05/07/2022
အိမ်ခြံမြေ အရောင်းအဝယ် ပြဿနာများ (၂)
=================================
"ဆရာ.. ကျွန်တော် တောင်ဥက္ကလာ၊ စီမံကိန်းထဲမှာ မြေကွက်လေး တကွက် ဝယ်ဖို့အတွက် စာရွက်စာတမ်းလေး လိုက်ပါစစ်ဆေးပေးဖို့နဲ့ ၊
ဆရာစစ်ဆေးပေးလို့ အဆင်ပြေတယ်ဆိုရင် စရံပေးစာချုပ်ပါ တပါတည်း ချုပ်ဆိုမှာပါ ဆရာ၊ အဲဒါ ဆရာ ဘယ်အချိန်လောက် အဆင်ပြေနိုင်မလဲ သိချင်လို့ပါ"
"စရံပေးတာက နောက်မှ အေးဆေးလုပ်ပါ။ အရင်ဆုံး စာရွက်စာတမ်းတွေ စစ်ဆေး၊ အဆင်ပြေတယ် ကြိုက်တယ်ဆိုရင် နောက်တရက်မှ စရံပေးစာချုပ် ချုပ်ပါ။ ဘာလို့လည်းဆိုတော့ အဲဒီ့ဘက်မြေကွက်တွေမှာ မူလပိုင်ရှင်တွေ မရှိတာက များတယ်။ အရပ်ကတိစာချုပ် တွေပဲ ကိုင်ထားတတ်ကြတယ်ဗျ၊ အဲဒါကြောင့် မြေဝယ်မယ်ဆိုရင် မလောပါနဲ့ သေချာ ဂရုစိုက်ပြီး အချိန်ပေးရတယ်.... ခုလာမယ့် ---------- နေ့ ----------- နာရီ၊-------------နေရာက စောင့်ပေးပါ၊ ကျွန်တော် လာခဲ့ပေးပါ့မယ်"....
စာရွက်စာတမ်းများ စစ်ဆေးရန် ရောက်ရှိသည့်အချိန်၌ -
"ပိုင်ရှင်က ဘယ်သူလဲဗျ၊ အစ်မက ပိုင်ရှင်လား"
"မဟုတ်ဘူးရှင့်.. ဒါက အဖေနဲ့ အမေ ပိုင်တာပါ၊ အဖေကတော့ မရှိတော့ပါဘူး၊ ခု အမေကလည်း ခရီးသွားနေလို့ သဘက်ခါလောက်မှ ပြန်ရောက်မယ် ဆရာ၊ စာရွက်စာတမ်းတွေ ဂရန်တွေတော့ ရှိပါတယ် ဆရာ၊ စစ်ဆေးကြည့်လို့ရပါတယ်"
"အဲဒါလည်း အဆင်ပြေတာပဲလေ၊ စာရွက်စာတမ်းတွေ အရင် ကြည့်ကြတာပေါ့".
ရောင်းသူ (@)၏ သမီးဖြစ်သူက စာရွက်စာတမ်းတွေ အထပ်လိုက် ယူလာသည်။
စစ်ဆေးကြည့်သည့်အခါ.
၁။ ပေ ၂၀ ပေ ၆၀ ဂရန်မူရင်း ( အဆိုပါ ဂရန်၌ အမည်ပေါက်သူမှာ A,B,C,D (၄)ဦး အမည်ဖြင့် ဂရန်ထွက်ထားသည်။
၂။ ဂရန်အမည်ပေါက် (၄)ဦးအနက်မှ B နှင့် E တို့ ချုပ်ဆိုထားသော အရောင်းအဝယ်အရပ်ကတိစာချုပ်တစ်စောင်၊
၃။ E နှင့် F တို့၏ အရောင်းအဝယ်အရပ်ကတိစာချုပ်တစ်စောင်၊
၄။ F နှင့် G ၏ အရောင်းအဝယ်အရပ်ကတိစာချုပ်တစ်စောင်၊
၅။ G ကွယ်လွန်သွားသည့်အတွက် G ၏ ခင်ပွန်းဖြစ်သူ G1နှင့် ယခုရောင်းသူ @ တို့ ချုပ်ဆိုသော အရောင်းအဝယ်စာချုပ်တစ်စောင်။
စာရွက်စာတမ်း ၅ မျိုး စစ်ဆေးတွေ့ရှိရသည်။
ဂရန်အမည်ပေါက် (၄)ဦး၌ B တဦးထဲနှင့်သာ အရောင်းအဝယ်စာချုပ်ရှိသည်။
ကျန်တဲ့ A, C, D တို့မပါ။..
"A, C, D တို့က သူတို့ပူးတွဲပိုင်တာကို Bထံသို့ စွန့်လွှတ်ပေးကြောင်း စာချုပ်ကော ရှိလားဗျ၊ A,C,D ရဲ့ အမည်က တောက်လျှောက်ပျောက်နေလို့"
"ဟုတ်ရဲ့လား ဆရာ၊ ဆရာ ပြောမှ သိတယ်။ အမေနဲ့ ကျွန်မတို့က ဂရန်ကို အမည်ပေါက် တယောက်ထဲ ထင်နေတာ၊ သေချာတောင် မကြည့်မိဘူး၊ ကျွန်မတို့က ဒီလိုပဲ အဆင့်ဆင့် ဝယ်ခဲ့တာ"
"ဂရန်မှာ အမည်ပေါက်က နှစ်ယောက်ရှိရင် နှစ်ယောက်၊ သုံးယောက်ရှိရင် သုံးယောက် သဘောတူ လက်မှတ်ထိုးဖို့ လိုတယ်ဗျ၊ တယောက်တည်းက ရောင်းခဲ့ပြီး ကျန်တဲ့သူတွေက ကန့်ကွက်ရင် အကုန်ရှုပ်ထွေးကုန်ရောဗျ... အဲဒီ့ A,C,D တို့ရော ရှိသေးလား"
"မသိဘူး ဆရာ၊ မရှိလောက်တော့ဘူးလို့ ထင်တာပဲ၊ ပထမဆုံး ရောင်းခဲ့သူလည်း မရှိတော့ဘူးဆိုတော့လေ"
"ပြဿနာက မဖြစ်ရင်သာ ဘာမှ မဖြစ်တာဗျ၊ A,C,D တို့ မရှိရင်တောင် သူတို့အမွေခံသားသမီးတွေရှိခဲ့ရင်လည်း ရှုပ်ထွေးလာနိုင်တာပဲ၊ မဖြစ်ရင်တော့ ဘာမှ မဖြစ်ဘူး၊ ဖြစ်လာခဲ့ရင် အတော်လေး ရှင်းယူရမှာ၊
ခု ဝယ်မယ့်သူက သူ့အမည်ပေါက် လုပ်မယ်ဆိုရင်လည်း အလုပ်တွေ တအားများမှာ... "
"အဲဒီ့တော့ ဆရာ ကျွန်တော် ဝယ်လို့ကော အဆင်ပြေပါ့မလား"
"ဝယ်လို့ အဆင်ပြေပါ့မလားဆိုတော့ ညီက ကြိုက်လို့ ဝယ်ချင်တယ်ဆိုရင် ညီနဲ့ ခု ရောင်းမယ့်သူတို့ သေချာ ညှိနှိုင်းဖို့ လိုတယ်။ ငွေချေမည်ဆိုရင်လည်း ဘယ်အဆင့်မှာ ဘယ်လောက်ချေမယ်ဆိုတာမျိုး အတိအကျလေးလုပ်ဖို့ လိူအပ်တယ်။ နောက်တခုက ဒီလိုမြေမျိုးကို ဝယ်ပြီးရင် ညီ့ အမည်ပေါက် ရဖို့ဆိုတာက လုပ်ငန်းစဥ်တွေ အတော်များများကို ဖြတ်သန်းရမယ်၊ ကုန်ကျစရိတ်တွေရှိတယ် အနည်းဆုံး ၃၀ နဲ့ ၅၀ ကြားလောက် ဖြစ်သွားနိုင်တယ်။ ဒါက ညီ စဥ်းစားလို့ရအောင်နဲ့ ဒီဘက် အစ်မတို့လည်း သိအောင် တခါတည်း ပြောပြတာပါ။ အစ်မတို့ဘက်က ကိုယ်တိုင် အမည်ပေါက်ရအောင်လုပ်မယ်ဆိုလည်း အဲ့လောက် ကုန်မှာပဲ၊ တဦးနဲ့ တဦး သေချာလေး ညှိနှိုင်းသင့်တယ်"......
၁။ လူကြီးအတော်များများက မြေဝယ်ပြီးရင် ငါ့ ပိုက်ဆံနဲ့ ဝယ်ထားတာ ငါ ပိုင်တယ်ဆိုတဲ့ အတွေးပဲ တွေးကြတာ များပါတယ်။ အမည်ပေါက်ထားမယ်ဆိုတဲ့ အတွေး တွေးတဲ့သူက အတော်ရှားတယ်။ ပြဿနာ တစ်စုံတစ်ရာဖြစ်လာခဲ့ရင် ရှင်းပေတော့ပဲ...
၂။ အရင်တုန်းကရော ခုခေတ်လူရော အများစုက အိမ်ခြံမြေ ဝယ်ရင် ဂရန်ကြည့်မယ် (မစစ်ဆေးဘူး)၊ စာချုပ်အဆက်ဆက်မှန် မမှန်(အရပ်ကတိစာချုပ်ရဲ့ နေ့စွဲနဲ့ လူအမည်တွေ) သူတို့ကိုယ်တိုင်ကြည့်ပြီးတာနဲ့ အသင့်သုံးစာချုပ်နဲ့ ချုပ်လိုက်ကြတာများတယ်။
ဥပဒေကြောင်းအရ ဘယ်လို အကာအကွယ်ယူသင့်တယ်ဆိုတာကို ထည့်မတွက်တော့ဘူး၊
အိမ်ခြံမြေ ဝယ်ဖို့ပဲ ငွေကြေးတတ်နိုင်တာလေ၊ ရှေ့နေတယောက်ယောက်နဲ့ စာချုပ်စာတမ်းစစ်ဆေးဖို့၊ ပြင်ဆင်ဖို့အတွက် ရှေ့နေခ ပေးဖို့ မတတ်နိုင်ကြဘူး ......
အားလုံးကို လေးစားလျှက်
Contract Lawyer (စာချုပ်ရှေ့နေ)
U Zaw Maung Maung
09 9717 88878
666B, Inwa 19A Street, South Okkalapa Township, Yangon...
photo crd
