13/08/2026
კიდევ ერთი გამარჯვება ვახტანგიშვილი-მაქაცარიას საადვოკატო ოფისისგან!
მცხეთის რაიონულ სასამართლოში წარმატებით დასრულდა 3-წლიანი სასამართლო დავა, მოსარჩელე ლ.გ.-ს სასარგებლოდ.
სწორად შემუშავებული და თანმიმდევრულად განხორციელებული სამართლებრივი სტრატეგიის ფარგლებში ჩატარდა 10-მდე სასამართლო პროცესი. ასევე, მნიშვნელოვანი აღმოჩნდა დროულად და სწორად აღძრული სისხლის სამართლის საქმე და გამოძიების ეტაპზე მოპოვებული მტკიცებულებები, მათ შორის მოწმეთა ჩვენებები, რომელთა ურთიერთშეჯერებამ და სასამართლოში სათანადო წარდგენამ საქმისთვის მნიშვნელოვანი გარემოებები დაადასტურა.
დავის შედეგად სასამართლომ სარჩელი სრულად დააკმაყოფილა და ლ.გ.-ს დაუბრუნდა მისი კუთვნილი უძრავი ქონება.
საქმის ფარგლებში დადგინდა, რომ აღნიშნული ქონება, რომელიც იპოთეკით იყო დატვირთული, თავდაპირველად დაფარული გარიგების საფუძველზე გაფორმებული ნასყიდობისა და გამოსყიდვის ხელშეკრულებით გადაეცა ფიზიკურ პირს ლ.ა.-ს. შემდგომში ქონება აუქციონზე იქნა რეალიზებული, რომლის შედეგებიც გაბათილდა.
ამის შემდეგ ქონება გასხვისდა არაკეთილსინდისიერ შემძენ კ.ბ.-ზე, რომელიც, თავის მხრივ, ლ.გ.-სა და მისი ოჯახის წევრების გამოსახლებას ან 120 000 ლარს ითხოვდა ქონების სანაცვლოდ.
საბოლოოდ, სასამართლოს გადაწყვეტილებით ბათილად იქნა ცნობილი როგორც ნასყიდობისა და გამოსყიდვის ხელშეკრულება, ასევე ქონების შემდგომ არაკეთილსინდისიერ შემძენზე გასხვისების გარიგება.
უძრავი ქონება დაუბრუნდა მის პირვანდელ მესაკუთრეს.
ეს საქმე კიდევ ერთხელ ადასტურებს, რომ სწორად დაგეგმილი სამართლებრივი სტრატეგია, საქმის დეტალური შესწავლა და მტკიცებულებების სათანადოდ გამოყენება სამართლებრივი შედეგის მისაღწევად უმნიშვნელოვანესია.
