22/07/2026
KERALA STATE HUMAN RIGHTS COMMISSION
e-mail : [email protected], Phone No. 0471-2307490.
പട്ടയമില്ലാത്തതിനാൽ വീടിന്റെ അറ്റകുറ്റപണികൾ നടത്താനാവുന്നില്ല: പരാതി പരിഹരിക്കണം : മനുഷ്യവകാശ കമ്മീഷൻ.
പത്തനംതിട്ട : പട്ടയം ഇല്ലാത്തതിനാൽ ഇടിഞ്ഞു വീഴാറായ വീടിന്റെ അറ്റകുറ്റപ്പണികൾ നടത്താൻ കഴിയുന്നില്ലെന്ന പരാതിയിൽ വീടിരിക്കുന്ന സ്ഥലമെങ്കിലും പതിച്ചു നൽകാതിരിക്കുന്നത് നീതിയുക്തമല്ലെന്ന് മനുഷ്യാവകാശ കമ്മീഷൻ ചെയർപേഴ്സൺ ജസ്റ്റിസ് അലക്സാണ്ടർ തോമസ്.
ഭാവിയിൽ റോഡ് വികസനത്തിന് ആവശ്യമായ സ്ഥലം പോയിട്ട് അവശേഷിക്കുന്ന വീടിരിക്കുന്ന ഭാഗം പതിച്ചുനൽകാൻ പൊതുമരാമത്ത് നിരത്ത് വിഭാഗം എക്സിക്യുട്ടീവ് എഞ്ചിനീയർ (പത്തനംതിട്ട ഡിവിഷൻ) നടപടി സ്വീകരിക്കണമെന്ന് കമ്മീഷൻ നിർദ്ദേശിച്ചു. സ്വന്തം ചെലവിൽ വീടിന്റെ അറ്റകുറ്റപണികൾ നടത്താൻ പരാതിക്കാരൻ പന്തളം മുൻസിപ്പൽ സെക്രട്ടറിക്ക് അപേക്ഷ നൽകിയാൽ ഉചിതമായ നടപടികൾ സ്വീകരിക്കണമെന്നും ഉത്തരവിൽ പറഞ്ഞു.
പന്തളം കുറമ്പാല സാത്ത് സ്വദേശി ശിവരാമന്റെ പരാതിയിലാണ് നടപടി. പട്ടികജാതി വിഭാഗത്തിലുള്ള പരാതിക്കാരൻ താമസിക്കുന്ന വീടിന് 50 വർഷത്തിനുമേൽ പഴക്കമുണ്ടെന്നും വസ്തുവിന് പട്ടയം ലഭിക്കാത്തതിനാൽ വീട് പുതുക്കി പണിയാനാവുന്നില്ലെന്നും പരാതിയിൽ പറയുന്നു.
റോഡ് വികസനത്തിനുള്ള സ്ഥലത്തിന്റെ ബാക്കി പരാതിക്കാരന് പതിച്ചു നൽകാൻ പൊതുമരാമത്ത് വകുപ്പിന്റെ നിരാക്ഷേപ പത്രം വേണമെന്നും ഇതിനുവേണ്ടി പൊതുമരാമത്ത് വകുപ്പിന് കത്ത് നൽകിയിട്ടുണ്ടെന്നും അടൂർ തഹസിൽദാർ കമ്മീഷനെ അറിയിച്ചു.
Kerala State Human Rights Commission
20 / 07 / 20 26
