှိရှိ ခေါင်းပုံဖြတ်ဖို့အတွက် ခြိမ်းခြောက်၊ သွေးဆောင်တယ်၊ လိမ်လည်၊ လှည့်ဖြားတယ် စတဲ့ နည်းလမ်းတွေနဲ့ လူတွေ ကို စုဆောင်း၊ သယ်ယူတယ်၊ ရောင်းချ၊ ဝယ်ယူတယ်၊ ဌားတယ်၊ ဌားယူတယ်၊ ခိုလှုံခွင့်ပေးတယ်၊ လက်ခံထားတယ်ဆိုရင် လူကုန်ကူးမှုမြောက်ပါတယ်။

🔷 ဒီပုဒ်မရဲ့ ခြွင်းချက်အရ ကလေးတစ်ယောက် (အသက် ၁၈ နှစ် မပြည့်သေးသူ) ကို ခေါင်းပုံဖြတ်ဖို့အတွက် စုဆောင်း၊ သယ်ယူတယ်၊ ရောင်းချ၊ ဝယ်ယူတယ်၊ ဌားရမ်းတယ်ဆိုရင် လူကုန်ကူးမှု ကျူးလွန်တယ်လို့ မှတ်ယူမှာပါ။

📢📢 ဒါဆို ခေါင်းပုံဖြတ်တယ်ဆိုတာကရော ဘာလဲ၊ ဘယ်လိုမျိုးတွေလဲ??

📌 ပုဒ်မ ၃ (ဂ) မှာ-
ပုဂ္ဂိုလ်တစ်ဦးဦးသည် အခြားပုဂ္ဂိုလ်တစ်ဦးဦးကို
-ပြည့်တန်ဆာအဖြစ် အဓမ္မပြုလုပ်စေခြင်း (သို့) အခြားတစ်နည်းနည်းဖြင့် ကာမဆိုင်ရာကိစ္စ အဓမ္မပြုလုပ်စေခြင်း၊
-အဓမ္မအလုပ်ခိုင်းစေခြင်း (သို့) အဓမ္မဝန်ဆောင်မှုပေးစေခြင်း၊
-ကျွန်ပြုခြင်း (သို့) ကျေးကျွန်ကဲ့သို့ ခိုင်းစေခြင်း၊
-ကြွေးမြီဖြင့်နှောင်ဖွဲ့ခိုင်းစေခြင်း၊
-အဓမ္မလက်ထပ်စေခြင်း၊
-အဓမ္မတောင်းရမ်း ခိုင်းစေခြင်း၊
-ကိုယ်ဝန်အငှားဆောင်စေခြင်း၊
-အကျိုးအမြတ်တစ်စုံတစ်ရာရရှိရန်အလို့ငှာ လိမ်လည် လှည့်ဖြား၍ ကလေးသူငယ်များအား မွေးစားခြင်း၊ -ခန္ဓာကိုယ်အင်္ဂါအစိတ်အပိုင်းအား ထုတ်ယူ ဖယ်ရှားခြင်း၊ ရောင်းချခြင်း (သို့) အခြားတစ်နည်းနည်းဖြင့် အလွဲသုံးစားပြုလုပ်ခြင်း .... စတဲ့
ရည်ရွယ်ချက်၊ နည်းလမ်းတွေနဲ့ ခေါင်းပုံဖြတ်ပြီး ရရှိလာတဲ့ ငွေကြေး၊ ပစ္စည်း (သို့) အခြားအကျိုးအမြတ် တစ်စုံတစ်ရာကို တိုက်ရိုက်ဖြစ်စေ၊ သွယ်ဝိုက်၍ဖြစ်စေ လက်ခံရယူခြင်း (သို့) လက်ခံရယူဖို့ သဘောတူခြင်းတွေပဲ ဖြစ်ပါတယ်။

ဒါဆိုရင် လူကုန်ကူးမှုတားဆီးနှိမ်နင်းရေး‌ဥပဒေရဲ့ စီရင်ပိုင်ခွင့်တွေ၊ လူကုန်ကူးမှုက ဘာလဲဆိုတာနဲ့ ခေါင်းပုံဖြတ်တာက ဘယ်လိုမျိုးလဲ ဆိုတာတွေ သိရှိသွားလိမ့်မယ်လို့ထင်ပါတယ်။ နောက်အပတ်မှာ ပြစ်မှု၊ ပြစ်ဒဏ်တွေအကြောင်း ဆက်လက်ဖော်ပြပေးသွားပါဦးမယ်။

28/03/2026

အယူခံလွှာတွင် ကပ်ရမည့် ရုံးခွန်တော် ကို မပေးဆောင်နိုင်လောက်အောင် ဆင်းရဲနွမ်းပါးသူများအတွက် ဥပဒေမှ တရားမကျင့်ထုံး အမိန့် ၄၄တွင် အခွင့်အရေးများပြဌာန်း ထားပါသည်

တရားရုံးတွင် အယူခံတက်လိုသော်လည်း အယူခံလွှာတွင် ကပ်ရမည့် ရုံးခွန်တော် ကို မပေးဆောင်နိုင်လောက်အောင် ဆင်းရဲနွမ်းပါးသူများအတွက် ဥပဒေမှ အခွင့်အရေးပေးထားသည်

တရားမကျင့်ထုံး အမိန့် ၄၄ နည်း ၁ တွင် အယူခံဝင်ခွင့်ရှိသူတစ်ဦးတစ်ယောက်သည် အယူခံလွှာအတွက်
လိုအပ်သောရုံးခွန်ကို မပေးဆောင်နိုင်လျှင်အယူခံလွှာနှင့်အတူ လျှောက်လွှာပူးတွဲတင်သွင်းနိုင်သည်။
ယင်း လျှောက်လွှာ တင်သွင်းခြင်းအပါအဝင် အကြောင်းအရာအားလုံးတွင် လူမွဲများကတရားစွဲဆိုသည့် အမှုများနှင့်
စပ်လျဉ်းသော ပြဌာန်းချက်များနှင့် သက်ဆိုင်နိုင်သမျှ ယင်းပြဌာန်းချက်များနှင့်အညီ ထိုသူကို လူမွဲအဖြစ် အယူခံဝင်ခွင့်ပြုနိုင်သည် ဟူ၍ ဖြစ်သည်။

အယူခံဝင်ခွင့်ရှိသူသည်
အယူခံလွှာအတွက် သတ်မှတ်ထားသော ရုံးခွန်တော်ခကို ပေးဆောင်နိုင်လောက်သည့် ပစ္စည်းဥစ္စာ မရှိသူပါက
လူမွဲအဖြစ် အယူံဝင်ခွင့်ပြုနိုင်ရန်လျှောက်ထားနိုင်သည်။
သို့ဖြစ်ရာ အယူခံ ဝင်ခွင့်မရှိသောအမိန့်နှင့်စပ်လျဉ်း၍ အမိန့်၄၄ နည်း၁အရ လျှောက်ထားခွင့်မရှိပေ ။
( အေအိုင်အာ ၁၉၃၆ လာဟိုး ၄၀၆ စီရင်ထုံးအရ )
ထိုသို့လျှောက်ထားရာတွင် ပုံမှန်အယူခံလွှာနှင့်အတူ မိမိ လူမွဲဖြစ်ကြောင်း ဖော်ပြသည့် လျှောက်လွှာကို ပူးတွဲတင်ပြရမည်။

လျှောက်ထားသူသည် အမှန်တကယ် ဆင်းရဲခြင်း ရှိ၊ မရှိကို တရားရုံးက စစ်ဆေးမည်ဖြစ်သည်။

အကယ်၍ မူလအမှု (Original Suit) အား ရင်ဆိုင်စဉ်ကလည်း လူမွဲအဖြစ် ခွင့်ပြုချက်ရခဲ့ပြီးဖြစ်ပါက၊
အယူခံအဆင့်တွင် ထပ်မံစစ်ဆေးရန် မလိုဘဲ ခွင့်ပြုလေ့ရှိသည်။

သို့သော် လျှောက်ထားသူ၏ ငွေကြေးအခြေအနေ ပြောင်းလဲသွားသည်ဟု ယူဆပါက တရားရုံးက ထပ်မံစစ်ဆေးနိုင်သည်။

အယူခံလွှာကို ဖတ်ရှုကြည့်သည့်အခါ အောက်ပါအချက်များတွေ့ရှိပါက တရားရုံးမှ လူမွဲအဖြစ် အယူခံဝင်ခွင့်ကို ငြင်းပယ်နိုင်သည် -
🎗️အယူခံဝင်သည့် အကြောင်းပြချက်သည် ဥပဒေနှင့် မညီညွတ်ခြင်း။
🎗️တရားမျှတမှု မရှိခြင်း။
🎗️အယူခံဝင်ရန် ခိုင်လုံသော အကြောင်းပြချက် မရှိခြင်း။

လူမွဲအဖြစ် အယူခံဝင်ခွင့်ရခြင်းသည် ရုံးခွန်တော်ခ (Court Fees) ကိုသာ ကင်းလွတ်ခွင့်ရခြင်းဖြစ်ပြီး၊
ကျန်ရှိသော တရားရုံးဆိုင်ရာ လုပ်ထုံးလုပ်နည်းများကိုမူ ပုံမှန်အတိုင်း လိုက်နာရမည် ဖြစ်ပါသည်။

လူမွဲအဖြစ်ခံယူခွင့်ပြုသည့်ကိစ္စသည် အမိန့်၃၃ နှင့် သက်ဆိုင်သည်။ သို့ဖြစ်ရာ အယူခံဝင်သည့်အကြောင်းအရာနှင့် ပတ်သတ်၍ အယူခံတရားလိုသည် သဘောတူညီမှုပြုလုပ်ထားလျှင် ဖြစ်စေ ၊
မိမိပိုင်ပစ္စည်းအရပ်ရပ်ကို လျှောက်လွှာ၌ သဘောရိုးဖြင့် ဖော်ပြထားခြင်းမပြုလျှင် လျှောက်လွှာပယ်ခြင်းခံရလိမ့်မည် ဖြစ်သည် ။
( အိန္ဒိယအမှုတွဲများ အတွဲ ၁၁၂ စာ ၈၃၁ နှင့် အေအိုင်အာ ၁၉၃၀ ပတ္တနာ ၃၆၈ စီရင်ထုံးများအရ )

#လူမွဲ #ဥပဒေပါအခွင့်အရေး #တရားမကျင့်ထုံး

26/03/2026

ယခုအပတ်မှာတော့ မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေ အရ ‌ရောင်းချရန် အလို့ငှာ လက်ဝယ်ထားခြင်း (ပုဒ်မ-၁၉(က)) နဲ့ ရောင်းချခြင်း(ပုဒ်မ-၂၀(က)) အ‌ကြောင်း ကွာခြားမှုကို မြင်သာအောင် စီရင်ထုံးနဲ့တကွ ဖော်ပြပေးချင်ပါတယ်။

ရောင်းတာက ရောင်းတာပဲ တူတူပဲမဟုတ်ဘူးလား၊ ဘာတွေ ကွာခြားသွားလို့လဲ.....စတဲ့မေးခွန်းတွေအတွက် အထက်ပါ ပုဒ်မတွေရဲ့ ပြစ်မှု၊ ပြစ်ဒဏ်က ကွာခြားလို့ပါပဲ။ ပုဒ်မ ၁၉(က) ရဲ့ပြစ်ဒဏ်က အနည်းဆုံး ထောင်ဒဏ် ၁၀ နှစ်ကနေ အများဆုံး ထောင်ဒဏ်တစ်သက်ထိဖြစ်ပြီး ပုဒ်မ ၂၀(က) ရဲ့ပြစ်ဒဏ်က‌ အနည်းဆုံး ထောင်ဒဏ် ၁၅ နှစ်ကနေ အများဆုံး ထောင်ဒဏ်တစ်သက်ထိဖြစ်စေ၊ သေဒဏ်ဖြစ်စေ ချမှတ်ရမည်ဆိုတဲ့အတွက်ကြောင့်ပါ။ အောက်ပါ စီရင်ထုံးကို မဖတ်ခင် ၎င်းနဲ့သက်ဆိုင်တဲ့ပုဒ်မတွေကို အတိုချုံးပြောရရင်-

ပုဒ်မ-၁၉(က) : ရောင်းချရန်အလို့ငှာ လက်ဝယ်ထားခြင်း၊ သယ်ယူပို့ဆောင်ခြင်း၊ ထပ်ဆင့်ပေးပို့ခြင်း၊ လွှဲပြောင်းခြင်း၊

ပုဒ်မ-၂၀(က) : ထုတ်လုပ်ခြင်း၊ ဖြန့်ဖြူးခြင်း၊ ရောင်းချခြင်း၊

ပုဒ်မ -၂၁ : အားပေးကူညီမှု တို့ပဲဖြစ်ပါတယ်။

📌စီရင်ထုံးအကျဥ်းချုပ်

မင်းသူကျော် နှင့် ပြည်ထောင်စုသမ္မတမြန်မာနိုင်ငံတော် (၂၀၁၉ ခုနှစ်၊ မတစ၊ စာ - ၁၀၁)

ဒက္ခိဏခရိုင်တရားရုံးက တရားခံ မင်းသူကျော်အား မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာဥပဒေပုဒ်မ ၁၉ (က)/၂၁ အရ ထောင်ဒဏ် ၁၀ နှစ်၊ ပုဒ်မ ၂၀ (က)/၂၁ အရ ထောင်ဒဏ် ၁၅ နှစ် ကျခံစေရန်၊ ပြစ်ဒဏ်များကို သီးခြားစီ ကျခံစေရန် အမိန့်ချမှတ်ခဲ့ပါတယ်။
ယင်းအမိန့်ကို တရားခံမင်းသူကျော်က မန္တလေးတိုင်းဒေသကြီး တရားလွှတ်တော်သို့ လည်းကောင်း၊ ပြည်ထောင်စု တရားလွှတ်တော်ချုပ်သို့ လည်းကောင်း အဆင့်ဆင့်တင်သွင်းလျှောက်ထားရာ ပလပ်ခံရသဖြင့် အထူးအယူခံဝင်ခွင့်ရရှိရန် ပြည်ထောင်စု တရားလွှတ်တော်ချုပ်သို့ ရာဇဝတ်အထွေထွေလျှောက်လွှာ (အထူး) အမှတ်-၂ ကို ဆက်လက်တင်သွင်းလျှောက်ထားရာ အောက်ပါပြဿနာအား ကြားနာဆုံးဖြတ်ရန် အထူးအယူခံဝင်ခွင့်ပြုခဲ့သည်။
အမှုမှာ မူးယစ်ဆေးဝါး ဖြန့်ဖြူးရောင်းချနေကြောင်း သတင်းအရ ဒေါ်လှမြင့်၏ နေအိမ်ကိုရှာဖွေရာ ဒေါ်လှမြင့်နှင့်အတူ ၎င်း၏သား အောင်ဇော်ဖြိုး၊ ငြိမ်းချမ်း၊ မင်းသူကျော် တို့ကို တွေ့ရသည့်အပြင် တရားခံ ဒေါ်လှမြင့်နဲ့ တရားခံ အောင်ဇော်ဖြိုးတို့ရဲ့ ယင်းနေအိမ်မှာ ဘိန်းဖြူအမှုန့် ၁၂.၁၂ ဂရမ်၊ စိတ်ကြွရူးသွပ်ဆေးပြား ၇၀ ပြား (အလေးချိန် ၆.၅ ဂရမ်ခန့်)၊ ဆေးခြောက် ၃၅.၀၁ ဂရမ်တို့ကို‌ ရှာတွေ့ခဲ့ပြီး ၎င်းတို့နှစ်ဦးလုံးက မူးယစ်ဆေးဝါး သုံးစွဲသူများဖြစ်တယ်။ တရားခံ မင်းသူကျော်ကတော့ မူးယစ်ဆေးဝါးသုံးစွဲခြင်းမရှိကြောင်း ဆေးစာနှင့် ဓာတုဗေဒပြန်ကြားစာအရ ပေါ်ပေါက်ထားပါတယ်။
တရားခံ မင်းသူကျော်ကို ဘိန်းဖြူ ထိုးသွင်းရာတွင် အသုံးပြုသည့်အပ်တပ်လျက် ပလပ်စတစ်ဆေးထိုးပိုက် ၂ ချောင်းတွေ့ရှိ၍ ဖမ်းဆီးခဲ့ခြင်းဖြစ်ပြီး မူးယစ်ဆေးဝါးများကို တရားခံအောင်ဇော်ဖြိုးမှ လက်ဝယ်ထားခြင်း၊ ရောင်းချခြင်းဖြစ်ကြောင်းသုံးသပ်လျက် တရားခံမင်းသူကျော်က တရားခံအောင်ဇော်ဖြိုးနှင့် ပူးပေါင်းကြံစည်ကြောင်း၊ အားပေးကူညီကြောင်း ဆုံးဖြတ်ခဲ့ပါတယ်။
ပြည်ထောင်စုရှေ့နေချုပ်ရုံး၊ ညွှန်ကြားရေးမှူးက ရောင်းချရန်အသင့်ပြင်ဆင်ထားသည့် မူးယစ်ဆေးဝါးများ တွေ့ရှိခြင်းအပေါ် ရောင်းချရန်အလို့ငှာ လက်ဝယ်ထားမှုနှင့် ဖြန့်ဖြူးရောင်းချမှုပြုလုပ်ရာတွင် အားပေးကူညီကြောင်း ကောက်ယူ၍ တရားခံအောင်ဇော်ဖြိုးအပေါ် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာ ဥပဒေပုဒ်မ ၁၉ (က)၊ ပုဒ်မ ၂၀ (က) ဖြင့်လည်းကောင်း၊ တရားခံ မင်းသူကျော်အပေါ် ပုဒ်မ ၁၉ (က)/၂၁၊ ပုဒ်မ ၂၀ (က)/၂၁ ဖြင့်လည်းကောင်း ပြစ်ဒဏ်များကို သီးခြားစီ ကျခံစေရန် ချမှတ်ထားသည့်အမိန့်သည် ရာဇသတ်ကြီးပုဒ်မ ၇၁ နှင့် ဆန့်ကျင်နေကြောင်း၊ တရားရုံး အဆင့်ဆင့်၏ အမိန့်များသည် ဥပဒေနှင့်ညီညွတ်ခြင်းမရှိသဖြင့် ဥပဒေနှင့်အညီ သင့်မြတ်သည့် အမိန့် ချမှတ်ပေးရန် လျှောက်ထားတင်ပြသည်။
ယခုအမှုတွင် မူးယစ်ဆေးဝါးဖြစ်သည့် ဘိန်းဖြူများကို ပင်နယ်ဆလင်ပုလင်းများတွင် အသင့် ထည့်ထားသည့် အခြေအနေသည် ရောင်းချခြင်းပြုရန် ရည်ရွယ်ချက်ရှိပြီး ရည်ရွယ်သည့်အတိုင်း မူးယစ်ဆေးဝါးဝယ်လက်ရှာခြင်း၊ ဈေးကွက်ရှာခြင်းစသည့် ရောင်းချခြင်းပြစ်မှုကို ကျူးလွန်ရန်အားထုတ်ခြင်း နှင့် မူးယစ်ဆေးဝါး သို့ စိတ်ကိုပြောင်းလဲစေသောဆေးဝါးကို ရောင်းချရန်ကမ်းလှမ်းခြင်း၊ သဘောတူခြင်း သို့ ရောင်းဝယ်ရန် ဆက်သွယ်ခြင်းတို့ကြားတွင်ရှိသည့်
ပြစ်မှုကျူးလွန်ရန် ပြင်ဆင်ခြင်းသာ ရှိသေးသည်ဟု ကောက်ယူရမည်ဖြစ်သဖြင့် ရောင်းချခြင်းမမြောက်သည်မှာ မြင်သာသည်။
အောင်ဇော်ဖြိုးက မူးယစ်ဆေးဝါးဖြစ်သည့် ဘိန်းဖြူများကို ပင်နယ်ဆလင်ပုလင်းများတွင် အသင့်ထည့်ထားသည့် အခြေအနေသည် ရောင်းချခြင်း မမြောက်သေးသည့်အတွက် အယူခံတရားလိုက ၎င်းကို အားပေးကူညီမှုပြုကြောင်း ကောက်ယူနိုင်မည်မဟုတ်ပေ။
သို့ဖြစ်၍ ရောင်းချရန်အသင့်ပြင်ဆင်ထားသည့် မူးယစ်ဆေးဝါးများ တွေ့ရှိခြင်းအပေါ် အောင်ဇော်ဖြိုးက ဖြန့်ဖြူးရောင်းချမှုမြောက်ကြောင်း၊ မင်းသူကျော်၊ ဒေါ်လှမြင့်၊ ငြိမ်းချမ်းတို့က အောင်ဇော်ဖြိုး ဖြန့်ဖြူးရောင်းချမှုပြုလုပ်ရာတွင် အားပေးကူညီကြောင်းကောက်ယူ၍ မူးယစ်ဆေးဝါး နှင့်စိတ်ကိုပြောင်းလဲစေသောဆေးဝါးများဆိုင်ရာ ဥပဒေပုဒ်မ ၂၀ (က)/၂၁ အရ ပြစ်မှုထင်ရှားစီရင်ခြင်း သည် ဥပဒေနှင့်ညီညွတ်ခြင်းမရှိပေ။
သို့ဖြစ်၍ အောက်ဖော်ပြပါ အရေးယူလောက်သော ဥပဒေပြဿနာအပေါ် အောက်ပါအတိုင်း ဖြေကြားလိုက်သည်-
“ရောင်းချရန်အသင့်ပြင်ဆင်ထားသည့် မူးယစ်ဆေးဝါးများတွေ့ရှိခြင်းအပေါ် ရောင်းချရန်အလို့ငှာ လက်ဝယ်ထားမှုနှင့် ဖြန့်ဖြူးရောင်းချမှုပြုလုပ်ရာတွင် အားပေးကူညီကြောင်း ကောက်ယူ၍ မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာဥပဒေပုဒ်မ ၁၉ (က)/ ၂၁ နှင့် ပုဒ်မ ၂၀ (က)/ ၂၁ တို့အရ ပြစ်မှုထင်ရှားစီရင်ခြင်းသည် ဥပဒေနှင့်ညီညွတ်ခြင်း မရှိကြောင်း။”
ထို့ကြောင့် ဤအထူးအယူခံမှုကိုခွင့်ပြုပြီး တရားခံ အောင်ဇော်ဖြိုးအပေါ် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာ ဥပဒေပုဒ်မ ၂၀ (က) အရလည်းကောင်း၊ တရားခံ မင်းသူကျော်၊ ဒေါ်လှမြင့် နှင့်ငြိမ်းချမ်းတို့အား ယင်းဥပဒေပုဒ်မ ၂၀ (က)/ ၂၁ အရ လည်းကောင်း ပြစ်မှုထင်ရှားစီရင်သည့် တရားရုံးအဆင့်ဆင့်၏ အမိန့်တို့ကို ပယ်ဖျက်ပြီး ၎င်းပုဒ်မတို့နှင့် စပ်လျဉ်း၍ အမှုမှအပြီးအပြတ်လွှတ်လိုက်သည်။
၎င်းတို့အသီးသီးအပေါ် ယင်းဥပဒေပုဒ်မ ၁၉ (က) အရ လည်းကောင်း၊ ပုဒ်မ ၁၉ (က)/၂၁ အရလည်းကောင်း ပြစ်မှုထင်ရှားစီရင်သည့် အမိန့်အသီးသီးကို ဆက်လက်အတည်ပြုလိုက်သည်။ "လို့ ထုံးဖွဲ့ထားပါတယ်။

ဒါဆိုရင် ရောင်းချရန်အလို့ငှာ လက်ဝယ်ထားတာနဲ့ ရောင်းချတာက ဘယ်လိုကွာခြားတယ်ဆိုတာ သိသွားလိမ့်မယ်လို့မျှော်လင့်ပါတယ်။

အထက်ပါ စီရင်ထုံး အပြည့်အစုံကို စီရင်ထုံးပါ ခေါင်းစဉ်နဲ့ ရှာဖွေဖတ်ရှုနိုင်ပါတယ်။





#စီရင်ထုံး