04/08/2026
មាត្រា២៤៦ នៃក្រមព្រហ្មទណ្ឌ
បទប្រទូស្តកេរខ្មាស គឺជាប្រភេទបទល្មើស មជ្ឈិម ហើយត្រូវបានកំណត់និយមន័យថា «គ្រប់អំពើប៉ះពាល់ ស្ទាប អង្អែល កេរភេទ ឬ ផ្នែកភេទផ្សេងទៀតរបស់បុគ្គលដទៃ តែបុគ្គលនេះមិន ស្ម័គ្រផងទេ ឬ បង្ខំបុគ្គលដទៃឲ្យប្រព្រឹត្តអំពើនេះមកលើខ្លួន ឬ ទៅលើ តតិយបុគ្គលក្នុងគោលបំណងធ្វើឲ្យរំជួល ឬ រីករាយដល់ចំណង់ផ្លូវភេទ។
អំពើប្រទូស្តកេរខ្មាសត្រូវផ្តន្ទាទោសដាក់ពន្ធនាគារពី ១ (មួយ) ឆ្នាំ ទៅ ៣ (បី) ឆ្នាំ និងពិន័យជាប្រាក់ពី ២.០០០.០០០(ពីរលាន) រៀល ទៅ ៦.០០០.០០០ (ប្រាំមួយលាន) រៀល។
ដោយឡែក បទប្រទូស្តកេរខ្មាស ក៏មានបញ្ញត្តអំពីស្ថានទម្ងន់ទោសនៅក្នុងមាត្រា ២៤៧ និងមាត្រា ២៤៨ ដោយបានបញ្ញត្តថា៖ ត្រូវផ្តន្ទាទោសដាក់ពន្ធនាគារ ពី ២ (ពីរ) ឆ្នាំ ទៅ ៥ (ប្រាំ) ឆ្នាំ និងពិន័យជាប្រាក់ពី ៤.០០០.០០០ (បួនលាន) រៀល ទៅ ១០.០០០.០០០ (ដប់លាន) រៀល កាលបើអំពើនេះប្រព្រឹត្តឡើងក្នុងស្ថានភាពណាមួយដូចខាងក្រោម៖
១៖ ដោយការប្រើប្រាស់អាវុធ ឬ ការគំរាមកំហែងនឹងអាវុធ។
២៖ ដោយការប្រើប្រាស់គ្រឿងញៀន ឬ គ្រប់វិធីដែលនាំឲ្យជនរងគ្រោះបាត់បង់ ឬ ចុះខ្សោយលទ្ធភាពទប់ទល់។
៣៖ ដោយបុគ្គលដែលមានអំណាចទៅលើជនរងគ្រោះ។
៤៖ ដោយបុគ្គលដែលរំលោភអំណាច ដែលមុខងាររបស់ខ្លួនបានប្រគល់ឲ្យ ។
៥៖ ដោយបុគ្គលច្រើនរូប ដែលប្រព្រឹត្តឡើងក្នុងឋានៈជាចារី សហចារី អ្នកផ្ដើមគំនិត ឬជាអ្នកសមគំនិត។
៦៖ បុគ្គលដែលទន់ខ្សោយជាពិសេស ដោយមូលហេតុអាយុនៃបុគ្គលនោះ។
៧៖ នារីមានគភ៌ កាលបើគភ៌ត្រូវបានគេឃើញជាក់ស្ដែង ឬកាលបើជនល្មើសបានដឹង។
៨៖ បុគ្គលដែលទន់ខ្សោយពិសេស ដោយមូលហេតុនៃជម្ងឺ ឬពិការភាព កាលបើស្ថានភាពបុគ្គលនេះត្រូវបានឃើញជាក់ស្ដែង ឬ កាលបើជនល្មើសបានដឹង។
