03/01/2026
ថាសរសេររឿងនេះតាំងពីថ្ងៃទី០១ ខែមករា មកម៉្លេះ ប៉ុន្តែដោយសារតែស្ថានភាណសុខភាពមិនអំណោយផលក៏មិនបានចែករំលែក។ សង្ឃឹមថានេះមិនមែនជាព័ត៌មានផ្អូមទៅចុះ សម្រាប់ប្រិយមិត្តដែលចូលចិត្តអាន។
ជានិច្ចកាលនៅរៀងរាល់ពេលឆ្លងឆ្នាំចាស់ផ្លាស់ចូលឆ្នាំថ្មី បណ្តាសារព័ត៌មាននានាតែងតែលើកយកបណ្តាទំនាយរបស់គ្រូទាយល្បីៗដែលបានទស្សន៍ទាយពីជោគវាសនាប្រទេសជាតិ និងពិភពលោក ដែលក្នុងនោះគ្រូទាយដែលពេញនិយមបំផុតគឺលោកយាយពិការភ្នែកបាបា វ៉ាន់ហ្កា (Baba Vanga) ជនជាតិប៊ុលហ្ការី ដែលបានស្លាប់កាលពីឆ្នាំ១៩៩៦ ក្នុងវ័យ៨៥ឆ្នាំ។ លោកយាយបាបាវ៉ាន់ហ្កា ត្រូវបានគេផ្តល់រហ័សនាមថាជាណូស្ត្រាដាម៉ុសនៃតំបន់បាល់កង់ “Nostradamus of the Balkans”។ (បើនិយាយអំពីរឿងទស្សន៍ទាយ ណូស្រ្តាដាម៉ុស ត្រូវបានគេចាត់ទុកថាជាស្តេចគ្រូទាយនៅលើពិភពលោក ប្រវត្តិលំអិតរបស់លោកខ្ញុំធ្លាប់សរសេររួចមកហើយ)។ ការទស្សន៍ទាយរបស់លោកយាយទាំងឡាយរបស់សាវកសរសេរចងក្រងទុក ហើយភាគច្រើនមានលក្ខណៈប្រៀបធៀប និងមិនមានកាលបរិច្ឆេទច្បាស់លាស់ ១០០% នោះទេ ហើយក៏មានខ្លះមិនបានកើតឡើងផងដែរ។ បើទោះលោកយាយបានស្លាប់តាំងពីឆ្នាំ១៩៩៦ ប៉ុន្តែការទស្សន៍ទាយរបស់លោកយាយអំពីអនាគតមានរៀងរាល់ឆ្នាំរហូតដល់ថ្ងៃអវសាននៃផែនដីក្នុងឆ្នាំ៣៧៩៧។ ការទស្សន៍ទាយដែលច្បាស់លាស់បំផុតកន្លងមករួមមាន៖
• គ្រោះថ្នាក់ចរាចរណ៍ និងការស្លាប់របស់ព្រះនាងដាយអាណា
• ការងើបឡើងរបស់ក្រុមមូស្លីមជ្រុលនិយម ()
• ការវាយប្រហារភេរវកម្ម9/11
• គ្រោះធម្មជាតិរលកយក្សត្សូណាមិឆ្នាំ២០០៤
• ប្រធានាធិបតីទី៤៤ របស់អាម៉េរិកគឺមានស្បែកខ្មៅ
សម្រាប់នៅក្នុងឆ្នាំ២០២៦នេះ ទំនាយរបស់លោកយាយមានចំនួន៧គឺ៖
១. ជម្លោះវិវាទជាសាកលកើនឡើង ហើយរាលដាលទៅជាសង្រ្គាមលោកលើកទី៣
លោកបានទស្សន៍ទាយអំពីប្រការដ៏គួរឱ្យព្រួយបារម្ភបំផុតមួយនោះគឺលទ្ធភាពនៃសង្គ្រាមសកលទ្រង់ទ្រាយធំមួយនឹងផ្ទុះឡើងនៅឆ្នាំ២០២៦នេះ ជាពិសេសគឺការប៉ះទង្គិចគ្នាកាន់តែខ្លាំងឡើងរវាងមហាអំណាចធំៗនៅលោកដូចជាអាម៉េរិក ចិន រុស្សីជាដើម ហើយការប្រឈមមុខដាក់គ្នាបែបនេះអាចរាលដាលឆ្លងកាត់ព្រំដែន និងនាំឱ្យមានអស្ថិរភាពនយោបាយសាកលយូរអង្វែងជាជាងជម្លោះរយៈពេលខ្លី។ បើយើងពិនិត្យមើលស្ថានការណ៍ពេលបច្ចុប្បន្ននេះគឺវាកំពុងកើតឡើងហើយរាប់ចាប់តាំងពីរឿងនៅផ្ទះយើងជម្លោះកម្ពុជាថៃ បញ្ហាកំពុងតានតឹងនៅកោះតៃវ៉ាន់ សង្រ្គាមរុស្សី អ៊ុយក្រែន ប្រតិបត្តិការយោធាអាម៉េរិកនៅវេណេហ្សេអ៊ុយឡា រឿងរ៉ាវនៅមជ្ឈឹមបូព៌ា និងរឿងថ្មីបំផុតនោះគឺការប៉ះទង្គិចនៅពិភពអារ៉ាប់។
២. អាស៊ីនឹងមានឥទ្ធិពលខ្លាំងឈានទៅរកការផ្លាស់ប្តូរអំណាចត្រួតត្រាសាកលលោក
លោកយាយបានទាយថាមជ្ឈមណ្ឌលបណ្តុំអំណាចគ្រប់គ្រងពិភពលោកនៅឆ្ពោះមកកាន់ទ្វីបអាស៊ីវិញ ជាពិសេសគឺមហាយក្សចិនដែលនឹងធ្វើឲ្យមានការផ្លាស់ប្តូរអំណាចត្រួតត្រានេះ។ មហាយក្សចិននឹងពង្រីកឥទ្ធិពលខ្លាំងឡើងៗតាមរយៈរឿងតៃវ៉ាន់ ហើយបន្តិចម្តងនៅមានការផ្លាស់ប្តូរភូមិសាស្រ្តនយោបាយ និងឈានទៅរកផលវិបាកសេដ្ឋកិច្ចសាកលជាលក្ខណៈយូរអង្វែង។
៣. ការធ្លាក់ចុះសេដ្ឋកិច្ច និងអស្ថិរភាពហិរញ្ញវត្ថុ
វិបត្តិសេដ្ឋកិច្ចគឺជាប្រធានបទដដែលៗមួយទៀតដែលភ្ជាប់ទៅនឹងការទស្សន៍ទាយឆ្នាំ ២០២៦ របស់លោកយាយបាបា វ៉ាន់ហ្គា។ បើយោងតាមសារព័ត៌មាន Express និង Sky History បានដកស្រង់សេចក្តីព្រមានរបស់លោកយាយអំពីអស្ថិរភាពហិរញ្ញវត្ថុជាបន្តបន្ទាប់ដែលសល់ពីឆ្នាំមុនៗរួមមាន ភាពតានតឹងផ្នែកធនាគារ ការរំខានដល់រូបិយប័ណ្ណ ការធ្លាក់ចុះនៃទីផ្សារ និងការកើនឡើងនៃអតិផរណា។ ខណៈពេលដែលការបកស្រាយខ្លះដាក់កម្រិតកំពូលនៃភាពចលាចលហិរញ្ញវត្ថុនៅឆ្នាំ ២០២៥ ការបកស្រាយផ្សេងទៀតបានបង្ហាញថាផលប៉ះពាល់អាចពង្រីកដល់ឆ្នាំ ២០២៦ ដែលធ្វើឱ្យមានភាពមិនប្រាកដប្រជាកាន់តែខ្លាំងឡើងសម្រាប់ទីផ្សារពិភពលោក។
៤. គ្រោះមហន្តរាយធម្មជាតិ និងភាពវឹកវរនៃអាកាសធាតុ
លោកយាយាបាបា វ៉ាន់ហ្គា បានទស្សន៍ទាយអំពីគ្រោះមហន្តរាយធម្មជាតិធ្ងន់ធ្ងរនៅឆ្នាំ២០២៦រួមមាន ការរញ្ជួយដីដ៏ខ្លាំងក្លា ការផ្ទុះភ្នំភ្លើង ទឹកជំនន់ និងព្រឹត្តិការណ៍អាកាសធាតុអាក្រក់។ យោងតាម Metro UK និង LADbible ទាំងនេះ នៅគ្រោះមហន្តរាយក្នុងឆ្នាំ២០២៦ និងការបម្រែបម្រួលអាកាសធាតុ នឹងធ្វើឲ្យដែនដីគោករបស់ផែនដីប្រមាណ៧-៨% អាចរងផលប៉ះពាល់។
៥. យុគនៃបញ្ញាសិប្បនិម្មិត(AI) និងការបាត់បង់នៃការគ្រប់គ្រងរបស់មនុស្ស
យោងតាមសារព័ត៌មាន Express និង Mirror UK លោកយាយ Baba Vanga បានព្រមានថា ការរីកចម្រើនយ៉ាងឆាប់រហ័សនៃ AI អាចឈានដល់ចំណុចមួយដែលម៉ាស៊ីនចាប់ផ្តើមគ្របដណ្ដប់លើវិស័យសំខាន់ៗនៃជីវិតមនុស្ស។ ការបកស្រាយទាំងនេះបង្ហាញថាឆ្នាំ ២០២៦ ជាចំណុចរបត់មួយ នៅពេលដែលវឌ្ឍនភាពបច្ចេកវិទ្យាលើកឡើងនូវសំណួរសីលធម៌ និងសីលធម៌អំពីការគ្រប់គ្រង ការសម្រេចចិត្ត និងដែនកំណត់នៃការច្នៃប្រឌិត។
៦. ការអះអាងពីការទាក់ទងជាមួយមនុស្សភពក្រៅ
នេះជាការព្យាករណ៍ដ៏គួរឲ្យចាប់អារម្មណ៍បំផុតមួយដែលថាក្នុងឆ្នាំ២០២៦ យើងអាចមានទំនាក់ទំនងដោយផ្ទាល់លើកដំបូងបំផុតជាមួយនឹងសភាវៈមានជីវិតមកពីក្រៅភព។ ទស្សនាវដ្តី Mirror and Sky History បានរាយការណ៍ថាលោកយាយ Baba Vanga បានពិពណ៌នាអំពីវត្ថុធំមួយ ឬយានអវកាសដ៏ធំមួយនឹងចូលមកគន្លងបរិយាកាសរបស់ផែនដី។ ការទស្សន៍ទាយនេះគឺវាសមស្របជាមួយនឹងរបាយការណ៍របស់តារាវិទូដែលបានរកឃើញ 3I/ATLAS ដែលជាព្រឹត្តិការណ៍តារាសាស្ត្រដ៏សំខាន់បំផុតមួយកាលពីខែកក្កដា ឆ្នាំ២០២៥ និងដើមឆ្នាំ២០២៦នេះ។ វាគឺជា "វត្ថុអន្តរតារា" (Interstellar Object) ទី៣ ដែលមនុស្សជាតិបានរកឃើញថាបានធ្វើដំណើរមកពីប្រព័ន្ធផ្កាយផ្សេង ចូលមកក្នុងប្រព័ន្ធព្រះអាទិត្យរបស់យើង ដែលវាគឺជាអ្នកនាំសារពីទីអវកាសដ៏សែនឆ្ងាយ ដែលផ្តល់ឱកាសឱ្យអ្នកវិទ្យាសាស្ត្រសិក្សាពីពិភពផ្កាយដទៃ ដោយមិនចាំបាច់ធ្វើដំណើរទៅដល់ទីនោះ។
៧. ការផ្លាស់ប្តូរនយោបាយ និងភាពមិនប្រាកដប្រជានៃភាពជាអ្នកដឹកនាំ
លោកយាយបានផ្តោតទៅលើរុស្សីដែលនឹងមានភាពចលាចលនយោបាយដោយនឹងលេចចេញនូវវត្តមានមេដឹកនាំជំនាន់ថ្មីមួយនៅក្នុងប្រមាណឆ្នាំ២០២៦នេះ ហើយវានឹងបង្កើនសំណួរអំពីភាពមិនប្រាកដប្រជាអំពីអនាគតរបស់អ៊ុយក្រែនផងដែរព្រមទាំងបញ្ហាស្ថិរភាពក្នុងតំបន់។
កំណត់សំគាល់
បើទោះជាមានការចាប់អារម្មណ៍ជាបន្តបន្ទាប់កន្លងមកជាមួយនឹងការព្យាករណ៍របស់លោកយាយ Baba Vanga ក៏ដោយ បណ្តាអ្នកជំនាញនានា និងអ្នកប្រវត្តិសាស្ត្របានគូសបញ្ជាក់ម្តងហើយម្តងទៀតថា មិនមានមូលដ្ឋានវិទ្យាសាស្ត្រ ឬឯកសារស្រាវជ្រាវផ្លូវការទាក់ទងការព្យាករណ៍ទាំងនេះទេ។ ការវិភាគ និងសម្រេចចិត្តនានានៅពេលវាយតម្លៃអនាគត ក្រុមអ្នកជំនាញទាំងនោះបាន ណែនាំឱ្យពឹងផ្អែកលើការវិភាគភូមិសាស្ត្រនយោបាយ វិទ្យាសាស្ត្រ និងសេដ្ឋកិច្ចដែលបានផ្ទៀងផ្ទាត់ ជាជាងលើការព្យាករណ៍ដ៏អាថ៌កំបាំង។ ដោយឡែកបណ្តាអ្នករិះគន់បានអះអាងថារាល់ការបង្ហាញអំពីទំនាយរបស់លោកយាយវាគ្រាន់តែជាការដាក់បន្ទុកមួយទៀតលើផ្នែកអារម្មណ៍ក្នុងខណៈពេលដែលពិភពលោកទាំងមូលកំពុងតែស្រ្តេសខ្លាំងនោះទេ។ យ៉ាងណាក៏ដោយ កេរ្តិ៍ឈ្មោះ របស់លោកយាយបាបា វ៉ាន់ហ្កា នៅតែជាផ្នែកមួយនៃវប្បធម៌ពេញនិយម និងជាចំណីអារម្មណ៍មួយសម្រាប់បណ្តាសារព័ត៌មាន និងមនុស្សទូទៅ។
