06/08/2026
រាជរដ្ឋាភិបាលប្រកាសវិធានការលើកលែង និងអនុគ្រោះពន្ធលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ
ក្រសួងសេដ្ឋកិច្ច និងហិរញ្ញវត្ថុ បានចេញសេចក្តីជូនដំណឹង ស្តីពីគោលការណ៍លើកលែង និងអនុគ្រោះពន្ធលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ ដើម្បីសម្រួលដល់ការបំពេញនីតិវិធី និងកាត់បន្ថយបន្ទុកពន្ធរបស់ប្រជាពលរដ្ឋ។
វិធានការសំខាន់ៗរួមមាន៖
ព្យួរការអនុវត្តពិន័យពន្ធបន្ថែមចំពោះការយឺតយ៉ាវក្នុងការបង់ពន្ធប្រថាប់ត្រា សម្រាប់ឯកសារដែលហួសរយៈពេល ៣ ខែ គិតចាប់ពីថ្ងៃចេញដោយមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានី-ខេត្ត រហូតដល់ដំណាច់ឆ្នាំ២០២៧។
បន្តអនុគ្រោះឱ្យបង់ពន្ធប្រថាប់ត្រាតែម្តងចុងក្រោយ ចំពោះអចលនទ្រព្យដែលមានប្រវត្តិផ្ទេរសិទ្ធិកាន់កាប់បន្តដៃគ្នាច្រើនដង។
អនុញ្ញាតឱ្យបង់ពន្ធប្រថាប់ត្រា និងពន្ធលើអចលនទ្រព្យលើសំណង់ចុងក្រោយ ដោយគ្រាន់តែមានលិខិតអនុញ្ញាតសាងសង់ ឬការបញ្ជាក់ពីអាជ្ញាធរមានសមត្ថកិច្ចអំពីកាលបរិច្ឆេទសាងសង់។
លើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ សម្រាប់យោធិន និងនគរបាលជាតិដែលបានចូលរួមបំពេញភារកិច្ចនៅសមរភូមិជួរមុខ ដោយមានការបញ្ជាក់ពីអង្គភាពសាមី។
ក្រសួងបានបញ្ជាក់ថា ការអនុគ្រោះទាំងនេះ មិនមានអានុភាពប្រតិសកម្ម ចំពោះប្រាក់ពន្ធ និងទណ្ឌកម្មរដ្ឋបាល (ពន្ធបន្ថែម និងការប្រាក់) ដែលបានបង់រួចហើយ។
ជាមួយគ្នានេះ ក្រសួងសេដ្ឋកិច្ច និងហិរញ្ញវត្ថុ ក៏បានអំពាវនាវដល់ម្ចាស់អចលនទ្រព្យដែលមានឯកសារកំពុងដំណើរការនៅមន្ទីររៀបចំដែនដី ឬរដ្ឋបាលសារពើពន្ធ សូមរួសរាន់បំពេញនីតិវិធីចុះបញ្ជីដីធ្លី និងបង់ពន្ធពាក់ព័ន្ធ ដើម្បីអាចទទួលបានបណ្ណកម្មសិទ្ធិបានឆាប់រហ័ស។
