26/07/2022
إلى كل الشباب المقبل على الزواج: متكتبش قائمة منقولات.. أي حد بيقنعك إنها من الشرع هو كاذب.
قائمة المنقولات هي ورقة ضغط على الزوج مش لضمان حق البنت. أنت بتشتري عفش وأهلها بيشتروا عفش وبيتكتب ده كله عليك. وفي أكثر من 90% من الحالات مراتك مش بتطالب بالعفش. دي بتقول إنك بددته. يعني أنت مثلا اشتريت عفش ب100 ألف جنيه هاتلاقي مراتك واقفة قدام القسم بتقول ده مش العفش بتاعي. وهاتبقى مطالب تدفع 100 ألف جنيه + اللي جابته زوجتك وإلا تتحبس. فطبعا أنت عشان ماتتحبسش ترضخ لأي شروط حتى لو الشروط دي هاتحولك لسوسن في البيت. ذكر منزوع القوامة وليس له على زوجته أي حقوق.
ثانيا: قائمة المنقولات ده عبارة عن ورقة زور. أنت كتبت فيها إنك استلمت العفش على سبيل الأمانة. في الحقيقة هو مش أمانة عندك لأن أنت ومراتك بتستعملوه وممكن مراتك تكسر منه حاجات بقصد أو بغير قصد. ومراتك معاها مفتاح الشقة يعني ممكن لو كرهتك وماعندهاش ضمير تخليك في الشغل وتروح تاخد العفش اللي أنت قلت إنه أمانة وفي حيازتك. وبعد كده تطالبك به وتحبسك.
ثالثا: القائمة دي لو مهر المفروض الرجل يسترده عند الخلع. لكن القانون بيعتبر القائمة دي إيصال أمانة خارج قصة الزوجية أصلا. يعني تختلع منك وتحبسك. مفيش شرع بيقول كده في الدنيا.
عايز تتجوز. اشتري شبكة دهب بمبلغ تتفق عليه أنت وأهل زوجتك كمهر (مش كهدية). وجهز شقتك في حدود إمكانياتك. من غير نيش ولا أوضة أطفال ولا إسراف مالوش لازمة. مش لازم الثلاجة تكون عدد مهول من الأقدام ولا الغسالة تكون 14535 بروجرام. وقل له يا عمي لو سمحت مش عايزك تحط سجادة في الشقة. كتر خيركم. واكتب في القسيمة إن مفيش قائمة منقولات وإنك اشتريت العفش كله ودفعت مهر.
هاتقول لي مفيش حد بيرضى بكده. هاقول لك دور على واحدة على قد حالها واتجوزها. واحدة بتنام في عشة وعندها دين وأخلاق أحسن لك من طبيبة أو مهندسة أو في مستوى اجتماعي مزعج تحملك فوق طاقتك.
والموضوع مش قصة ذكورية ونسوية. لأن اللي بيكتفك بالقائمة هو والد الزوجة (ذكر).
القانون بيخلي الزوجة تختلع منك في لحظة وتاخد حضانة ومسكن ونفقات بأنواعها وقبل ده بتاخد القايمة سواء كنت إنسان كويس أو مش كويس. يعني تبقى الزوجة تقدر تفارقك لأقل سبب وبمنتهى السهولة وأنت زي الباشا ماتقدرش تطلقها لو هي مش كويسة؟!
القصة باختصار هي تحويل الزواج الإسلامي البسيط إلى زواج أصعب من الميثاق الكاثوليكي الغليظ..
هي سهل تطلقك بس أنت مش هاتقدر.. لأن الحبس هو البديل.
