23/05/2023
တစ်နေ့ ကျွန်မရဲ့ရုံးခန်းသို့ အမျိုးသမီးကြီးတစ်ဦးရောက်ရှိလာပြီး ဆရာမ ကျွန်မမှာ သားသမီး(၃)ဦးရှိပါတယ်။ကျွန်မ ခင်ပွန်းလည်းဆုံးသွားပါပြီ။ ကျွန်မပိုင်ဆိုင်တာတွေကို အငယ်ဆုံးသမီးကိုပဲ အကုန် ပေးချင်တာပါ။ပေးလို့ရရဲ့လား။ခိုင်မာအောင်ဘယ်လိုလုပ်ရမလဲ ဆိုပြီး လာရောက်မေးမြန်းခြင်းဖြစ်ပါတယ်။
ကဲအမေးရှိပြီဆိုမှတော့ အဖြေရှိရတာပေါ့။
မိတ်ဆွေတို့လည်း မေတ္တာဖြင့်ပေးကမ်းခြင်းနှင့် ပတ်သက်ပြီး ဗဟုသုတ အနေနဲ့ သိရှိအောင် တင်ပြလိုက်ပါတယ်
မြန်မာဓလေ့ထုံးတမ်းဥပဒေ အခန်း(၁၈)တွင် ပေးကမ်းခြင်းအမျိုးမျိုးကို ဖော်ပြထားပါတယ်။
မြန်မာ့ဓလေ့ထုံးတမ်းဥပဒေနှင့်ပေးကမ်းခြင်း၊ ရှင်ပြုချိန်ပေးကမ်းခြင်း၊ ဘိုးဘွားများကမြေးများအား ပေးကမ်းခြင်း၊ သေခါနီးဆဲဆဲပေးကမ်းခြင်း နှင့် စာချုပ်စာတမ်းနှင့်ပေးကမ်းခြင်းတို့ဖြစ်ပါတယ်။
*မြန်မာဗုဒ္ဓဘာသာဝင်များသည် သေခါနီးဆဲဆဲပေးကမ်းမှုကို ပြုလုပ်လျှင် တရားမဝင်ပါ။
မိခင်၊ဖခင် တစ်ဦးဦးက သူပိုင်ပစ္စည်းအားလုံးကို သားသမီးတစ်ဦးထံကို အကုန်ပေးလို့ မရပါဘူး။ မြန်မာဗုဒ္ဓဘာသာဝင်ဆိုရင် ထိုပေးကမ်းခြင်းကြောင့် ထိုသူကွယ်လွန်တဲ့အခါ အခြားအမွေဆိုင်များ ဝေခြမ်းစရာ အမွေပစ္စည်း မကျန်တော့ရင် အဆိုပါ ပေးကမ်းခြင်းမှာ မြန်မာ့ဓလေ့ထုံးတမ်းဥပဒေနှင့် မညီဆန့်ကျင်နေတယ် မှတ်ယူရပေမည်။
ပေးကမ်းတဲ့အခါမှာလည်း ရွှေ့ပြောငိးနိုင်တဲ့ပစ္စည်း ကို ပေကမ်းမှာလား?
မရွေ့ပြောင်းနိုင်တဲ့ပစ္စည်းပေးကမ်းမှာလား?
ရွေ့ပြောင်းနိုင်တဲ့ပစ္စည်း (ရွှေ၊ ငွေ၊ ကား၊ အခြားပစ္စည်းများ)
ပေးကမ်းမယ်ဆိုရင် စာချုပ်စာတမ်းပြုလုပ်၍ ပေးရန်မလိုပါ။
လက်ရောက် ပေးအပ် လို့ရပါတယ်။
မရွေ့မပြောင်းနိုင်သော ပစ္စည်းပေးမယ်ဆိုရင် ပစ္စည်းလွှဲပြောင်းခြင်းအက်ဥပဒေ ပုဒ်မ (၁၂၃) အရ စာချုပ်ချုပ်ဆိုပြီး မှတ်ပုံတင်ရန် လိုအပ်ပါသည်။
သို့ပါ၍ အိမ်ခြံမြေ အား မေတ္တာဖြင့်ပေးကမ်းလိုပါက မှတ်ပုံတင်စာချုပ် ချုပ်ဆိုပေးကမ်းမှ တရားဝင်ပါတယ်။
- ထိုသိုပေးကမ်းရာမှ အထမြောက်စေရန် ပေးသူ၊ လက်ခံသူ ရှိရပါမည်။
- ပေးကမ်းသည့်ပစ္စည်းသည် လက်ရှိပစ္စည်းဖြစ်ရမည်၊
-ပေးသူက အဖိုးစားနား မပါဘဲ ပေးကမ်းခြင်းဖြစ်ရပါမယ်။
- ပေးသူက မိမိပိုင် ပစ္စည်းကို လွှဲပြောင်းပေးရပါမည်။
- ပေးသောပစ္စည်းကို ပေးသူ အသက်ရှင်စဉ် ပေးနိုင်သည့် အခြေအနေရှိခိုက် ပေးမှသာ အထမြောက်သည်။အလားတူပင် လက်ခံသူကလည်း အသက်ရှင်စဉ် ပေးခြင်းကို လက်ခံရန်လိုပါသည်။
- စာချုပ်တွင် အသိသက်သေများလက်မှတ်ရေးထိုးရပါမည်။
အောက်မှာဖော်ပြပေးမှာက မေတ္တာဖြင့်ပေးကမ်းစာချုပ်ဖြင့် အမည်ပြောင်းခြင်း ပြုလုပ်ပုံ အဆင့်ဆင့်တွေ ပြောပြပေးထား
ပါတယ်။
၁။ ပထမဦးစွာ သက်ဆိုင်ရာ မြေယာစီမံခန့်ခွဲမှုဌာန (သို့) မြို့တော်စည်ပင်(ရန်ကုန်၊ မန္တလေး၊ နေပြည်တော်)တို့တွင် မေတ္တာဖြင့်ပေးကမ်းခြင်း မြေပုံမြေရာဇဝင်(ပုံစံ ၁၀၅၊ ၁၀၆)
ကူးရပါမည်။
၂။ မြေပုံမြေရာဇဝင်ရရှိလျှင် ပစ္စည်းရှိရာ မြို့နယ်အခွန်ရုံးမှာ
(က) ပေးကမ်းစာချုပ် မူရင်း/မိတ္တူ
(ခ) အပိုင်ပေးသူ နှင့် လက်ခံသူတော်စပ်ပုံ ကျမ်းကျိန်မူရင်း/မိတ္တူ
(ဂ) ကျန်ညီအစ်ကို၊ မောင်နှမများကန့်ကွက်ရန်မရှိ
သဘောတူကြောင်းကျမ်းကျိန်မူရင်း/မိတ္တူ
(ဃ) ထိုညီအစ်ကိုမောင်နှမများ၏ ခင်ပွန်း/ဇနီးနှင့်သားသမီး
များရှိပါက ကန့်ကွက်ရန်မရှိသဘောတူကြောင်း ကျမ်းကျိန်မူရင်း
(င) ပေးသူ၊လက်ခံသူ တို့၏မှတ်ပုံတင်၊ သန်းခေါင်စာရင်း
(စ) မြေကွက်ပိုင်ဆိုင်မှု အထောက်အထားများ
(ဆ)မြေကွက်၊အိမ် ဓါတ်ပုံ တို့ကို တင်ပြပြီး အခွန်ရုံးမှာသွားရောက်လက်မှတ်ရေးထိုးရမှာ ဖြစ်ပါတယ်။ ထို့နောက်သက်ဆိုင်ရာ တိုင်းအခွန်ဦးစီးဌာနမှ ပစ္စည်းတန်ဖိုးရာဖြတ်ပေးပါမည်။ ပြီးနောက် မြို့နယ်အခွန်ရုံးတွင် တံဆိပ်ခေါင်းခွန် ဆောင်ခြင်းကိစ္စ ဆောင်ရွက်ရပါမည်။
* မေတ္တာဖြင့်ပေးကမ်းရာမှာ ဝင်ငွေခွန်ဆောင်စရာမလိုပါဘူး။ တံဆိပ်ခေါင်းခွန် ၄% ဆောင်ရမှာပါ။
(၃) တံဆိပ်ခေါင်းထုတ်ယူရပြီဆိုလျှင် မှတ်ပုံတင်စာချုပ်ချုပ်ကြီး
ဆိုပါမယ်(စာချုပ်မှတ်ပုံတင်ခ ၀.၅ ပေးသွင်းရမယ်)
(၄)နောက်ဆုံးအဆင့် မြေယာစီမံခန့်ခွဲမှုရုံး(သို့) မြို့တော်စည်ပင်(ရန်ကုန်၊မန္တလေး၊ နေပြည်တော်) တို့မှာ မိမိအမည်ပေါက်ဖို့အတွက် အမည်ပြောင်းခြင်း ဆက်လက်ဆောင်ရွက်ရမှာ ဖြစ်ပါတယ်။
တိုက်ခန်းအတွက် ပေးကမ်းခြင်းဆောင်ရွက်မယ်ဆိုလျှင်
owner book ရှိတဲ့ တိုက်ခန်းအတွက်
အထက်မှာဖော်ပြထားတဲ့အတိုင်း မြို့နယ်အခွန်ဦးစီးရုံးမှာ ဆောင်ရွက်ရမှာ ဖြစ်ပြီး တိုင်းအခွန်ရုံးက တိုက်ခန်းတန်ဖိုးဖြတ်ပေးမှာပါ။ ပေးကမ်းဆိုရင် ဝင်ငွေခွန်ဆောင်စရာမလိုသလို တိုက်ခန်းဖြစ်တဲ့အတွက် တံဆိပ်ခေါင်းခွန် ပါဆောင်စရာမလိုတော့ပါဘူး။
အခွန်ပြီးစီးကြောင်း(ဝင-၈) ရပြီဆိုရင်
သက်ဆိုင်ရာဌာန(မြိ့ရွာနှင့်အိုးအိမ်ဖွံဖြိုးရေးဦးစီးဌာန၊ မြို့တော်စည်ပင်သာယာရေးကော်မတီ)တို့တွင် ဆက်လက်၍ အမည်ပြောင်းဆောင်ရွက်နိုင်ပါတယ်။
Zabu Htate Tan Law Firm
09 51 74628
09 77 5516904
