09/05/2019
مواقع التسويق العقاري .. مميزات وعيوب
في السنوات الأخيرة انتشرت مواقع التسويق العقاري اللي هي مهمتها تساعد الناس على بيع وشراء وتأجير الشقق والشاليهات والعمارات والأراضي، وقدرت فعلًا تكسب ثقة العملاء لدرجة إن في متابعين كتير كانوا شايفين إنها تعتبر بديل مثالي لمهنة السمسار وبالتالي ممكن كمان كام سنة نسمع عن اختفاء المهنة دي.
وده لأن المواقع دي سهلت بشكل كبير التواصل بين البائع والمشتري بشكل خلاهم ينجحوا في اجتذاب الجمهور بقوة لدرجة إن قيمة العقارات اللي اتسجلت للبيع من خلال الانترنت في مصر من سنتين قدرت تتجاوز الـ100 مليار جنيه.
لكن في الحقيقة على قد ما المواقع دي بتمتلك مميزات كبيرة لكن هنلاقي إن فيها عيوب لازم ناخد بالنا منها، وعلشان كده هنتكلم النهارده عن إيجابيات وسلبيات استخدام مواقع التسويق العقاري، وهي:
أولًا: مميزات مواقع التسويق العقاري:
- تسهيل عملية بيع وشراء العقارات:
زمان كان موضوع شراء وبيع العقارات بيحتاج وقت ومجهود كبير، لكن المواقع دي سهلت الدنيا لأنها سمحت للناس إنهم يحددوا المواصفات اللي هما عايزينها سواء المتعلقة بالموقع، أو المساحة، أو عدد الغرف، أو الميزانية وهي على طول بتوفر ليهم مئات الخيارات اللي مدعمة بالصور الحية.
- السماح بالتعرف على السوق والمقارنة بين الوحدات المختلفة:
قبل ظهور مواقع التسويق العقاري كان الناس بيحتاجوا يجمعوا معلومات كتير ويعاينوا أكتر من عقار علشان يعرفوا اتجاه السوق ويقارنوا بين أكتر من وحدة ويختاروا الأنسب ليهم، بس دلوقتي الوضع اختلف لأنك بتقدر وأنت قاعد في البيت تعرف متوسط الأسعار وتفاضل بين خيارات كتير وتختار منهم اتنين أو ثالثة علشان تعاينهم على الطبيعة.
- انخفاض الرسوم أو عدم وجودها:
في الوقت اللي فيه ناس كتير بتهرب من أي عمليات بيع أو شراء عقاري فيها سمسار لأن معظمهم بياخد فلوس كتير من البايع والمشتري، هنلاقي إن عمليات البيع والشراء على مواقع التسويق العقاري بتتميز بالشفافية والوضوح وبيتم فيها دفع مصاريف قليلة وكمان في مواقع مش بتحط أي رسوم في مقابل الاشتراك في عمليات البيع والشراء.
-الوصول للعملاء في أي مكان وأي وقت:
تتيح مواقع التسويق العقاري للعملاء إمكانية اختيار الشقق والعقارات المناسبة ليهم في أي وقت وأي مكان، وده لأنها بتتعرض على الموقع طول ساعات اليوم وكل أيام الأسبوع وبالتالي تقدر تدخل في الوقت المناسب ليك ومن أي مكان سواء كنت جوا البلد أو برا وتختار اللي يعجبك وتحدد بعد كده موعد للمعينة، وده مش موجود في التعامل مع السماسرة لأنك في الغالب بتكون مقيد بمواعيدهم وأماكن تواجدهم.
- التعرف على آراء العملاء في الخدمة المقدمة:
بعض مواقع التسويق العقاري بتتيح للعملاء الإبلاغ عن أي مشكلة واجهتهم على الموقع زي إن مفيش تفاصيل كافية عن العقار، أو نوعية الصور رديئة، أو نص الوصف ضعيف، وكمان بيسألوا عن المشكلات اللي حصلت أثناء شراء العقارات زي مثلًا إن العقار غير موجود فعليًا، أو الموقع غير صحيح، أو السعر كان غير دقيق، أو إنهم مش بيتلقوا أي ردود.
وده علشان المواقع دي تحسن طريقتها في التعامل مع العملاء وتسهل عملية البيع والشراء عليها، وكمان علشان تضمن إن الشركات أو الأفراد اللي بيعرضوا عقاراتهم عليها جادين فعلًا وبيقدموا خدمة جيدة للجمهور.
ثانيًا: عيوب مواقع التسويق العقاري:
- عدم التأكد من هوية البائع أو المشتري.
في ناس كتير بتفضل إن تعاملاتها العقارية تتم من خلال ناس ثقة هما عارفينهم كويس جدًا وده علشان ما تغامرش بتحويشة العمر وتضمن إنها بتدفع فلوسها في المكان الصح وبالتالي بيشتروا أو يبيعوا لناس في دائرة معارفهم.
ودي حاجة مش موجودة على مواقع التسويق العقاري لأنه بيكون صعب جدًا إنك تتحقق من هوية وجادية كل اللي بيعرضوا عقاراتهم على الموقع عندك، وكمان اللي بيدخلوا علشان يشتروا وبالتالي هنلاقي إنه بيكون في هامش من عدم الثقة موجود.
- غياب خبرة السمسار وملاحظاته.
لما عملية بيع أو شراء أي عقار بتتم من خلال مواقع التسويق العقاري هنلاقي إنها بينقصها كتير من خبرة وملاحظات السمسار واللي غالبًا بتكون مؤثرة عند الطرفين، لأن المهارات اللي بيمتلكها السمسار ممكن تسمح للبائع بتسويق عقاره بشكل فعال أكتر من خلال وصوله على طول للشريحة المستهدفة، وكمان بتسمح للمشتري إنه يستفيد من مهارات التفاوض اللي بيمتلكها السمسار وبالتالي الوصول لسعر مناسب أكتر للعقار.
- الصور قد تكون خداعة وغير مطابقة للواقع.
صحيح مواقع التسويق العقاري بتسهل علينا اختيار العقارات المناسبة لينا من خلال ذكرها للمواصفات وعرضها للصور لكن في كتير من الأحيان الصور بتكون خداعة وده لأنها مش مطابقة للواقع أو قديمة فمثلًا بعض الصور ممكن تظهر المساحات واسعة وهي في الحقيقة ضيقة، كمان ممكن البائع ينزل صور قديمة للمنطقة اللي فيها الشقة واللي بتكون اتغيرت للأسوأ.
وده كله بيعطل المشتري لأنه لما بيعاينها على أرض الواقع بيلاقي إنه مش ده اللي هو عايزه وبالتالي بيضطر يرجع يدور من أول وجديد على بدائل تانية.
- مشكلات أمنية.
التسويق الإلكتروني -اللي بتندرج تحته مواقع التسويق العقاري- له عيوب متعلقة بالتأمين ونوع وحجم المعلومات اللي بتكشفها عن نفسك لأنه في أحيان كتيرة بيقدر بعض المحتالين الوصول للمعلومات الخاصة بالعملاء واستخدامها ضدهم، وعلشان كده لازم نتعامل بحذر مع مواقع التسويق الإلكتروني اللي بتطلب حجم معلومات أكتر من اللازم علشان إتمام عمليات البيع والشراء.
