22/03/2021
💡 ازاي اقدر اخد شقة في مبادرة التمويل العقاري ومين المستفيد منها؟
المبادرة معمولة لمحدودي الدخل ومتوسط الدخل ولازم تعرف انت مين فيهم
- أولا : محدود الدخل لا يتعدى مرتبه 4500ج للفرد و 6000 للأسرة ويقدر ياخد شقة لحد 350 الف جنيه بفائدة متناقصة 3% فقط لمدة 30 سنة بحد اقصى
- ثانيا : متوسط الدخل لا يتعدى مرتبه 10000 للفرد و 14000ج للأسرة ويقدر ياخد شقة لحد مليون جنيه بحد اقصى بفائدة متناقصة 3% فقط لمدة 30 سنة بحد اقصى
--------------------
💡 هل لازم اشتري من وزارة الاسكان ؟
- الاجابة لأ .. ممكن تشتري أي شقة في أي مكان سواء حكومي أو أهالي
--------------------
💡 طب ايه شروط الشقة اللي ينفع اشتريها ؟
1- يشترط ان يكون الارض و العقار مسجل أو قابل للتسجيل وليس عليه مشاكل في التراخيص
2- ان يتم تسليم الشقة كاملة المرافق ومسجلة او قابلة للتسجيل ولا يوجد بها أي مشاكل في التراخيص (متشطبة جاهزة للسكن وليست نصف تشطيب)
3- ان يكون المتقدم لطلب الشقة مصري الجنسية ولا يقل عن 21 سنة
4- ألا يكون قد حصل على شقة من مبادرة سابقة.
5- اذا كان المتقدم فوق سن الـ 60 عام يتم دفع 40% مقدم من قيمة الشقة
6- لازم الاستعلام الإئتماني (ISCORE) يكون كويس يعني لو حضرتك اخدت قرض قبل كده وماسددتش هتخرج من المبادرة
--------------------
💡 المقدم بيكون قد ايه ؟ والفايدة ؟ وفترة السداد ؟
- المقدم بيكون 15% من قيمة الشقة ممكن تدفعهم كاش أو قسط على 3 سنين كل سنة 5% مع الاقساط الشهرية
- الفايدة متناقصة وبتكون 3% فقط على الرصيد المتبقى وليس على المبلغ كاملاً بمعنى ان الفايدة دي بتتحول بقدرة قادر إلى 1.8% فقط كنسبة ثابتة ودي أول مرة تحصل في تاريخ التمويل العقاري في مصر 😀
- وفترة السداد اقصاها 30 سنة يعني مفيش بعد كده.
--------------------
💡 ايه الاوراق المطلوبة في البنك ؟
1- لو انت موظف حكومي أو قطاع خاص هتجيب مفردات مرتب من الجهة اللي تابع ليها.
2- لو شغال في الاعمال الحرة هتقدم ورق مشروعك أو تجيب شهادة دخل من اي مكتب محاسب قانوني معتمد أو تطلع على البنك وهناك هيتم التقييم.
--------------------
💡 انا محدود الدخل ومش معايا فلوس المقدم .. اعمل ايه ؟
هتطلع على صندوق الإسكان الاجتماعي وهتاخد دعم من 30 الف إلى 35 الف جنيه وده لمحدود الدخل فقط وليس متوسط الدخل.
وبعدين هتطلع على البنك علشان تاخد التمويل على طول.
--------------------
💡 ينفع أشتري شقة في المبادرة وابيعها بعد كده ؟
يحظر التصرف في الشقة لمدة 7 سنوات من تاريخ شرائها.
--------------------
💡 لو مالك الشقة توفى لا قدر الله الشقة وضعها ايه ؟
الشقة بتروح للورثة بشرط سداد باقي أقساطها.
--------------------
💡 المبادرة هتبدأ امتى وازاي اقدم فيها ؟
- في بداية شهر ابريل هيتم طرح كراسات الشروط النهائية واللي بتقدم من خلالها على شقتك سواء في صندوق الاسكان الاجتماعي أو البنوك.
--------------------
💡 طب ايه البنوك اللي بتدعم المبادرة ؟
- تقريبا كل البنوك المصرية داعمة للمبادرة وده هيوضح اكتر بعد استيفاء الشروط وخروج المبادرة للنور بقرار تنفيذي من البنك المركزي.
--------------------
💡 هل للمبادرة وقت معين و هتستمر لحد امتى ؟
- المبادرة هتخلص أول ما المبلغ اللي رصدته الحكومة لدعم المبادرة يخلص وهو 100 مليار جنيه في سابقة لم تحدث من قبل 😀
--------------------
💡 مين المستفيد من المبادرة دي ؟
الموظف الحكومي والقطاع الخاص والاعمال الحرة وكل من تنطبق عليهم الشروط
--------------------
💡 مثال : لو اخدت شقة بـ 350 الف القسط هيبقى قد ايه؟ وادفع مقدم كام؟
بص ياسيدي بحسبة بسيطة كده هتدفع 1127ج في الشهر .. طب ازاي ؟
1- حضرتك هتدفع المقدم 15% من اجمالي ثمن الشقة (350الف) يساوي 52,500ج
2- هتقدم على الدعم اللي هتاخده من صندوق الاسكان 30,000ج
3- هيتبقى 267.500ج من تمن الشقة هتقسمهم على 30 سنة يطلعلك قيمة القسط الشهري 1127ج / الشهر
--------------------
💡 هو لازم اقسط على 30 سنة ؟ ماينفعش مدة اقل ؟
- ينفع طبعا على اي عدد سنوات انت عايزه بس هو الحد الاقصى للاقساط 30 سنة ودي ما حصلتش في اي مبادرة سابقة 😀
--------------------
💡 في حالة شراء الشقة من شركات خاصة لا يتجاوز سعر الوحدة 350الف جنيه يشترط الآتي :
1- شهادة عقارية بأن الوحدة متشطبة ومسجلة أو قابلة للتسجيل
2- وجود عقد ملكية الأرض ومحضر تسليم الأرض وصورة الرخصة وشهادة بعدم وجود مخالفات للمبنى
--------------------
ده كان توضيح لما تم طرحه بخصوص مبادرة التمويل العقاري وعلى فكرة هي واخدة اولوية قصوى ودعم بقرار رئاسي يعني سارع بحجز وحدتك واستفيد بالدعم وياريت اللي عنده اي استفسار يطرحه في الكومنتات وهنرد عليه في اسرع وقت بإذن الله
- شير علشان تستفيد و غيرك يستفيد 😀
#موثوق
