19/09/2026
طريقة تسيير شركة SARL بآحترافية وبطريقة قانونية
▪︎ من أجل تسيير شركة SARL بطريقة صحيحة وقانونية وبدون مشاكل خاصك ترد البال لهاد النقاط:
》أولاً : Compte bancaire 🏦
بما أن الفيلم كلو ديال الشركة طالع على لفلوس فإن الحساب البنكي حساس وخاص أي فلوس دخلات أو خرجات منو تكون عندها إثبات سواء كان فاتورة أو عقد...
كذلك خاص الحساب البنكي ديال الشركة يخدم غير للشركة، لأنه لا يجوز شراء وبيع أشياء شخصية ولا علاقة لها بالشركة وبحساب الشركة...
ومن الأفضل أن يكون المبلغ الموجود في فاتورة البيع أو الشراء هو نفسه الذي تم إيداعه أو إقتطاعه من الحساب البنكي ليسهل مراجعتها بدون تعقيدات...
لايجوز سحب المال من الحساب البنكي وأخدها لحسابك الشخصي إلى بعد استشارة المحاسب ديالك
》ثانياً : La Caisse 💰
هاد لكونط كانديرو فيه لفلوس نقداً، وكيما كاتعرفو الدولة كاتحارب الكاش لذلك من الأفضل مايكونش عامر بزاف باش تجنبو المراجعة الضريبية...
كذلك من الأفضل ماتشريش وتبيع غير بالكاش، لأنه مثل هذه العمليات مشبوهة ويستخدمها أصحاب نوار
وإذا اقتضى الحال وبغيت تشري وتبيع بالكاش راه كاين شروط خاص تردلها البال، الشراء نقداً خاص يكون أقل من 5000 درهم في اليوم على كل فورنيسور، وأقل من 50000 درهم في الشهر على كل فورنيسور
أما بخصوص البيع نقدا تقدر تبيع المهم ماتفوتش 20000 درهم في كل فاتورة، وماتنساش فاش تبيع نقداً وتحط فلوس فالحساب البنكي خاصك تعلم المحاسب باش يدوزهوم كرقم معاملات ومايحطهومش فالحساب الجاري...
لايجوز سحب المال من لاكيس وأخدها لحسابك الشخصي إلى بعد استشارة المحاسب ديالك
》ثالتاً : Compte Courant d'associes 🤝
هذا الحساب بالغة العربية سميتو الحساب الجاري، في المحاسبة كانحطو فيه فلوس مول شركة، يعني فاش الشركة يكون ناقصها فلوس لغرض ما راه صاحب الشركة يقدر يسلفها باش تقضي الغراض ومن بعد يرجع يسحب فلوسو
صاحب الشركة فاش يبغي يحط فلوسو فهاد الحساب خاصو يتأكد من أن دوك لفلوس قانونيين والمصدر ديالهوم باين ومصرح بيهوم ديجا ومخلص عليهوم الضرائب
وكذلك فاش يبغي ياخد فلوسو من الشركة خاص ياخد غير قد المبلغ لي حط فالشركة زائد الفوائد...
كذلك صاحب الشركة فاش يبغي يحط فلوسو خاصو يقاد واحد المحضر ديال الجمع العام الإستثنائي يكتب فيه علاش سلف الشركة وفوقاش يرجع ياخد فلوسو...
》رابعاً : Stock 📦
سطوك هو مكان تخزين السلع أو المنتوجات، هاد سطوك مهم بزاف عند إدارة الضرائب لأن أصحاب نوار كانو يتهربو من الضرائب عن طريق التلاعب به
لذلك وجب تسجيل جميع العمليات السنوية الخاصة بإدخال وإخراج السلع من المخزون وفي آخر السنة خاصك تاخد للمحاسب قيمة سطوك الحقيقية لي بقالك
في حال كانت قيمة السطوك في المحاسبة تختلف عن قيمة سطوك في الحقيقة وجب إصلاح الخطا بعد معرفة السبب وذلك لعدم وقوعك في أخطاء قد تندم عليها مستقبلاً
》خامساً : Facturations 📝
جميع الشركات خاص يكون عندهوم نظام خاص بالفواتير، فاش يبيعو أي حاجة خاص يقادو جوج فاتورات ديال البيع وحدة ياخدها الزبون وحدة تبقا فالشركة
وكذلك عند الشراء خاص ضاروري تردو البال للفاتورة واش مقادا وفيها جميع المعلومات القانونية ولا لا
وجب العلم أن القوانين تبدلات بزاف وزادو آجال الأداء والإقتطاع من المنبع...
لذلك وجب دائما أخد إستشارة مع المحاسب ديالك قبل أي عملية شراء او بيع باش يشوفلك واش كاين شي مستجدات ضريبية خاصك طبقها عند البيع والشراء ولا لا...
》سادساً : Archivage 📅
للأسف معظم الشركات الصغير ماعندهاش أرشيف ومن الأخطاء لي كايديرو أنهم كايحتافضو بالمستندات والفواتير الأصلية عند المحاسب، وهذا ممكن ولكنه يضع الشركة تحت رحمة المحاسبين
لذلك من الأفضل الإحتفاض بجميع المستندات الأصلية في في مقر الشركة أو في مكان آخر بشرط يكون آمن ومنظم، لأن الشركة مطالبة بأرشفة جميع الوثائق الأصلية ولمدة 10 سنوات
》سابعاً أخيراً : Comptable 🕵♂️
دير فبالك أنه بمجرد الإنتهاء من تأسيس الشركة خاصك ضاروري محاسب يقادلك التصاريح، راه وخا تكون عندك شركة واقفا ماخداماش راه خاصها محاسبة وتصاريح دوز فالوقت لأن أي تأخير أو تهاون يعاقب عليه القانون بالغرامات على التأخر في إيداع التصاريح
بالنسبة للمحاسبين فاش تقلب عليهوم غالباً غادي تصادف غير مع جوج أنواع، كاين مكاتب كاياخدو عليك دوصي والفواتير ويخربقوهوم ويغرقوك ضرائب ويسمحو فيك، وكاين مكاتب كاتخدم خدمة نقية ومتقونة ويعطيك وقت ويقوم بوجيهك والإجابة على استفساراتك...
باش تفرق بيناتهوم وتختار المحاسب المناسب صراحة صعيب، حيت فاللول كلشي كايبان زوين، ولكن على الأقل فاش تختار المحاسب بقا تطلب بعض التصاريح ديال (TVA, BILAN, CNSS...) وتشوف واش مقادة مع داك شي لي عندك فالواقع ولا لا.
▪︎ ختاما وجب العلم أن تسيير شركة ليس بالأمر السهل ويعتبر مسؤولية من الممكن أن تحاسب عليها، ولكن هذا لا يعني أنه لايمكن تسيير شركة، فقط وجب عليك التفرغ لهذه المهمة ومحاولة معرفة كل كبيرة وصغيرة عن الشركات وبعد مرور سنة على الأكثر سوف تجد نفسك إكتسبت القدرة على تسيير الشركات بطريقة قانونية واحترافية...
