06/09/2026
وفاة 3 أشقاء في حريق منزلهم ...
اليوم في الزرقاء، وتحديدا في حي الأمير محمد،
كان في عيلة نايمين بشقتهم بالطابق الرابع والأخير من عمارة سكنية.
الأب والأم بغرفتهم، ومعهم بنتهم الصغيرة ماريا،
وبالغرفة الثانية، أولادهم الاثنين آدم ويحيى نايمين.
أولاد صغار، وأختهم رضيعة لساتها ما كملت سنتها الأولى.
وبحدود وقت صلاة الفجر، صحي الأب والأم،
بنتهم مش قادرة تتنفس، وفي ريحة حرق بالبيت!
الأب اكتشف إنه النار بغرفة أولاده آدم ويحيى.
أولاده جوا الغرفة،
حاول ينقذهم، بس للأسف ما قدر.
تواصل فورا مع الدفاع المدني،
وكانت الاستجابة سريعة جدا.
بس النار كانت بلشت من غرفة الولدين وامتدت لباقي البيت،
والدخان وصل للغرفة اللي فيها الأب والأم وماريا.
فرق الإطفاء اشتغلت على إخماد الحريق والسيطرة عليه،
العم بقول:"لا ولا قوة إلا بالله، آدم ويحيى توفوا من الحريق!"
أما ماريا، فطلعت من الغرفة وهي لساتها عايشة.
العم بقول:
"البنت بس طلعناها من الغرفة مع أمها وأبوها، كانت عايشة، بس لما وصلت المستشفى توفت!"
ماريا توفت إثر الاختناق بالدخان.
الرضيعة اللي صحيوا أهلها وهي مش قادرة تتنفس،
فقدوها هي كمان، مع إخوانها آدم ويحيى.
أما الأب والأم، فانصابوا بحروق مختلفة وضيق بالتنفس.
فرق الإسعاف قدمت لهم الإسعافات الأولية اللازمة،
ونقلتهم لمستشفى الزرقاء الحكومي.
وعم الأطفال بقول:
"الحمدلله الأب جروح بسيطة، بس الأم حاليا عندها صدمة عصبية،
الله يكون بعونهم!"
الحريق بلش بسبب شورت أو تماس كهربائي بمروحة كانت بغرفة الولدين.
مروحة كانت شغالة بهالأجواء الحارة.
آدم ويحيى وماريا هم كل أولاد هالأب والأم،
ما عندهم أولاد غيرهم.
ناموا وأولادهم الثلاثة معهم بالبيت،
ومع بداية هالأسبوع، كانوا فقدوهم كلهم.
واليوم، تشييعهم الثلاثة بعد صلاة الظهر في الهاشمية.
آدم، ويحيى، وماريا،
ثلاثة أشقاء، رح يودعوهم بنفس اليوم.
الله يصبرهم،
شو ممكن الواحد يحكي قدام وجع أب وأم فقدوا كل أولادهم بفجر واحد؟
الله يرحم آدم ويحيى وماريا، ويجعلهم شفعاء لوالديهم.
الله يشفي الأب والأم، ويصبرهم صبر من عنده، ويربط على قلوبهم،
ويعينهم على هالمصاب.
إنا لله وإنا إليه راجعون.
"صورة أكبر الإخوة، آدم ضياء نقرش"
#الأردن #متداول #منقول #الزرقاء
