04/02/2023
سؤال بتسئله كتير
هو انا ممكن اتحبس في
تنمر؟ يعني لو اتريقت على صاحبي هدفع غرامة؟ التنمر جريمة اصلًا؟
في البداية خلينا نتفق أن العلاقات الاجتماعية بقت بتتطور يوم عن يوم ودايرة معارفك بتزيد سواء كنت في مدرسة، جامعة، شغل..إلخ، كل دول ممكن تكتسب منهم صداقات وتكون علاقات وتتعرف على ناس وأنت وحظك يا إما يطلعوا كويسين يا إما يطلعوا شخصيات مريضة ويتنمروا عليك.
مؤخرًا ظهرت مشاكل كتير بين الناس بجميع فئاتهم سواء كانوا أطفال أو شباب أو كبار.. وهي السخرية من شخص لشخص تاني والتقليل منه أو استغلال القوة ضده "التنمر".
في 6 سبتمبر 2020 المشرع أصدر قانون يعاقب المشكلات اللي قولناها فوق ويجرم التنمر ويحط ليه عقوبة كمان لردع الناس من استغلال قوتهم في التمييز أو السخرية أو الإهانة.
-طب ايه المواقف اللي ممكن تكون تنمر وانا معرفش؟
-واحد بيتريق على لون بشرة صاحبه أو حد ميعرفوش.
-مدرس بيتريق على تلميذ في المدرسة كنوع من السخرية.
-دكتور بيتنمر على طالب مربي شعره وبيهينه وسط دفعته.
-السخرية على حد عشان رفيع مثلًا أو طويل شوية.
-أي موقف غرضه استعراض قوة أو استغلال ضعف الشخص.
*طب ايه القانون بقى؟ وايه تعريف التنمر حسب القانون؟*
المشرع حط تعريف شامل للتنمر بنص القانون:-
-يُعد تنمراً كل قول أو استعراض قوة أو سيطرة للجاني أو إستغلال ضعف للمجنى عليه أو لحالة يعتقد الجانى أنها تسئ للمجنی علیه کالجنس أو العرق أو الدين أو الأوصاف البدنية أو الحالة الصحية أو العقليـــة أو المـــستوی الاجتماعي بقصد تخويفه أو وضعه موضـع الـسخرية أو الحط من شأنه أو إقصائه من محيطه الإجتماعی.
-وطبعًا كل جريمة لازم يكون ليها عقوبة رادعة بحيث الناس متكررش الفعل دا تاني، وعشان كدا نص القانون استكمل عقوبة المتنمر وهي حبس 6 شهور أو أكثر وغرامة لا تقل عن 10 آلاف جنية ولا تزيد على 30 ألف جنية، أو العقوبتين معًا.
-ودا في حالة لو واقعة التنمر كانت من شخص واحد بس، أما لو الواقعة كانت من شخصين أو أكثر أو مثلًا الجاني كان من أصول المجني عليه أو من المتولين تربيته أو اللي ليهم سلطة عليه زي الأهل والأقارب ففي الحالة دي العقوبة بتتضاعف وبتبقى حبس سنة أو أكثر وغرامة لا تقل عن 20 ألف جنية ولا تزيد على 100 ألف جنية، أو بإحدى العقوبتين.
طب ايه اللي يفرق الهزار عن التنمر؟
خلينا نقول انه ممكن نحط 3 معايير تقدر تفرق بينهم وهما:-
"التكرار، القوة، التعمد" انك تكرر الفعل وتبقى قاصد إساءة أو تتعمد إنك تتنمر على شخص وتهينه أو تستغل قوتك للتنمر.
-طيب انا عرفت التنمر والقانون والعقوبة.. ازاي اثبت التنمر؟
الجدير بالذكر أن القانون محددش طريقة معينة للإثبات أنه تم التنمر عليك ودا شيء إيجابي مش سلبي إطلاقًا.. وهو أن القانون ساعدك في إثبات واقعة التنمر بأي طريقة متوفرة عشان يسهل عليك بأي دليل متاح تملكه وتقدر تستغله.
واخيرًا أنت في ايدك توقف التنمر وهو أنك تحط حدود لشخصيتك وازاي الناس تتعامل معاك، ازاي يهزروا بطريقة كويسة، الكلام يكون خفيف ومعقول ميوصلش لحد السخرية
متخليش حد يتجاوز حدوده معاك ووقفهم عند حدهم
