28/04/2026
कामोठे येथे कायदेविषयक जनजागृती कार्यक्रम संपन्न
कामोठे (प्रतिनिधी) – सुषमा पाटील महाविद्यालय व ज्युनिअर कॉलेज, कामोठे येथे आज तालुका विधी सेवा समिती, पनवेल तसेच पनवेल वकील संघटना यांच्या संयुक्त विद्यमाने कायदेविषयक जनजागृती कार्यक्रम उत्साहात पार पडला.
या कार्यक्रमात पॅनल वकिलांमार्फत विद्यार्थ्यांना विविध महत्त्वपूर्ण कायद्यांविषयी मार्गदर्शन करण्यात आले. यामध्ये भारतीय संविधानाच्या भाग IV-A अंतर्गत मूलभूत कर्तव्ये, बालकांचा मोफत व सक्तीच्या शिक्षणाचा हक्क कायदा, 2009, बाल लैंगिक गुन्ह्यांपासून संरक्षण कायदा, 2012 (पॉक्सो कायदा), नालसा (मुलांसाठी बाल-स्नेही कायदेशीर सेवा) योजना, 2024 यांसह बालभिक्षा मागणे, बालमजुरी, बाल तस्करी व बालविवाह मुक्त भारत या विषयांवर सविस्तर माहिती देण्यात आली.
कार्यक्रमात ॲड. विकी दुसिंग, ॲड. नागेश हिरवे, ॲड. अमोल खिल्लारे तसेच PLV शैलेश कोंडसकर यांनी मनोगत व्यक्त करून विद्यार्थ्यांना मार्गदर्शन केले. तसेच वरिष्ठ लिपिक हेमंत आंबेतकर यांनी उपस्थित राहून कार्यक्रमाची शोभा वाढवली.
कार्यक्रमास महाविद्यालयाचे मुख्य कार्यकारी अधिकारी आदरणीय पनवेलकर सर यांची प्रमुख उपस्थिती लाभली. तसेच मुख्याध्यापकांनी सर्व मान्यवरांचे स्वागत करून कार्यक्रमाची सुरुवात केली.
या कार्यक्रमास 200 पेक्षा अधिक विद्यार्थ्यांची उपस्थिती लाभली. विद्यार्थ्यांमध्ये कायद्याविषयी जागरूकता निर्माण करण्यासाठी असा कार्यक्रम अत्यंत उपयुक्त ठरला असून, उपस्थित विद्यार्थ्यांनी याचा मोठ्या प्रमाणावर लाभ घेतला.
