19/12/2025
რვა წელი ზოგისთვის მთელი ცხოვრებაა, მრავალი მოვლენით აღსავსე, ჩემთვისაც მრავალი ემოციით იყო დატვირთული, თუმცა მაინც მერანივით გაიფრინა. დღეს, ჩემი როგორც ადვოკატთა ასოციაციის თავმჯდომარის ბოლო სამუშაო დღეა, ორშაბათიდან ქართულ ადვოკატურას ახალი ხელმძღვანელი ეყოლება.
ქვემოთ იხილეთ, „ალაგ-ალაგ ის ძირითადი მომენტები,“ რაც შევძელით ამ 8 წლის განმავლობაში:
🔹ადვოკატთა ასოციაციის დამოუკიდებლობა და ერთიანობა გარანტირებულია;
🔹ადვოკატის სტატუსი და პროფესიული თვითმმართველობა განმტკიცებულია საქართველოს კონსტიტუციითა და საკონსტიტუციო სასამართლოს მშვენიერი გადაწყვეტილებით;
🔹ადვოკატურის პოლიტიზირებისა და ნჯოიზაციის მცდელობები ჩაფლავდა;
🔹ადვოკატთა ეთიკა და კოლეგიალური ურთიერთპატივისცემა დამკვიდრებულია (წინასაარჩევნო ვნებათაღელვას თუ არ ჩავთვლით, რომელიც მალე დასრულდება);
🔹ადვოკატთა თავისუფალ გარემოში საქმიანობა, აზრის თამამად და მწვავედ გამოხატვის უფლება გარანტირებულია, როცა ადგილი ჰქონდა ადვოკატის საქმიანობის ხელშეშლის ცალკეულ ფაქტებს რეაგირება სახეზეა;
🔹ადვოკატთა სისხლის სამართლებრივი დევნა ისტორიას ჩაბარებული ცუდი სიზმარია, არც ერთი ადვოკატი (არც ერთი!), პროფესიული საქმიანობის გამო პენიტენციურ დაწესებულებაში არ გვყოლია;
🔹სისხლის სამართლის ადვოკატების ნამდვილი პროფესიული როლი დაბრუნებულია, ნათელი მაგალითი - ყველა არსებითად განხილულ სს საქმეზე, წლიურად 13% სრულად გამამართლებელ განაჩენთა რაოდენობაა;
🔹ადვოკატის პროფესია ღირსეული, პოპულარული და პრესტიჟულია, ნათელი მაგალითი - წლიურად 400-ზე მეტი ახალგაზრდა იურისტი უერთდება ადვოკატურას;
🔹ქართული ადვოკატურის წარმატება საერთაშორისოდ აღიარებულია, ერთობლივი პროექტები აშშ-ის, გერმანიის, საფრანგეთის და სხვა ევროპის თუ აზიის მეგობარ ასოციაციებთან, კოლეგებთან აქტიურ ფაზაშია, ადვოკატებისათვის უცხოეთში სასწავლო ვიზიტების ფანჯარა გახსნილია;
🔹ასოციაციაში მიღების, ადვოკატის გამოცდის, ადაპტაციის, განგრძობადი განათლების, დისციპლინური წარმოების, სოციალური დახმარების, პენიტენციური ჯავშნების, საკომიტეტო საქმიანობისა და სხვა შიდა ორგანიზაციული პროცესები გამართული და გაციფრულებულია;
🔹ასოციაციის ბიუჯეტის დაგეგმვის, ხარჯთაღრიცხვის და აუდიტირების პროცესი ოპტიმიზირებული და გამჭვირვალეა;
🏠ასოციაციის თბილისის ოფისის, „ადვოკატთა სახლი“ ლამაზი, მულტიფუნქციური და ტექნოლოგიური შენობა აშენებული და გამშვენებულია (სხვათაშორის, ეს ის შენობაა, ჩემთვის რომ ვაშენებდი და ჩემი ლეჩხუმის მამულში, რომ ვაპირებდი გადაგორებას, მაგრამ გადავიფიქრე და რჩება დიღომში, „მართლმსაჯულების უბანში“, 5 ათას კვ.მ. მიწასთან ერთად);
🏠ასოციაციის ზუგდიდის ოფისი შეძენილი და გარემონტებულია (მჯერა, თელავის და ახალციხის ოფისების გახსნას მომავალი მმართველობა შეძლებს);
🔹ასოციაციის შიდა კორპორატიული კულტურა და თაობებს შორის პატივისცემაზე დაფუძნებული ურთიერთობების ტრადიცია დამკვიდრებულია;
🗳️ასოციაციის არჩევნების გამჭვირვალე, სამართლიანი და მაღალტექნოლოგიური ფორმატი დანერგილი და პრაქტიკაში გამოცდილია (გაყალბებაშ საქვარუას ეკმაბრალენდეს ნამთინე ტეტეჩი);
🔹ასოციაციის მოტივირებული, მაღალკვალიფიციური და ორგანიზაციის ერთგული აპარატის თანამშრომლები ადგილზე არიან, მათ გარეშე არც არაფერი გამომივიდოდა.
კიდევ ბევრი რამის გაკეთება შეიძლებოდა? რა თქმა უნდა, მაგრამ ეს ისაა რაც შევძელით ჩვენი მოკრძალებული ბიუჯეტის პირობებში (ინფოსთვის: 11 ათას წევრიანი ორგანიზაციის წლიური ბიუჯეტი - 1,2 მილიონი ლარია).
🤷♂️ვწუხვარ, რომ ვერ შევძელი ყველა ადვოკატს (5 600-ზე მეტი მოქმედი ადვოკატია) ესარგებლა ასოციაციის მიერ დაგეგმილი ღონისძიებებით და სასწავლო ვიზიტებით, ბევრნაირად ვცადეთ ამის გაკეთება (AI-იც დავიხმარეთ), მაგრამ ამ რაოდენობის ადამიანის, ყველას და ყველგან მონაწილეობის ფორმულა ვერ მოიძებნა, ღონისძიებებზე პირველადი რეგისტრაციის მექანიზზმიც არ გამოდგა ეფექტიანი და ასე თვალსა და ხელს შუა დაგვბრალდა ფავორიტიზმი, მიუხედავად იმის, რომ ამ სიკეთეებით მოსარგებლე წევრების უმრავლესობას კარგად არც ვიცნობდი და არც აღმასრულებელი საბჭოს წევრთაგან ყოფილა რომელიმე ჩემი პირადი მეგობარი, ერთს თუ არ ჩავთვლით.
მიუხედავად ყველაფრისა, ბედნიერი ვარ, რომ მომეცა შესაძლებლობა, ჩემი მოკრძალებული წვლილი შემეტანა ჩემთვის ყველაზე საყვარელი პროფესიის მცირედით მაინც განვითარებაში და მხოლოდ გამიხარდება რომ მომავალმა თავმჯდომარემ გააკეთოს უფრო მეტი და უფრო კარგად.
🙏კიდევ ერთხელ, დიდი მადლობა თითოეულ ადვოკატს ნდობისთვის, თანადგომისთვის, ჯანსაღი კრიტიკისთვის და ზოგჯერ დაუმსახურებელი ლანძღვისთვისაც ...
✌️ერთად გავაძლიეროთ ჩვენი პროფესია✌️
