Ahmed Karama

28/06/2026

لو مفكرتش قبل كدة على تأثير الأفكار في تشكيل واقعك يبقي البوست ده علشانك !!

تعالي نجيب الموضوع من الأول !!

لو سألتك: مين أكثر شخص بتتكلم معاه في حياتك ؟!
بالظبط كدة .. نفسك هي أكثر شخص بتتكلم معاه من ساعة ما أتولدت .. وفي النص شوية نقاشات مع ناس مختلفة أيا كان هما مين.

طيب لو سألتك: مين أكثر شخص بيأثر في حياتك ؟!
إجابة ممتازة .. طالما نفسك هي أكثر شخص بتتكلم معاه يبقي هي أكثر شخص بيأثر عليك.

آخر سؤال: هي نفسك اللي بتكلمها ده جايبة كلامها من نفسها ولا من الناس اللي حواليها ؟!
ويا ريت تفكر كويس علشان الإجابة ده هي كلمة السر في كل الكلام اللي جاي !!
أيا كانت إجابتك نفسك أو الناس .. خلينا نفرق الأول ما بين حاجتين .. طريقة التفكير والأفكار .. لإن ناس كتير بتخلط ما بينهم .. وبإختصار الفرق بينهم زي العدسة والصورة .. العدسة من خلالها بتشوف الصور .. ايا كانت حقيقة الصورة .. أوقات بقي العدسة بيكون فيها مشكلة متخلكش تشوف الصورة واضحة .. وأوقات الصورة نفسها ممكن تكون جميلة أو قبيحة !!

وعلشان اقرب لك الصورة .. انسان تعرض لأذى نفسي من شخص ما (صورة) .. موقف محدد حصل .. نتج عنه انطباع عن الموقف والشخص .. هنا احنا في مفترق طرق .. يا تنحصر آثار الموقف المؤذي في الموقف والشخص (صورة قبيحة) .. أو للأسف تمتد الفكرة ومع الوقت تبقي أسلوب تعامل (عدسة) .. الحذر من كل الناس وسوء الظن في كل الناس خشية يحصل منهم مواقف سيئة زي ما حصل في الصورة القديمة !!

علشان كدة في اعتقادي .. إن إجابة آخر سؤال .. تتمثل في الأفكار اللي إنت بتتكلم بيها مع نفسك .. هي نتيجة مواقف حصلت .. مواقف تعاملت معاها بطريقة صح أو غلط .. ومع الوقت أصبحت لغة أساسية بتفسر بيها الدنيا وإنت مش واخد بالك .. ممكن تكون في صور قبيحة حصلت أفقدت الإنسان جزء من هدوئه أو استقراره .. لكن بعد الموقف ده الإنسان هو وحده المسؤول عن طريقة التفكير اللي هيختار يعيش بيها .. والناس مجرد أسباب حصلت ودورها إنتهى لم يبقى منهم سوى آثار المواقف اللي حصلت منهم !!

زي ما تقول المواقف بتشرح اللي حصل .. لكن طريقة التفكير هي اللي بتحدد هيكمل إزاي .. والمشكلة إننا ساعات بنفتكر إننا بنشوف الواقع زي ما هو .. بس الحقيقة إننا بنشوفه من خلال اللغة اللي بنتكلم بيها مع نفسنا .. ولما اللغة دي تتغير .. نفس الواقع ممكن يتشاف بشكل مختلف تماما.

وأتذكر قصة سيدنا عمر لما كان ماشي بليل وخبط في رجل نايم .. الراجل صحي وأول كلمة قالها لسيدنا عمر "أمجنون أنت" وقتها سيدنا عمر رد عليه "لا ولكني عمر" .. ولما الحارس بتاعه شاف الموقف كان عايز يضربه ووقتها سيدنا عمر قال "دعه فقد سألني وأجبته" .. موقف لو حصل مع أي حد هيكون له رد فعل عنيف .. بس اللي فرق طريقة التفكير اللي حملت سيدنا عمر يشوف الموقف أنه سؤال مش إهانة !!

سامع واحد بيقولي بس ده في المواقف العادية .. نقدر نراجع نفسنا ونقيم الصورة صح ونخرج بنتيجة .. لكن في مواقف غصب عننا حصلت كانت نتيجتها إننا نفكر بطريقة معينة !!

اتفق معاك رغم اختلافي .. اتفق معاك ان في مواقف كانت أكبر من قدراتنا النفسية إننا نقف ونقيم وناخد قرار صح .. مواقف تغلغلت في روحنا وخلتنا نتعامل بطريقة معينة حتى لو كنا رافضينها .. اتفق معاك بس اختلافي هو في لحظات المراجعة اللي لازم تحصل والقرارات الشجاعة اللي تخلينا نوقف طرق تفكير مش بتوصلنا غير لكل حاجة تضايقنا .. اختلافي في السماح لضياع الفرص اننا نكون الصورة الأفضل حتى لو كانت جروحنا عميقة .. كل الصور القبيحة اللي حصلت هتفضل صور انتهت .. مش من الذكاء اننا نفضل سامحين لآثارها تفضل جوانا !!

حتى اللي قاعد هناك بيقول الكلام سهل .. حابب ارد عليه وأقوله ما هو فعلا الكلام سهل .. وزي ما سمحت لنفسك بكلام سهل بس قبيح يؤثر عليك ويخليك تفكر بطريقة غلط توصلك لحاجات بتضايقك .. ما تدي لنفسك الفرصة لسماع كلام سهل بس جميل نفس المساحة وتردده ممكن يصنع طريقة تفكير تانية بس على الأقل مش هتخليك زعلان ومضايق !!

وأخيرا .. حابب ارشح قناة الدكتور وليد فتيحي على اليوتيوب
https://www.youtube.com//featured
من أجمل المحتوى اللي ممكن يعيد صياغة أفكارك وطريقة تفكيرك
الحلقات صغيرة ولطيفة .. على يقين إنك مع أول حلقة هتسمع باقي المحتوى كله

برنامج لإحياء الإنسان . تقديم د.وليد فتيحي للتواصل مع فريق البرنامج : [email protected]

13/02/2026

هناك مقولة قديمة مفادها : "قد لا يملك الرجل شيئا، لكن إن ارتبط بالمرأة المناسبة، استطاع أن يبني إمبراطورية."

وفي العمق النفسي للعلاقات، الأمر لا يتعلق بالحظ، بل بالبيئة.

المرأة الحكيمة ليست مجرد شريكة، بل عنصر توازن.

حضورها يمنح استقرارا انفعاليا، ووضوحا في الرؤية، ودعما يخفف ضغوط الطريق.

هي لا تصنع النجاح بدلا عنه، لكنها تخلق مناخا نفسيا آمنا يسمح له أن يغامر، أن يخطئ، أن ينهض، وأن يستمر.

فالنجاحات الكبرى غالبا لا تبدأ بفكرة عظيمة، بل بعلاقة صحية قائمة على الدعم، والاحترام، والإيمان المتبادل.


#منقول

12/01/2026

من أول السنة وانا مركز أفكر نفسي يوميا بثلاث حقائق .. حاسس انهم مش بس مفيدين .. دول قادرين يعيدوا برجمة العقل من أول وجديد .. ومن باب المشاركة الحقائق دول بإختصار:

1- في لحظة ما هموت .. مش هيكون عندي قدرة اعمل حاجة .. ولا أصلح أي حاجة .. حاجتي هتروح لناس تانية .. علشان كدة مبقاش عندي رفاهية أني امشي من الدنيا وانا في مظلمة متعلقة في رقبتي لأي مخلوق .. ولا أسيب ورايا أي حاجة سيئة.
يمكن الحقيقة ده خلتني خفيف أوي .. حاسس ان مبقاش في حاجة ليها قيمة زي الأول .. وكل ما الوقت بيعدي بيخليني شايف الصورة أكثر .. ومش منتظر حاجات تخليني أزعل لو مجتش.

2- الأفكار هي أساس الواقع .. من زمان وانا مقتنع أن اي فكرة بفكر فيها هيكون ليها أثر في حياتي الواقعية بشكل أو بآخر .. لكن النهاردة أنا على يقين أن أي فكرة مهما كانت .. السعة والفقر .. الصحة والمرض .. النجاح والفشل .. كلها أفكار وانت حر في إختيارك.
نسيان الحقيقة ده .. كفيل يخليك تمشي في الدنيا بدون ما تعرف إنت رايح فين ولا هيحصل فيك إيه .. وكفاية قول الله عز وجل؛ أنا عند ظن عبدي بي فليظن عبدي ما يشاء .. ده بقي التحدي الأكبر في الحياة .. انك تتيقن إنك المسئول عن حياتك بس من أفكارك.

3- الحياة هتمشي بعيداً عن مين مشي .. لازم يكون في سلام نفسي مع فكرة ان في ناس طبيعي تخرج من حياتنا .. ناس في وسط الطريق متلقيهاش .. أيا كان السبب خلاص هما مش موجودين .. خلاص بكينا على الأطلال ؟؟ .. نشوف ورانا إيه !!
مش جحود والله .. بس فعلا خلاص القصة خلصت يلا نشوف اللي ورانا .. ويكفي تكون عملت اللي عليك .. وصدقني النصيب ميعرفش أعذار ولا أسباب .. أي حاجة بتاعتك محدش هيقرب منها.

أخيرا .. الموت علينا حق .. الظن بالله ممكن يكون خير وممكن شر .. الحياة قوانينها مش على مزاج حد 👌
("فاللهم أحسن خاتمتنا وارزقنا حسن الظن بك ولا تعلق قلوبنا إلا بالنصيب")

31/12/2025

عام سعيد 🥳

مع آخر ساعات في عام 2025 مينفعش تعدي غير وإحنا شاكرين ربنا على كل حاجة حصلت. أقسم بالله الواحد غرقان في نعم لا حصر لها؛ صحة، وستر، ورزق، وحب، وتفاصيل لو الواحد فضل يتكلم عنها مش هيبطل كلام.

حتى المحن، سبحان من أزالها بلطفه وكرمه، واللي ما زال موجود منها النفس راضية به، ثقة في الله إنها الخير، حتى وإن بدت بصورة أخرى.

وعلشان المناسبة دي، والمشاعر اللي الواحد بيستقبل بيها العام الجديد، ومن باب الخير، أنا حابب أشارك أجمل وأهم تلات دروس اتعلمتهم السنة اللي فاتت؛ دروس أحسبهم عظام من حجم تأثيرهم عليا في حياتي وعلاقاتي.


«أنت بخير ما دمت تنوي الخير»
على الرغم من بساطة الجملة دي، إلا إنها شايلة وراها دروس كتير قوي. كل يوم بتأكدلي إن نية الخير كفيلة ترتقي بالإنسان لأعلى مراتب الإحسان.
تحس إن النية سلاح ذو حدين؛ لو فكرت في الخير، يقينا هتلاقيه، ولو فكرت في الشر والعياذ بالله هيحصل حتى لو كان في آخر الدنيا.
لذلك، لو ليا أمنية في السنة الجديدة، فهي إن ربنا يرزقني نوايا خيرة، يعقبها أفعال خير. وأعتقد إن ده كفيل يخلي الحياة أفضل مما هي عليه.


«زوجتك هي جيشك الوحيد»
لو في وصف يستحق يتبروز بعد قول الله تعالى: ﴿رَبَّنَا آتِنَا فِي الدُّنْيَا حَسَنَةً في وصف الزوجة، فأعتقد هيكون (جيشك الوحيد).
يمكن الأمر شاغل بالي من اللي شوفته السنة ده، مشاهد كتير لرجالة في أزمات، والله ما وقف وسعى وجري معاهم غير زوجاتهم.
وسبحان الله، على الرغم من ضعف الأنثى، إلا إنها قادرة تحفر بإيديها في الصخر لو شافت زوجها في أزمة.
علشان كده، انا اقدر اقولها بأعلى صوت؛ الاستثمار الحقيقي بالنسبة لي هو الاستثمار في الزوجة الصالحة اللي تعين على الدنيا.


«ما رفعت أحدا فوق قدره إلا حط مني مقدار ما رفعته»
يقال إن الجملة دي للإمام الشافعي، لكن في الحقيقة هي درس عمري اللي اتعلمته.
وعلى فكرة، الموضوع ملوش علاقة بالمعاني الإيجابية زي الرحمة واللين والطيبة وأخواتهم. ولا معناه إنك تتصرف مع الناس بطريقة غلط تخليهم يتعاملوا معاك بأقل من قدرك.
الموضوع بإختصار إنك محتاج تتعامل مع الناس كل على حسب مقداره وطبيعته، علشان تاخد المعاملة اللي تليق بيك، وإلا لا تلومن إلا نفسك.

في النهاية، أقدر أقول إن دول تلات دروس كان لهم بالغ الأثر في نفسي، وسعيد جدا بالتجربة ومتشوق للسنة الجديدة بكل ما فيها، لثقتي في الله إنها سنة الخير والرزق والصلاح.

اللهم نستودعك عاما مضى بكل ما فيه، فاجعل القادم أجمل بلطفك، وأخف على قلوبنا، وأقرب إليك 🤲