24/08/2026
مش معنى إن في إذن من النيابة العامة… إن المتهم هيتحكم عليه حتماً! ⚖️
من الأخطاء الشائعة إن البعض يعتقد إن مجرد وجود إذن من النيابة العامة في قضية جناية، معناه إن القضية انتهت وإن المتهم لا محالة هياخد حكم بالإدانة.
وده مش صحيح قانونًا.
لأن وجود الإذن في حد ذاته مش معناه إن كل الإجراءات اللي اتعملت بناءً عليه صحيحة.
فالمحامي لازم يفحص الإذن بدقة:
هل صدر من جهة مختصة؟
هل سبقه تحريات جدية وكافية؟
هل الأسباب التي بُني عليها الإذن تسمح بإصداره؟
هل تم تنفيذ الإذن في الحدود والمدة المقررة؟
وهل إجراءات الضبط والتفتيش تمت وفقًا للقانون؟
لأن إذن النيابة نفسه ممكن يكون باطل، وممكن كمان تكون هناك مخالفات في طريقة تنفيذه.
وفي الحالة دي، الدفاع يقدر يتمسك ببطلان الإذن وما ترتب عليه من إجراءات وآثار.
وبالتالي…
مش كل قضية فيها إذن نيابة = إدانة.
ومش كل محضر ضبط مكتوب فيه إن فيه إذن تفتيش يبقى المتهم خلاص اتحكم عليه.
القضية الجنائية لازم تتفحص ورقة ورقة وإجراء إجراء، لأن أحيانًا نقطة قانونية واحدة في الإذن أو في طريقة تنفيذه ممكن تغيّر مسار القضية بالكامل.
وعشان كده:
لو أنت متهم في جناية، ما تستسلمش لمجرد إنك عرفت إن النيابة أصدرت إذن.
⚖️ القانون مش بمجرد وجود الإذن… القانون بصحة الإذن وصحة الإجراءات اللي اتبنت عليه.
