ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ KTI Check-Point

  • Home
  • Cambodia
  • Phnom Penh
  • ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ KTI Check-Point

ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ KTI Check-Point ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ KTI Check-Point

រយៈពេល ២ថ្ងៃ ចាប់ពីថ្ងៃទី១ ដល់ថ្ងៃទី២ ខែកញ្ញា ឆ្នាំ២០២៦ ប៉ុស្តិ៍នគរបាលអាកាសយានដ្ឋានអន្តរជាតិតេជោ បានរៀបចំបើកវគ្គបណ្តុះបណ...
02/09/2026

រយៈពេល ២ថ្ងៃ ចាប់ពីថ្ងៃទី១ ដល់ថ្ងៃទី២ ខែកញ្ញា ឆ្នាំ២០២៦ ប៉ុស្តិ៍នគរបាលអាកាសយានដ្ឋានអន្តរជាតិតេជោ បានរៀបចំបើកវគ្គបណ្តុះបណ្តាល ស្តីពី «ការកំណត់អត្តសញ្ញាណ និងកិច្ចការពារបុគ្គលដែលមានហានិភ័យរងគ្រោះដោយសារការជួញដូរមនុស្ស» ក្នុងគោលបំណងពង្រឹងសមត្ថភាព និងចំណេះដឹងរបស់មន្ត្រីពាក់ព័ន្ធ ក្នុងការការពារ ទប់ស្កាត់ និងឆ្លើយតបចំពោះករណីជួញដូរមនុស្ស។

ក្នុងឱកាសនោះ ក៏មានការអញ្ជើញចូលរួមជាវាគ្មិនកិត្តិយសពីសំណាក់ លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ព្រមទាំងលោក លោកស្រី នាយរងប៉ុស្តិ៍ និងគ្រូបង្គោលមកពីស្ថានទូតអូស្ត្រាលី ដើម្បីចែករំលែកបទពិសោធន៍ការងារជាក់ស្តែង ចំណេះដឹង និងវិធីសាស្ត្រល្អៗ ជូនដល់សិក្ខាកាម ដើម្បីយកទៅអនុវត្តក្នុងការងារប្រចាំថ្ងៃឱ្យកាន់តែមានប្រសិទ្ធភាព។

អញ្ជើញចែករំលែកបទពិសោធន៍ដ៏មានសារៈសំខាន់ក្នុងឱកាសនោះ លោកឧត្តមសេនីយ៍ត្រី សុខ ធា មានប្រសាសន៍ថា ក្នុងនាមជាមន្ត្រីអន្តោប្រវេសន៍ និងជានាយប៉ុស្តិ៍ លោកបានប្តេជ្ញាចិត្ត និងខិតខំប្រឹងប្រែងទប់ស្កាត់សកម្មភាពនារីខ្មែរដែលចាញ់បោកមេខ្យល់ទៅប្រទេសចិន គ្រប់រូបភាព មិនឱ្យចេញតាមប៉ុស្តិ៍របស់យើងជាដាច់ខាត។ យើងទប់ស្កាត់បាន គឺជាជោគជ័យដ៏ធំធេង។

លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ បានមានប្រសាសន៍បន្តថា ការសិក្សានៅថ្ងៃនេះ មានរយៈពេលខ្លី ប៉ុន្តែបានឆ្លុះបញ្ចាំងអំពីសារៈសំខាន់នៃការចូលរួមជាមួយស្ថាប័នពាក់ព័ន្ធផ្សេងៗ ក្នុងការទប់ស្កាត់ និងបង្ក្រាបករណីជួញដូរមនុស្ស។

ឆ្លៀតក្នុងឱកាសនោះ លោកឧត្តមសេនីយ៍ត្រី ក៏បានថ្លែងអំណរគុណដល់ប្រទេសអូស្ត្រាលី តំណាងស្ថានទូតអូស្ត្រាលី ជាពិសេសអង្គការមូលនិធិអាស៊ី ដែលតែងតែខ្នះខ្នែង និងខិតខំប្រឹងប្រែងបណ្តុះបណ្តាលដល់គ្រូបង្គោលទាំង ១៣ នាក់ ព្រមទាំងសិក្ខាកាមទាំង ៩០ នាក់ផងដែរ។

លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ បានមានប្រសាសន៍បន្ថែមថា ករណីជួញដូរមនុស្ស មិនមែនជាគ្រោះថ្នាក់សម្រាប់តែប៉ុស្តិ៍របស់យើង ឬប៉ុស្តិ៍ផ្សេងៗ ឬក៏ប្រទេសយើងទាំងមូលនោះទេ ប៉ុន្តែជាបញ្ហាសកលរបស់ពិភពលោក។

លោកឧត្តមសេនីយ៍ត្រី សុខ ធា ក៏បានលើកទឹកចិត្តដល់សិក្ខាកាមទាំងអស់ដែលបានចូលរួមសិក្សានៅពេលនេះ ឱ្យយកចំណេះដឹង និងបទពិសោធន៍ដែលទទួលបានទៅអនុវត្តជាក់ស្តែង។ ទោះបីវគ្គសិក្សាមានរយៈពេលខ្លីក៏ដោយ ប៉ុន្តែខ្លឹមសារនៃការសិក្សាមានភាពស៊ីជម្រៅ ហើយវគ្គបណ្តុះបណ្តាលខ្លីៗ និងវគ្គពិសេសបែបនេះ មិនងាយមានឱកាសចូលរួមនោះទេ។ ដូច្នេះ សូមសិក្ខាកាមទាំងអស់យកចិត្តទុកដាក់ ព្រោះនេះជាមូលដ្ឋានគ្រឹះដ៏សំខាន់សម្រាប់ការងាររបស់យើងបន្តទៅមុខ។

លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ក៏បានលើកទឹកចិត្តដល់មន្ត្រីទាំងអស់ មិនមែនតែសិក្ខាកាមដែលបានចូលរួមនៅទីនេះប៉ុណ្ណោះទេ ប៉ុន្តែថែមទាំងមន្ត្រីដែលមិនបានចូលរួមសិក្សាផងដែរ ដោយសូមឱ្យយកចំណេះដឹង និងបទពិសោធន៍ដែលទទួលបានពីវគ្គបណ្តុះបណ្តាលនេះ ទៅចែករំលែក និងបណ្តុះបណ្តាលបន្តដល់ក្រុមការងារ ដើម្បីបង្កើនចំណេះដឹង និងសមត្ថភាពការងាររួម។

លោកឧត្តមសេនីយ៍ត្រី សុខ ធា ក៏បានគូសបញ្ជាក់ថា សូមឱ្យសិក្ខាកាមទាំងអស់យកចិត្តទុកដាក់ស្តាប់បទឧទ្ទេសរបស់គ្រូបង្គោល ក៏ដូចជាវាគ្មិនកិត្តិយស ដែលមានចំណេះដឹង និងបទពិសោធន៍ការងារជាក់ស្តែង ដើម្បីទទួលបានចំណេះដឹង និងបទពិសោធន៍ថ្មីៗ សម្រាប់យកទៅអនុវត្តក្នុងការងារប្រចាំថ្ងៃ។

គោលបំណងសំខាន់ៗនៃវគ្គបណ្តុះបណ្តាល រួមមាន៖

១. ការពង្រឹងសមត្ថភាព

- លើកកម្ពស់ចំណេះដឹង និងសមត្ថភាពរបស់មន្ត្រីអនុវត្តច្បាប់ និងអាជ្ញាធរពាក់ព័ន្ធ ក្នុងការទប់ស្កាត់ កំណត់សញ្ញាប្រឈម ឬសញ្ញាគ្រោះថ្នាក់ ព្រមទាំងផ្តល់ការគាំពារ និងជួយសង្គ្រោះជនរងគ្រោះឱ្យបានទាន់ពេលវេលា និងសមស្រប។

២. ការយល់ដឹងអំពីនីតិវិធី

- សិក្សា និងស្វែងយល់ឱ្យបានច្បាស់លាស់អំពីគោលការណ៍ណែនាំ បែបបទ និងនីតិវិធីពាក់ព័ន្ធនឹងការកំណត់អត្តសញ្ញាណជនរងគ្រោះដោយសារការជួញដូរមនុស្ស ព្រមទាំងការអនុវត្តតាមនីតិវិធីដែលបានកំណត់។

៣. ការទប់ស្កាត់ និងការឆ្លើយតប

- ពង្រឹងសមត្ថភាពក្នុងការសង្កេត ស្រាវជ្រាវ ស្វែងរក និងទប់ស្កាត់រាល់ករណី ឬសកម្មភាពដែលអាចពាក់ព័ន្ធនឹងការជួញដូរមនុស្ស ការកេងប្រវ័ញ្ច និងការរំលោភបំពានកម្លាំងពលកម្ម ព្រមទាំងចាត់វិធានការសមស្រប ដើម្បីការពារ និងជួយជនរងគ្រោះឱ្យបានទាន់ពេលវេលា៕

✅ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ
☎️ទំនាក់ទំនង 0188200300
👉Telegram Chanel : https://t.me/kticheckpoint
🗺 ទីតាំង (Map) : https://maps.app.goo.gl/HWxU68PC8A1wvTsR7?g_st=ipc

នាព្រឹកថ្ងៃអង្គារ ៤រោច ខែស្រាពណ៍ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី១ ខែកញ្ញា ឆ្នាំ២០២៦នេះ លោកឧត្តមសេនីយ៍ត្រី សុខ ធា...
01/09/2026

នាព្រឹកថ្ងៃអង្គារ ៤រោច ខែស្រាពណ៍ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី១ ខែកញ្ញា ឆ្នាំ២០២៦នេះ លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ បានដឹកនាំកម្លាំងប៉ុស្តិ៍ ដើម្បីរៀបចំសណ្តាប់ធ្នាប់ការពារថ្វាយ ព្រះរាជដំណើរព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យ ស្តេចយាងទៅរដ្ឋធានីប៉េកាំង នៃសាធារណរដ្ឋប្រជាមានិតចិន។

យាង និងអញ្ជើញថ្វាយព្រះរាជដំណើរព្រះករុណាជាអម្ចាស់ជីវិតលើត្បូង និងសម្ដេចព្រះវររាជមាតាជាតិខ្មែរ នៅអាកាសយានដ្ឋានអន្តរជាតិតេជោ នាឱកាសនោះរួមមាន សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ សម្ដេចវិបុលសេនាភក្ដី សាយ ឈុំ ឧត្តមប្រឹក្សាផ្ទាល់ព្រះមហាក្សត្រ សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ព្រមទាំង សម្ដេច ឯកឧត្តម លោកជំទាវ ជាឥស្សរជនជាតិ ព្រះញាតិវង្ស និងឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា៕

✅ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ
☎️ទំនាក់ទំនង 0188200300
👉Telegram Chanel : https://t.me/kticheckpoint
🗺 ទីតាំង (Map) : https://maps.app.goo.gl/HWxU68PC8A1wvTsR7?g_st=ipc

នាយប់ថ្ងៃចន្ទ ៣រោច ខែស្រាពណ៍ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី៣១ ខែសីហា ឆ្នាំ២០២៦នេះ លោកឧត្តមសេនីយ៍ត្រី សុខ ធា នា...
31/08/2026

នាយប់ថ្ងៃចន្ទ ៣រោច ខែស្រាពណ៍ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី៣១ ខែសីហា ឆ្នាំ២០២៦នេះ លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ បានដឹកនាំកម្លាំងប៉ុស្តិ៍ ដើម្បីរៀបចំសណ្តាប់ធ្នាប់ការពារជូន ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដឹកនាំគណៈប្រតិភូជាន់ខ្ពស់នៃអគ្គស្នងការដ្ឋាននគរបាលជាតិ ក្រសួងមហាផ្ទៃ ទៅបំពេញទស្សនកិច្ចនៅប្រទេសអូស្ត្រាលី។

អញ្ជើញជូនដំណើរ ឯកឧត្តម នាយឧត្តមសេនីយ៍ ស ថេត នៅអាកាសយានដ្ឋានអន្តរជាតិតេជោរួមមាន៖ ឯកឧត្តម លោកជំទាវ អគ្គស្នងការរង ប្រធាននាយកដ្ឋាន និងមន្រ្តីពាក់ព័ន្ធមួយចំនួនផងដែរ៕

✅ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ
☎️ទំនាក់ទំនង 0188200300
👉Telegram Chanel : https://t.me/kticheckpoint
🗺 ទីតាំង (Map) : https://maps.app.goo.gl/HWxU68PC8A1wvTsR7?g_st=ipc

នាព្រឹកថ្ងៃចន្ទ ៣រោច ខែស្រាពណ៍ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី៣១ ខែសីហា ឆ្នាំ២០២៦នេះ យោងតាមការណែនាំពីលោកឧត្តមសេ...
31/08/2026

នាព្រឹកថ្ងៃចន្ទ ៣រោច ខែស្រាពណ៍ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី៣១ ខែសីហា ឆ្នាំ២០២៦នេះ យោងតាមការណែនាំពីលោកឧត្តមសេនីយ៍ទោ ប្រធាននាយកដ្ឋានច្រកទ្វារទី១ ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ក្រោមការដឹកនាំរបស់លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ បានចាត់តាំងលោកស្រីវរសេនីយ៍ទោ វណ្ឌី ផល្លា នាយរងប៉ុស្តិ៍ ដឹកនាំកម្លាំង នៃប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ គោរពទង់ជាតិ នៃព្រះរាជាណាចក្រកម្ពុជា។

បន្ទាប់ពីគោរពទង់ជាតិរួច លោកស្រីវរសេនីយ៍ទោ វណ្ឌី ផល្លា បានមានប្រសាសន៍ ណែនាំការងារជំនាញ ផ្សព្វផ្សាយប្រកាសថ្មី ស្តីពីបទវិន័យនគរបាលជាតិកម្ពុជាលេខ៨៧៣ប្រក ចុះថ្ងៃទី៥ ខែមីនា ឆ្នាំ២០២៤ របស់ក្រសួងមហាផ្ទៃ និងការអនុវត្តការងារ(Cambodia E-Arrival)ចាប់ពីថ្ងៃ០១ ខែកញ្ញា ឆ្នាំ២០២៤។លោកស្រីវរសេនីយ៍ទោ វណ្ឌី ផល្លា ក៏បានផ្សព្វផ្សាយអនុក្រឹត្យលេខ១៧៧ អនក្រ.បក ស្តីពីឯកសណ្ឋាន សញ្ញាសម្គាល់ និងទង់នគរបាលជាតិរបស់រាជរដ្ឋាភិបាល។

ជាមួយគ្នានោះ លោកស្រីវរសេនីយ៍ទោ វណ្ឌី ផល្លា សូមឱ្យកម្លាំងមន្ត្រីទាំងអស់យកចិត្តទុកដាក់ជាមួយនឹងការពិនិត្យ ដូចជាការប្រើប្រាស់ប្រព័ន្ធបច្ចេកវិទ្យា(Smart gate)ឱ្យដំណើរដោយរលូន។ ចាប់ពីថ្ងៃទី១៥ ខែមិថុនា ឆ្នាំ២០២៦ រាជរដ្ឋាភិបាល នៃព្រះរាជាណាចក្រកម្ពុជា បានលើកលែងការផ្តល់ទិដ្ឋាការដល់ជនជាតិចិន ដែលកាន់លិខិតឆ្លងដែនប្រទេសចិន (ចិនដីគោក ហុងកុង និងម៉ាកាវ) រយៈពេល១៤ ថ្ងៃ។ ក្នុងនោះផងដែរ លោកឧត្តមសេនីយ៍ត្រី សុខធា នាយប៉ុស្តិ៍ បានក្រើនរំលឹក ដល់មន្ត្រីទាំងអស់ត្រូវយកចិត្តទុកដាក់ ក្រែងលោមានការភ័ន្តច្រឡំក្នុងការបំពេញបែបបទ។

លោកស្រីវរសេនីយ៍ទោ វណ្ឌី ផល្លា នាយរងប៉ុស្តិ៍ ក៏បានផ្សព្វផ្សាយបទបញ្ជារបស់ថ្នាក់ដឹកនាំ និងមតិណែនាំរបស់ឯកឧត្តម អគ្គនាយកអន្តោប្រវេសន៍ ជូនដល់កម្លាំងក្រោមឱវាទរបស់ប៉ុស្តិ៍អាកាសយានដ្ឋានអន្តរជាតិតេជោ៖ -កម្លាំងនគរបាលនៃប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ត្រូវតែចូលរួមយ៉ាងសកម្មបំផុតក្នុងការងារប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា online Scams នៅប្រទេសកម្ពុជា និងចូលរួមសហការបណ្តេញចេញជនបរទេសដែលពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា online Scams -ការរៀបចំបែបបទលើលិខិតបទដ្ឋាននានា ដែលឆ្លងកាត់ច្រកទ្វារ គ្រប់គ្រង និងកត់ត្រាទិន្នន័យតាមប្រព័ន្ធបច្ចេកវិទ្យា -ចូលរួមអនុវត្តតាមវិធានការសុខាភិបាលរបស់រាជរដ្ឋាភិបាល -សហការជាមួយសមត្ថកិច្ចពាក់ពន្ធ័នៅច្រកទ្វារ ដើម្បីបង្ការ ទប់ស្កាត់ បង្រ្កាបរាល់បទល្មើសគ្រប់ប្រភេទឆ្លងកាត់តាមច្រកទ្វារ -សម្រួលបែបបទចេញ-ចូល និងផ្តល់សេវាកម្មឱ្យឆាប់រហ័សជូនភ្ញៀវជាតិ និងអន្តរជាតិប្រកបដោយស្នាមញញឹម រួសរាយ រាក់ទាក់ពេលមកដល់អាកាសយានដ្ឋានអន្តរជាតិតេជោ -ការយកចិត្តទុកដាក់លើការងារជំនាញឱ្យបានត្រឹមត្រូវ និងសហការគ្រប់អង្គភាព ស្ថាប័ន អង្គការ និងស្ថានទូតពាក់ព័ន្ធនានា៕

✅ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ
☎️ទំនាក់ទំនង 0188200300
👉Telegram Chanel : https://t.me/kticheckpoint
🗺 ទីតាំង (Map) : https://maps.app.goo.gl/HWxU68PC8A1wvTsR7?g_st=ipc

ដោយទទួលបានការអនុញ្ញាតពី ឯកឧត្តម ឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍ និងលោកឧត្តមសេនីយ៍ទោ ស៊ឹម ចា...
26/08/2026

ដោយទទួលបានការអនុញ្ញាតពី ឯកឧត្តម ឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍ និងលោកឧត្តមសេនីយ៍ទោ ស៊ឹម ចាន់ណាក់ ប្រធាននាយកដ្ឋានច្រកទ្វារទី១ ព្រមទាំងមានការសម្របសម្រួលដោយ លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ នាព្រឹកថ្ងៃពុធ ១៣កើត ខែស្រាពណ៍ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី២៦ ខែសីហា ឆ្នាំ២០២៦នេះ ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ បានរៀបចំពិធីផ្សព្វផ្សាយអនុក្រឹត្យលេខ ១៧៧ ស្តីពីឯកសណ្ឋាន សញ្ញាសម្គាល់ និងទង់នគរបាលជាតិកម្ពុជា ក្រោមអធិបតីភាពលោកឧត្តមសេនីយ៍ទោ ឈាង ប៊ុនហុង អនុប្រធានអង្គភាពតម្រួតបទបញ្ជា នៃអគ្គស្នងការនគរបាលជាតិ ក្រសួងមហាផ្ទៃ ដែលប្រារព្ធធ្វើឡើងនៅប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ។

ក្នុងឱកាសនោះ លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ បានមានប្រសាសន៍ថា តាងនាមនាយរងប៉ុស្តិ៍ និងមន្ត្រីទាំងអស់នៃប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ សូមស្វាគមន៍យ៉ាងកក់ក្តៅចំពោះវត្តមានរបស់ លោកឧត្តមសេនីយ៍ទោ ឈាង ប៊ុនហុង អនុប្រធានអង្គភាពតម្រួតបទបញ្ជា និងប្រតិភូអម ដែលបានអញ្ជើញចុះមកធ្វើពិធីផ្សព្វផ្សាយអនុក្រឹត្យស្តីពីឯកសណ្ឋាន សញ្ញាសម្គាល់ និងទង់នគរបាលជាតិកម្ពុជា នៅប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ នាព្រឹកនេះ។

លោកឧត្តមសេនីយ៍ត្រី សុខ ធា បានមានប្រសាសន៍បន្តថា កម្លាំងប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ បានប្រកាន់ខ្ជាប់នូវការផ្តល់សេវាបដិសណ្ឋារកិច្ចល្អ និងការអនុវត្តជំនាញអន្តោប្រវេសន៍ជាប្រចាំ ជាពិសេសការអនុវត្ត និងគោរពវិន័យកងកម្លាំងនគរបាលជាតិយ៉ាងម៉ឺងម៉ាត់ លុបបំបាត់ការងារអសកម្ម និងការទទួលប្រាក់ធីប។ កម្លាំងទាំងអស់ត្រូវប្រជុំជួរ គោរពគំនាប់ជាប្រចាំ មុនចូលវេនបំពេញការងារ។

លោកឧត្តមសេនីយ៍ត្រី សុខ ធា បានមានប្រសាសន៍បន្តទៀតថា ក្នុងនាមជានាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ រួមទាំងនាយរងប៉ុស្តិ៍ នាយផ្នែក នាយរងផ្នែក និងមន្ត្រីទាំងអស់ សូមអនុវត្តតាមការណែនាំដែលបានផ្សព្វផ្សាយអនុក្រឹត្យស្តីពីឯកសណ្ឋាន សញ្ញាសម្គាល់ និងទង់នគរបាលជាតិនាពេលនេះ។ យើងទាំងអស់គ្នានឹងប្តេជ្ញាចិត្តយ៉ាងមុតមាំ ក្នុងការប្រើប្រាស់ឯកសណ្ឋាន គ្រឿងឥស្សរិយយស និងសញ្ញាសម្គាល់ផ្លូវការរបស់កងកម្លាំងនគរបាលជាតិ ឱ្យបានត្រឹមត្រូវ ស្របតាមអនុក្រឹត្យ និងការណែនាំរបស់ក្រសួងមហាផ្ទៃ ដើម្បីឱ្យការអនុវត្តមានប្រសិទ្ធភាពខ្ពស់។

មានប្រសាសន៍នាឱកាសនោះ លោកឧត្តមសេនីយ៍ទោ ឈាង ប៊ុនហុង អនុប្រធានអង្គភាពតម្រួតបទបញ្ជា បានថ្លែងអំណរគុណយ៉ាងជ្រាលជ្រៅចំពោះ លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ លោក លោកស្រី អ្នកនាង កញ្ញា ជានាយរងប៉ុស្តិ៍ នាយផ្នែក នាយរងផ្នែក និងមន្ត្រីទាំងអស់ ដែលបានអញ្ជើញចូលរួមក្នុងកម្មវិធីនាពេលនេះ។

លោកឧត្តមសេនីយ៍ទោ អនុប្រធានអង្គភាព ក៏បានធ្វើបទបង្ហាញអំពីការស្លៀកពាក់ឯកសណ្ឋានរបស់មន្ត្រីនគរបាលជាតិ រួមទាំងស្លាកសញ្ញាតាមច្បាប់ និងលិខិតបទដ្ឋានគតិយុត្តពាក់ព័ន្ធ ដើម្បីឱ្យមន្ត្រីអនុវត្តបានត្រឹមត្រូវក្នុងការបំពេញភារកិច្ច ក្នុងនាមជាកងកម្លាំងនគរបាលជាតិកម្ពុជា។

លោកឧត្តមសេនីយ៍ទោ ឈាង ប៊ុនហុង មានប្រសាសន៍ថា បទវិន័យនគរបាលជាតិកម្ពុជា សំដៅដល់ក្រមសីលធម៌វិជ្ជាជីវៈ និងវិន័យ ដែលជាសំណុំវិធាន ឬបទប្បញ្ញត្តិសម្រាប់ដឹកនាំ ណែនាំ អប់រំ និងទូន្មានមន្ត្រីនគរបាលជាតិ ដើម្បីលើកកម្ពស់សីលធម៌ តម្លៃ សេចក្តីថ្លៃថ្នូរ ឧត្តមភាព កិត្យានុភាព និងជំនឿទុកចិត្ត ព្រមទាំងណែនាំ និងតម្រង់ទិសដល់មន្ត្រីនគរបាលជាតិ ឱ្យប្រព្រឹត្តអំពើល្អ និងត្រឹមត្រូវ ក្នុងការបំពេញភារកិច្ចរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ជូនប្រទេសជាតិ និងប្រជាពលរដ្ឋ។

លោកឧត្តមសេនីយ៍ទោ បានបន្តថា បទវិន័យនគរបាលជាតិកម្ពុជា មាន ៥ ចំណុចសំខាន់ៗ រួមមាន៖ សិទ្ធិ និងកាតព្វកិច្ច ក្រមសីលធម៌វិជ្ជាជីវៈ វិន័យ ការលើកសរសើរ និងការផ្តល់រង្វាន់ និងការដាក់ទណ្ឌកម្ម។

លោកឧត្តមសេនីយ៍ទោ ឈាង ប៊ុនហុង អនុប្រធានអង្គភាពតម្រួតបទបញ្ជា បានសង្កត់ធ្ងន់ថា មន្ត្រីនគរបាលជាតិកម្ពុជា មានសិទ្ធិ និងសេរីភាពដូចប្រជាពលរដ្ឋដទៃទៀត ស្របតាមលក្ខខណ្ឌដែលមានចែងក្នុងច្បាប់ និងលិខិតបទដ្ឋានគតិយុត្តពាក់ព័ន្ធ។ មន្ត្រីនគរបាលជាតិកម្ពុជា ត្រូវមានភក្តីភាពចំពោះជាតិ សាសនា ព្រះមហាក្សត្រ និងមានភាពអង់អាចក្លាហាន ហ៊ានធ្វើពលិកម្មនៅគ្រប់កាលៈទេសៈទាំងអស់ ដើម្បីបុព្វហេតុជាតិ មាតុភូមិ និងប្រជាពលរដ្ឋ។ មន្ត្រីនគរបាលជាតិកម្ពុជា ត្រូវគោរព និងអនុវត្តតាមបញ្ជារបស់ថ្នាក់ដឹកនាំ តាមឋានានុក្រម ក្នុងការបំពេញភារកិច្ចរបស់ខ្លួន៕

✅ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ
☎️ទំនាក់ទំនង 0188200300
👉Telegram Chanel : https://t.me/kticheckpoint
🗺 ទីតាំង (Map) : https://maps.app.goo.gl/HWxU68PC8A1wvTsR7?g_st=ipc

Address

12000 មហាវិថី សហព័ន្ធរុស្ស៊ី
Phnom Penh
120911

Website

Alerts

Be the first to know and let us send you an email when ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ KTI Check-Point posts news and promotions. Your email address will not be used for any other purpose, and you can unsubscribe at any time.

Shortcuts

Share

Category