21/03/2026
ازاى تحسب ضريبة المرتبات بشكل تقريبى سريع
أولا : وعاء الضريبة هيبقى اجمالى ما تتقاضاه من مرتبات وأجور خلال العام من اول يناير حتى آخر ديسمبر ، مخصوم منه التأمينات ، ومخصوم كمان 20 الف جنيه سنويا اعفاء شخصى
ثانيا: بنقسم الوعاء الى شرايح
1. اول 40 الف جنيه مش هتدفع عليهم حاجة
2. ال 15 الف جنيه اللى فوق ال 40 هتدفع عليهم ضريبة 10%
3. ال 15 ألف جنيه اللى بعدهم هتدفع عليهم ضريبة 15%
4. ال 130 ألف جنيه اللى بعدهم هتدفع عليهم ضريبة 20%
5. ال 200 ألف جنيه اللى بعدهم هتدفع عليهم ضريبة 22.5%
6. واى فلوس فوق ال 400 الف لغاية 600 الف هتدفع عليها 25% ضريبة
يعنى لو مجموع الأجور السنوية بتاعتك 120 الف جنيه هتخصم منهم 11% تأمينات = 11,200 جنيه و 20 ألف إعفاء شخصى يبقى الوعاء 88,800 جنيه
1. أول 40 لف مش هتدفع عليهم حاجة
2. ال 15 الف التالية هتدفع 10% يعنى 1,500
3. ال 15 الف التالية هتدفع 15% يعنى 2,250
4. فاضل 18,800 هتدفع عليهم 20% يعنى 3,760
* كده يبقى اجمالى الضريبة السنوية = 7,510 جنيه
بس الخصم بيبقى شهرى تحت حساب الضريبة .. يعنى بيقسموا الاعفاء الشخصى على 12 وكمان حدود كل شريحة على 12
فلو انت فى شهر يناير كان مرتبك 9,500 جنيه هنخصم منهم 11% تأمينات = 1,045 جنيه و 1,666 إعفاء شخصى يبقى الوعاء 6789 جنيه
1. أول 3,333 مش هتدفع عليهم حاجة
2. ال 1,250 التالية هتدفع 10% يعنى 125
3. ال 1,250 التالية هتدفع 15% يعنى 187
4. فاضل 956 هتدفع عليهم 20% يعنى 191
* كده يبقى اجمالى المخصوم تحت حساب الضريبة عن شهر يناير 503 جنيه
والكلام ده يتعمل كل شهر وبعد نهاية العام الضريبى فى آخر ديسمبر يتعمل لك تسوية للسنة بالكامل .. عليك فلوس تدفعها .. ليك فلوس تستردها من ضريبة السنة القادمة
************
طيب لو انت بتشتغل فى جهتين ؟ يعنى مثلا متعاقد مع مستشفى تانية.. المستشفى التانية هتخصم 10% قطعى من اجمالى اللى هتقبضهولك تحت حساب الضريبة وآخر السنة تبلغ جهة عملك الأصلية عشان تدخل اللى انت قبضته واللى انت دفعته فى التسوية السنوية النهائية .. طبعا لو المستشفى المتعاقد معها هى مستشفى حكومية بتستخدم النظام الالكترونى (البايرول) يبقى هيسمع تلقائى مش محتاج حد يبلغ
فلو انت تعاقدت مع مستشفى تانية وقبضت منها خلال السنة 60 الف جنيه اتخصم منهم 6 الاف جنيه قطعى وتم اخطار جهة عملك الأصلية
جهة عملك الأصلية هتحط ال 60 الف جنيه على ال 120 ألف يبقى اجمالى أجورك 180 الف جنيه سنويا ، يعملوا بيها التسوية يطلع عليك اجمالى ضريبة سنوية 19,510 جنيه دفعت منهم 7,510 جنيه فى جهتك الأصلية و 6,000 فى الجهة المتعاقد معها يبقى لسة عليك 6 الاف جنيه .. هتدفع كاش والا فيزا يا استاذ ؟؟
