20/07/2026
الإعلامي صطفى بكري قلب الترابيزة على الظهور الجديد ليوسف بطرس غالي في مصر، وقال إن رجوعه للمشهد بيطرح علامات استفهام كبيرة.
بكري اعتبر إن يوسف بطرس غالي كان واحد من المسؤولين عن السياسات اللي وصلت البلد للأوضاع اللي سبقت أحداث 2011، واللي كانت، على حد وصفه، ممكن تؤدي لانهيار الدولة المصرية.
وأضاف إن من أبرز الملفات اللي ارتبط اسم يوسف بطرس غالي بيها، ملف أموال المعاشات، وقال إنه هو اللي ضم أموال المعاشات للخزانة العامة، وإن القرار ده كان سبب في معاناة أصحاب المعاشات لسنين طويلة.
بكري كمان أكد إن رجوع يوسف بطرس غالي، ومعاه شخصيات تانية من نفس الفترة، بيخلي ناس كتير تسأل: إيه اللي بيحصل؟ وإيه سبب ظهورهم من جديد دلوقتي؟
تصريحات بكري أثارت حالة من الجدل، خاصة إنها بتيجي بعد الظهور الأخير ليوسف بطرس غالي في مصر، واللي فتح باب النقاش من جديد حوالين عودة بعض الوجوه اللي ارتبطت بفترة ما قبل 2011، وهل ظهورهم هيكون مجرد مشاركة في فعاليات عامة، ولا بداية لدور جديد في المشهد.
