03/06/2026
الفصل التعسفي في القطاع الخاص.
أصدقائي ومتابعيني الأعزاء، هواية تجيني استفسارات من شباب يشتغلون بشركات خاصة وفجأة صاحب العمل يگولهم: الوضع تعبان وقررنا نقلص العمال، وقع استقالتك!"..
اليوم راح أحجيلكم قصة (أحمد) اللي صارت وياه نفس المشكلة:
أحمد موظف مجدّ وبنفس الوقت عنده عائلة وإيجار بيت. بيوم من الأيام، مدير الموارد البشرية بالشركة صاحه وسلمة ورقة وگاله: "وقع استقالتك لأن راح نقلص العمال"!
أحمد انصدم، بس تذكر نصيحة قانونية مهمة: (أبد لا توقع على استقالة وأنت مجبر، لأن التوقيع يعني تنازلت عن حقك برضاك!).
بدل ما يستسلم ويوقع، شال أوراقه وعقد العمل وتوجه بوعي وثقة إلى محكمة العمل. وهناك تبين أن الشركة ما اتبعت الشروط الصارمة اللي يفرضها القانون العراقي لتقليص العمالة، وإنما جان مجرد عذر للتخلص منه.
والنتيجة المحكمة أصدرت حكمها العادل بإلزام الشركة بإعادة أحمد لشغله فوراً، وصرف كل رواتبه عن الفترة اللي انقطع بيها، مع تعويضه عن الفصل التعسفي!
#نصيحة .
إنهاء خدماتك بحجة "تقليص العمالة" أو "قلة الشغل" مو معناه صاحب العمل بكيفه يطردك ويجبرك تستقيل. قانون العمل العراقي يحميك بظهر قوي 💪🏼 وينطيك الحق تلجأ للقضاء حتى ترجع لشغلك وتاخذ تعويضك كامل
نصيحتين خلوها بالكم دائماً:
1️⃣ أبد لا توقّع على أي ورقة استقالة أو مخالصة إذا جنت مجبور أو تحت الضغط.
2️⃣ قبل ما تتخذ أي خطوة أو توقّع أي شي، استشر محامي مختص بقضايا العمل حتى يضمن حقك ويحميك.
شاركونا بالتعليقات.. هل تعرضتوا أو شفتوا أحد تعرض لمثل هذا الموقف؟👇
