14/04/2023
𝗠𝗮𝗱𝗮𝗻𝗺 #𝗙𝗼𝘂𝘁𝗯𝗼𝗹𝗲̀ 𝗺𝗮𝘄𝗼𝗸𝗲𝗻 #𝗔𝗰𝗵𝗿𝗮𝗳 #𝗛𝗮𝗸𝗶𝗺𝗶 𝗺𝗮𝗻𝗱𝗲 𝗱𝗶𝘃𝗼̀𝘀 𝗹𝗲̀ 𝗽𝗼𝘂 𝗯𝘆𝗲𝗻 𝘀𝗲𝗽𝗮𝗿𝗲 𝘁𝗼𝘂𝘁 𝘀𝗼𝘂 𝗻𝗼𝗻 #𝗺𝗮𝗻𝗺𝗮𝗻 #𝗛𝗮𝗸𝗶𝗺𝗶 🥺.
💢 𝗦𝗶 𝘀𝗲 𝘁𝗲 𝗻𝗮𝗻 𝗣𝗲𝘆𝗶 #𝗗𝗮𝘆𝗶𝘁𝗶 🇭🇹 𝗸𝗼𝗺𝗮𝗻 𝘀𝗮 𝘁𝗮𝗽 𝘆𝗲 ? 𝗘𝘀𝗸𝗲 𝗳𝗶 𝗮 𝘁𝗮𝗽 𝗽𝗲̀𝗱𝗶 𝗻𝗲̀𝘁? 🤔
📌Pou nou reponn kesyon sa ann gade ansanm kisa di nan peyi Maroc sou divòs ak separasyon byen :
Rejim legal la nan peyi Maroc se rejim separasyon byen , nan atik 49 lwa sou la fanmiy nan peyi sa di chak konjwen yo jere patrimwan ki pwòp a yo pandan maryaj la e yo ap rekipere patrimwan yo apre divòs.
Refòm kòd la fanmiy ki fenk fèt nan peyi sa bay posibilite pou epou yo etabli yon kontra maryaj kote yap prevwa jesyon byen yo fè pandan maryaj la , kontra sa ap redije pa vwa “Adoulaire” ki vle di vwa notaryal . Nan kontra sa ki dwe separe ak ak maryaj la epou yo dwe mete yo dakò sou kloz yo ki pa dwe kontrè ak bi maryaj la selon atik 39 kod la fanmiy peyi sa .
Nan ka madanm Hakimi a eske li te fè kontra m pa konnen men si pat gen kontra otomatikman se rejim legal la ki ap aplike kote chak moun ap kite ak pwop patrimwan paw. Rejim sa diferan de rejim legal pa nou an an Ayiti kote tout byen ki fet nan maryaj la se pou nou 2 50-50. Rejim legal nan peyi Maroc plis sanble ak rejim separasyon byen nou an .
Lè foutbolè a mete tout byen sou non manmanl la sa vle di li pa posede anyen se kòmsi li fè don tout sa li posede a Manmanl . Pandan lanmou an te woz la te sipoze met kontwol sou fason byen sa yo ap jere , kote yo ye e pou ranje koze li anka ke ta vin gen divòs.
Pou lakay pa nou mesye dam ann gade pi ba chak rejim yo nan peyi Dayiti pou nou konnen kijan nap marye pou sa ki rive Madan Hakimi a pa rive nou:
Depi’w wè Rejim matrimonial ou dwe konnen ke se yon ansanb règ jiridik ki destine pou òganize rapò sa ki gen pou wè ak patrimwan antr, yon kote epou yo antre yo e, yon lot kote antr epou yo ak lot moun. An Ayiti Yon koup ki vle marye gen chwa pou li chwazi rejim li vle a.
Men jan sa te ye lontan sa vin chanje apre yon dekrè Prezidan Jovenel te pran nan dat 9 avril 2020 an.
𝗔𝗻𝗻 𝗴𝗮𝗱𝗲 𝗿𝗲𝗷𝗶𝗺 𝘆𝗼 𝗮𝗻𝘀𝗮𝗻𝗺:
Nan dwa nou an nan peyi Dayiti ou ka marye sou :
- Rejim kominote légal
- Rejim kominote de mèb réduit ozakè
- Rejim kominote a tit inivèsel
- Rejim separasyon BYEN
- Rejim dotal
Ann gade ansanm kisa chak rejim yo gen ladan yo :
🔴𝗥𝗲𝗷𝗶𝗺 𝗸𝗼𝗺𝗶𝗻𝗼𝘁𝗲 𝗹𝗲́𝗴𝗮𝗹:💍
Depi w'ap marye ou pa chwazi fè kontra sou pyès Rejim otomatikman ou marye sou Rejim kominote legal. Se rejim pifò ayisyen marye . Nan rejim sa gen 3 patrimwan ke nou dwe konnen ki konpoze kominote a. Gen byen pwòp mari a , byen pwòp madanm nan ak byen komen.
Byen komen yo gen ladanl byen mèb ke chak epou yo te genyen pandan maryaj la e byen imobilye ke epou yo vin genyen atit onere( onereux) pandan maryaj la.
𝗞𝗶𝘀𝗮 𝗯𝘆𝗲𝗻 𝗺𝗲̀𝗯 𝗹𝗮 𝗴𝗲𝗻 𝗹𝗮𝗱𝗮𝗻𝗹?
Byen mèb la gen mobilye enteryè , kont bankè yo , lajan likid , tit ou valè de bous, aksyon ki gen nan yon sosyete, fon komès e tou kliyantèl sivil.
Byen mèb pa nati yo ki vle di byen ki atache eksklizivman a yonn nan epou yo fè pati de byen pwòp de chak epou menm lè yo te achte nan maryaj la . Byen mèb pa nati yo , se pantalèt fi a , slip neg la , vètman yo , enstriman travay , aksyon an reparasyon pou yon domaj kòporel elatriye.
𝗕𝘆𝗲𝗻 𝗽𝘄𝗼𝗽 𝗸𝗲 𝗰𝗵𝗮𝗸 𝗲𝗽𝗼𝘂 𝘆𝗼 𝗴𝗲𝗻𝘆𝗲𝗻 :
Se byen mèb ou imèb chak epou yo genyen anvan maryaj la e tou byen imèb aki ou rekeyi pandan maryaj la pa eritaj ( succession) oubyen pa donasyon .
Chak epou menm le yo marye sou rejim kominote legal ka libreman jere e dispize janl vle de byen pwòp li genyen sof imèb kote epou yo abite a ki gen yon estati patikilye.
Anvan 09 avril 2020 tout byen mèb ke epou yo gen padan maryaj la e sa yo te gen avan maryaj la vin tonbe nan kominote a se vle yo tout te pou tou 2 epou yo , konnya apre dekrè 9 avril la se sèl byen mèb ki fèt pandan maryaj la ki pou 2 epou yo.
Tout byen imèb tankou kay teren depi li fèt pandan maryaj la li te met se yonn man epou yo ki fèl li pou tou 2 moun yo mwatye mwatye. Li te met te sou non nenpot nan nou.
Anplis tout byen imèb tankou Kay , teren nou achte pandan nou marye à vin pou nou 2 mwatye pou mwatye li te met se Yon sel nan nou ki travay ki fèl.
Men tou tout dèt yonn nan moun marye yo ta gen depi jou selebrasyon maryaj la se det nou tout.( Atik 1186 e swivan kod sivil)
Konnya Rejim kominote legal la ke pifò ayisyen marye sou li a gen kèk avantaj ak kek enkonvenyan .
Rejim sa nan avantaj jenn moun ki ap marye ki poko posede gran choz. Se rejim legal la ,moun yo pa bezwen al kay notè pou depanse lajan . Si yonn nan konjwen yo mouri lot la gen mwatye byen komen yo e si yap divòse pataj la ap fasil paske tout byen yo achte pandan maryaj la chak epou yo gen mwatye.
Men Pwoblèm rejim legal la genyen si yonn nan epou yo gen dèt moun ou enstitisyon li dwe a ka sezi ni byen pwòp moun ki dwe a ni byen komen yo pou li touche . Men si yonn nan konjwen yo ta achte yon byen avek lajan ki soti nan byen pwop li pandan maryaj la byen sa pa rantre nan kominote a , se byen pesonel li men fok li ka pwouve kot lajan an soti.
Pwoblem toujou rejim sa ka bay anpil fwa moun yo divòse separasyon an ki mwatye mwatye konn penalize yonn ki travay di anpil kote lot la konn ap grate santi , fè parese. Ou ka we se yonn nan epou yo ki travay di fe byen li lot la kouche domi epi kon yo kite sanzave ou sanzavez ki pat travay fe okenn byen gen mwatye nan byen yo.
🔴𝗥𝗲𝗷𝗶𝗺 𝗸𝗼𝗺𝗶𝗻𝗼𝘁𝗲 𝗿𝗲́𝗱𝘂𝗶𝘁 𝗼𝘇𝗮𝗸𝗲̀:💍
Nan Rejim sa se sel byen koup la fè pandan yo marye a ki pou yo 2.
Sa Yonn nan yo ta posede anvan maryaj se afè pal menm lè lap divose . Si pa egzamp ou ta posede Yon gwo bus k'ap fè okap anvan ou marye depi se sou Rejim sa ou marye madanm ou mari ou pa gen anyen pou wè ladanl , selman lèw lwe bus la oubyen kob trafik la se kob nou tou lè 2.( Atik 1283 e swivan kod sivil). Dèt ke madanm ou mari fè pandan maryaj la se dèt nou tou lède. Men yon moun yon epou dwe pa ka sezi salè avek gen pesonel chak konjwen yo . Si yonn nan konjwen yo al fè yon prè oubyen yon kosyonnman lap angaje kominote a selman si tou 2 konjwen yo te dakò e konsanti. Nan rejim sa konjwen yo modifye kontra a pou mete pa egzanp ke sil mouri lot la ka eritye tout byen kominote a net.
🔴𝗥𝗲𝗷𝗶𝗺 𝗸𝗼𝗺𝗶𝗻𝗼𝘁𝗲 𝗶𝗻𝗶𝘃𝗲̀𝘀𝗲𝗹:💍
Si ou chwazi marye sou Rejim sa , tout byen ni ou menm ak madanm ou oubyen mari ou te posede ni anvan maryaj ni apre maryaj vin byen nou tou lè 2. Li te met se te donasyon, eritaj tout net se pou koup la . Si yonn nan nou mouri lot la genyen 50% de tout byen yo net an lagan.lot konjwen vivan an kapab tou genyen 100% byen yo si sa te mansyone nan kontra a.
Si se divose nou divose menm le yonn nan konjwen yo ta Yon voryen apre divòs la chak moun ap jwenn 50% nan tout byen yo.(Atik 1311 e swivan kod sivil)
🔴𝗥𝗲𝗷𝗶𝗺 𝘀𝗲𝗽𝗮𝗿𝗮𝘀𝘆𝗼𝗻 𝗕𝗬𝗘𝗡:💍
Sou Rejim sa sel marye nou marye men chak moun jere byen paw. Kelkeswa date yonn nan epou yo ta achte byen an , Avan ou pandan maryaj la , se byen pa Li. Si ou ak madanm ou oubyen ou ak mari'w ta achte Yon byen ansanm pou 100 dola mari à met 80 dola madanm nan met 20 dola, si nou divòse chak moun ap pran kantite w te mete à. (Atik 1321 e swivan kod sivil). Se rejim ki asire pi gran endepandans epou yo , se rejim gran neg yo , rejim lè patrimoine fanmiy yo gran. Si yonn nan moun yo al fé dèt se dèt pa li. Rejim sa enjis si yonn nan konjwen yo pap regle anyen e si li pa gen aktivite kap rapotel lajan si divòs mete pye sa ki te vin pov pwale tou pòv.
🔴𝗥𝗲𝗷𝗶𝗺 𝗱𝗼𝘁𝗮𝗹:💍
Depiw wè "dot" sa vle di se byen fanm nan pote pou mari li pou kapab sipote chaj maryaj la.
Byen sa yo ke fi a pote a kapab divize an 2 , premyèman se byen dotal yo kote ke se mari a kap administre yo e jwi yo e byen "extra-dotaux" ou byen "paphernaux" ke fanm nan ap administre e jwi yo li menm.
Dot la kapap konsène tout byen ke fanm nan genyen e tout byen lap gen pou genyen, oubyen tout byen fanm nan genyen selman ou yon pati de byen kel genyen, sa ka menm konsène yon objè endividyèl. ( at 1325 e, swivan kod sil la)
https://www.facebook.com/fleremelaw/
✍🏽✍🏽✍🏽
Fok mwen di nou Gen kek bon chanjman ki fet nan rejim matrimonyal yo avek dekrè 9 avril 2020 an pami yo :
🟡pa egzanp si kay kote koup la abite a se byen pwop yon konjwen kelkeswa rejim matrimonyal la depi li mouri lot konjwen an ap ret jui kay la e pyes eritye konjwen ki mouri a pap ka metel deyò . Men fok konjwen suvivan an pa ni remarye ni plase , depi lal fe yonn nan yo eritye konjwen ki mouri a ka metel deyò
🟡yon lot bagay ki enpotan nan dekrè 9 avril 2020 an sou rejim matrimonyal yo depi moun ki marye yo ap ekzèse pwofesyon separe oubyen menm pwofesyon yo kapab antann yo nan enterè fanmiy lan pou yo modifye oubyen chanje antyèman rejim yo marye a , men gen jan sa dwe fèt e modifikasyon sa ou chanjman an kapab fèt yon sel fwa pandan maryaj la. Anvan dekrè sa ou pat ka chanjel konnya ou kapab men fok tou 2 konjwen yo dakò.
Si nou tonbe nan ka Madanm Hakimi a pinga nou vin di Mèt P-Lex pat pote ti kal limyè pou nou .
Si nou apresye teks la fèm santi sa nan yon ti kòmantè e like paj la pou vin fè Pati gran kominote jiridik Mèt P-Lex la .
#𝐦𝐚𝐢𝐭𝐫𝐞 maître John JEAN LOUIS
#𝐋𝐞 #𝐝𝐫𝐨𝐢𝐭 #𝐂' #𝐞𝐬𝐭 #𝐦𝐚 #𝐏𝐀𝐒𝐒𝐈𝐎𝐍 ⚖️ !!!
𝐒𝐨𝐮𝐫𝐜𝐞 : 𝗣𝗲𝗹𝗲𝘅 𝗙𝗹𝗲𝗿𝗲𝗺𝗲. 𝗔𝘃., 𝗟𝗟.𝗠, 𝗖𝗥𝗖𝗠𝗣 ©©©
⚖⚖⚖⚖⚖⚖⚖⚖⚖⚖⚖⚖⚖⚖
