14/07/2025
ရှေ့နေဘဝ (ထူးခြားဖြစ်ရပ်) အမှတ်တရ. အပိုင်း (၂၀)
ယနေ့တရားခွင်တွင် အများပြည်သူများဖြစ်သည့် ကျောင်းဒကာ၊ ဒကာမများ ကျေးရွာသူ /သားအတော်များများ အမိန့်လာရောက်နားထောင်ရန် လာရောက်ကြပါသည်။ အမိန့် ဟု သာမန်သိကြသူများ ဖြစ်၍ စိတ်ဝင်တစားလာကြခြင်းဖြစ်ဝည်။ စွဲချက်အမိနိ့သည် တရားခံ အပေါ် အပြစ် ရှိ/မရှ် အဆုူံအဖြတ်ပေးသည့် အမိန့်မဟုတ်ကြောင်းမသိကြပေ။ စွဲချက်တင်ခြင်းသည်တရားခံကိုအပြစ်ပေးခြင်းမဟုတ် တရားခံ အားခုခံချေပရှင်းလင်းခိုင်းခြင်းသာဖြစ်ကြောင်း ရွာသူ/သားများအနေဖြင့်မသိကြပေ။
မိမိလည်းတရားခံနှင့်တွေ့ဆုံ၍ ရုံးတော်မှစွဲချက်တင်ပါက အပြစ် ရှိ/မရှိမေးလျှင် အပြစ်မရှိကြောင်းနှင့် ဘာကြောင့် အပြစ်မရှိလဲမေးပါက ဘုန်းကြီးအားသတ်သည်ဆိုသည့်အချိန်က မိမိဘာမှမသိကြောင်းနှင့် ရဲစခန်းရောက်မှ ဘုန်းကြီးကို ဒါးနဲ့ခုတ်လိုက်တယ် ဟု ပြောပြသိရကြောင်း ဖြေရန်သင်ကြားပေးခဲ့ပါသည်။
တရားစီရင်ရေး အဖွဲ့ဥက္ကဌကြီးနှင့် အဖွဲ့ဝင် ၂ ဦးတို့ နံနက် ၁၀ နာရီ အချိန်တွင် တရားခွင်တက်ရောက်ကြပြီး နိုင်ငံတော်အလံနှင့် နိုင်ငံတော်တံဆိပ်အား ဂါရဝပြု ဦးညွှတ်၍ တရားခွင်ထိုင်ပေပြီ။
တရားခွင်ရှေ့တရားခံအား ရဲအချုပ်ဖြင့်ထုတ်လာခဲ့ပါသည်။ တရားလိုရှေ့နေ (ဥပဒေဝန်ထမ်း)မှတရားခွင်၏ညာဘက်၊ တရားခံ ၏ရှေ့နေ (မိမိ) မှ တရားခွင်၏ ဘယ်ဘက်တွင်ထိုင်စေခဲ့ပါသည်။
တရားခွင်စာရေး မှ အမှုတွဲအား ခေါ်ပြီးစွဲချက်တင်/မတင်သင့် အမိန့် ချမှတ်မည်ဖြစ်ကြောင်း နှင့် အမိန့် နာခံရန် အတွက်တရားခံအား မတ်တပ်ရပ်စေခဲ့ပါသည်။ အမှုလိုက်ရှေ့နေများဖြစ်ကြသည့် ဥပဒေဝန်ထမ်းနှင့်မိမိတို့မှလည်း မတ်တပ်ရပ်ကာ အမိန့် နားထောင်ကြ ပါသည်။
မြို့နယ် တရားစီရင်ရေးအဖွဲ့ဥက္ကဌမှ အမိန့်အားဖတ်ကြားပါသည်။
ကျိုက်မရောမြို့နယ်၊......... ကျေးရွာနေ (ဘ) ဦး........ ၏သားဖြစ်သူ ဦးငြိမ်း၊ သင်သည် ( . . ၈၄) ရက်နေ့က............... ရွာ ဘုန်းကြီးကျောင်းတွင် သံဃာတော် ဦး...........အား ဖြစ်စေတတ်သောသဘောအရ အမှန်အားဖြင့်သေစေလောက်သော ကိုယ်အင်္ဂါ နာကျင်မှုကို ဖြစ်စေရန် အကြံဖြင့် ပြုလုပ်မှုပြု၍ လူကို သေစေသည်ဖြစ်၍ သင့်အားရာဇသတ်ကြီးပုဒ်မ..... ၃၀၂ (၂) အရ စွဲချက်တင် လိုက်သည်။
မေး.........အပြစ်ရှိလား၊ မရှိဘူးလား
ဖြေ......... မရှိပါဘူးခင်ဗျာ
မေး......... ဘာလို့အပြစ်မရှိတာလဲ
ဖြေ......... ဘုန်းကြီးကိုသတ်လိုက်သည်ကိုမသိပါဘူး ဓားနှင်ခုတ်သည့် အချိန်တွင် မိမိဘာမှမသိ ပါဘူး၊ ရဲစခန်းရောက်မှ ပြောပြသိရပါတယ်။ ကျွန်တော် သတိလွတ်သွားလို့ ဖြစ်သွားတာပါ။
တရားခံ အားစွဲချက်ဖတ်ပြ ပြီး အပြစ်ရှိကြောင်းဝန်ခံပါက ထိုက်သင့်သောပြစ်ဒဏ်ပေးရန်ဖြစ်ပြီး အပြစ်မရှိကြောင်းငြင်းဆိုပါက တရားခံ၏ ထုချေချက် အကျဥ်းရေးမှတ်စေပြီး ရာဇဝတ်ကျင့်ထုံးဥပဒေပုဒ်မ.....၂၅၆ အရ စစ်ဆေးပြီးသောတရားလိုပြသက်သေများအား ပြန်ခေါ်သက်သေအဖြစ် စစ်ဆေး လိုခြင်း ရှိ/မရှိ အခွင့်အရေးပေး မေးမြန်းရပါသည်။ တရားခံမှ စစ်ဆေးလိုသော တရားလိုပြသက်သေအား စွဲချက်တင် သည့်နေ့တွင်ပင်လျှင် ချက်ချင်းတင်ပြရပြီး ရုံးတော်မှလည်း သက်သေအား ဆင့်စာချအပ် ခေါ်ဆောင်ပေးရပါသည်။ ပြန်ခေါ်သက်သေမရှိပါက တရားခံပြ သက်သေအမည်စာရင်းတင်ပြ ရပြီး ရုံးချိန်းရက်တွင် တရားခံအားစစ်ဆေးပါသည်။ ထိုသို့တရားခံအားစစ်ဆေးချိန်တွင်လည်း ရုံးတော်မှ ရိုးရိုးအစစ်ခံမည်လား တရားခံအဖြစ် အစစ်ခံမည်လားမေး၍ စစ်ဆေးရပါသည်။
ဦးငြိမ်းအား ရာဇသတ်ကြီးပုဒ်မ...၃၀၂ (၂) အရ စွဲချက်တင်ရာ တရားခံ မှ အပြစ်မရှိကြောင်းငြင်းဆိုသဖြင့် တရားခံ၏ ထုချေချက် အကျဥ်းအားရေးမှတ်ပြီး ပြန်ခေါ်သက်သေစစ်မေးလိုခြင်း ရှိ/မရှိ ရုံးတော်မှ မေးမြန်းခဲ့ပါသည်။
မိမိအနေဖြင့် တရားလို နှင့် တရားလိုပြသက်သေများအား စစ်ဆေးစဥ် တရားခံ၏ခုခံရေးလမ်းကြောင်းအား ပြန်လှန်မေးတွင် မေးမြန်းထားပြီး ထွက်ဆိုချက် များမှာလည်း အမှုအတွက် ရသင့်သမျှရရှိပြီး ဖြစ်၍ ထပ်မံစစ်ဆေးရန် မလိုအပ်တော့ပါ။
ထို့ကြောင့်တရားသူကြီးမှ စစ်ဆေးပြီးသောတရားလိုနှင့် တရားလိုပြသက်သေများအားစစ်ဆေးလိုခြင်း ရှိ/မရှိ မေးမြန်းရာ ပြန်ခေါ်သက်သေ မရှိကြောင်း တင်ပြခဲ့ပါသည်။
၄င်းနောက် တရားခံ ပြသက်သေအမည်နှင့်နေရပ်လိပ်စာ တင်ပြစေရာ တရားခံပြသက်သေများ အဖြစ် အိမ်နီးချင်း ၂ ဦး ခြံနီးချင်း ၁ ဦး ကျေးရွာကောင်စီဝင် ၁ ဦး ဗိန္ဒောဆရာ ၁ ဦး နှင့် မိသားစု ဝင် ၁ ဦးတို့အား တင်ပြခဲ့ပါသည်။
တရားခွင် လာရောက်ကြည့်ရှုနားထောင်ကြသည့် ရွာသူ / ရွာသား များလည်း စုတ် တသပ်သပ် မွန်းကြပ်ပင်ပန်းသောစိတ်များဖြင့် ရွာသို့ ပြန်သွားခဲ့ကြပေပြီ
အပိုင်း ၂၁ တွင် ဆက်လက်ဖတ်ရှုအားပေး ကြပါရန်........
