23/08/2026
اتصل بيا شخص محترم، وقعد يحكيلي تفاصيل واقعة جريمة تشهير.
وبعد ما خلص حكايته، كان مُصر جداً يعرف مني :-
المتهم ده هيتحبس كام سنة؟
التهمة عقوبتها إيه؟
وهتبقى جناية ولا جنحة؟
* فكان ردي واضح .....
أنا مش هخمنلك العقوبة … ومش دوري أقولك المتهم هياخد كام سنة.
ليه بقي؟؟
لأن القيد والوصف للواقعة، وتحديد الإتهامات، مش دور المحامي إنه يتوقعهم من كلامك وروايتك اللي ٩٠٪ منهم بتكون مش صحيحة.
ده دور جهة التحقيق بعد ما تفحص الواقعة، وتطلع على الأدلة والمستندات، وتسمع الشهود.
أما دوري كمحامي .…
فبيبدأ بشكل حقيقي لما أشوف الورق.
أشوف المحضر.
أشوف أقوال الشاكي.
أشوف المستندات.
أشوف الأدلة.
أعرف الإجراءات اللي تمت.
وساعتها أقدر أجاوبك إجابة قانونية مبنية على واقع، مش على توقع.
وأقدر أقولك :-
إيه موقفك بالظبط؟
إيه الاتهامات اللي النيابة بتوجهالك؟
وإيه التصرف الصح.
أنا عزت علشان أعمل دوري صح، وبما يرضي الله ويرضيني، لازم أشوف الورق الأول واخد وقتي في الإطلاع.
📌 اه وبالمناسبة…
أنا مش تحت التقييم، ومش مستني رأي حد فيا أو في شغلي.
أنا عزت العاصي، وبكل تواضع، عارف أنا مين، وعارف شغلي بيمشي إزاي.
لا بيفرق معايا المدح ، ولا بيهزني الذم.
وكمان مش بحب المقارنات خاصة اللي من نوع :
«أصل الأستاذ فلان قال كذا … وأصل الأستاذ فلان قالي هعملك وهعملك…»
كل الأساتذة فوق راسي، وليهم كامل الاحترام والتقدير، ومش هسمح لأي حد إنه يجيب سيرة أستاذ محامي إلا بكل احترام.
أنا مش داخل سباق مع حد ولا ببص لأي حد.
أنا بعمل شغلي ومركز في حياتي وبس.
واللي بيني وبين موكلي في الآخر مش كلام كتير، اللي بينا شغل ونتيجة.
عزت عماد العاصي
المحامي
