05/09/2025
QABIYYEEN LAFA BAADIYAA GARA MAGAALAATTI DAANGEFFAMUU FI MIRGA WABII ITTI FAYYADAMA QABIYYEE LAFA BAADIYAA
Kaayyoo seera lafa baadiyaa keessaa inni tokko wabii itti fayyadama qabiyyee lafa baadiyaa mirkaneessuu akka ta'e seensa labsii lafa baadiyaa oromiyaa duraanii labsii lakk 130/99 keewwata 6/10 fi 6/11 jalaatti tumamee kan argamuudha. Kanarraa immoo namni mirga itti fayyadama qabiyyee lafa baadiyaa qabu kamiiyyuu karaa seeraan tumameen ala qabiyyee lafa isaa irraa buqqa'uu kan hin dandeenyee ta'uun ifatti hubatama. Lafichi faayidaa ummataaf yoo barbaadames dursee lafichi faayida ummataaf kan barbaadamu ta'uun qaama aangoo qabuun murtaa'ee beenyaan madaalawaan dursee kanfalamee yoo ta'e malee namni mirga itti fayyadama qabiyyee lafa baadiyaa qabu mirga isaa dhabuu hin danda'u. bulchiinsi magaalaas qaamuma mootummaa waan ta'eef qabiyyee lafa baadiyaa sababa pilaaniin magaala jalatti daangeffame qofaaf lafa baadiyaa fudhachuu kan hin dandeenyee fi akkaataa seeraatiin dursee beenyaa madaalawaa kanfaluun laficha hanga hin fudhannetti mirgi itti fayyadama abbaa qabiyyee kan itti fufu akka ta'e seera lafa baadiyaa oromiyaa duraan turanii fi amma hojii irra jiran irraas ni hubatama. abbaa qabiyyee irraa hanga Lafti baadiyaa akkaataa kanaan hin fuudhamnetti osoodhuma akkaataa seeraatiin walharkaa fuudhiinsi taasifamee pilaaniin gara magaalattis daangeffamee hanga buchiinsi magaalaa abbaa qabiyyee harkaa akkaataa seeraan fudhatutti mirgi itti fayyadama abbaa qabiyyee kan itti fufuu fi seeruma lafa baadiyaatiin kan bulu akka ta'e labsii lafa baadiyaa mootummaa naannoo oromiyaa labsii lakk 248/2015 keewwata 4/2 jalatti ifatti tumameera. kanarraa immoo hanga lafti baadiyaa abbaa qabiyyee harkaa akkaataa seeraan fuudhamutti seeronni lafa magaalaa bulchuuf tumaman raawwatamummaa kan hin qabne ta'uu fi bulchiinsi magaalaa seerota lafa magaalaatiin laficha bulchuu kan hin dandeenye ta'uun kan hubatamuudha.
