28/06/2023
X զորամասի «քանդման» լուրերի մասին իրականությունը.
Վերջին շրջանում մամուլում մեծ աղմուկ է բարձրացրել X զորամասի «քանդման» հետ կապված խնդիրը, շրջանառվում են տարատեսակ կարծիքներ: Թեման հանրության համար զգայուն է, որովհետև խոսք է գնում զոհված հայորդիների հիշատակին նվիրված հուշակոթողի մասին: Հենց զոհված տղաների անունն էլ շահարկելով որոշ մարդիկ փորձել են տիրանալ այլ մարդու սեփականությանը:
Թեման ինքնին զգայուն և նուրբ է, իրականության աղավաղումները հաճախ կշռադատորեն չեն վերլուծվում՝ էմոցիոնալ ֆոնի վրա ստեղծելով ոչ ամբողջական և իրականությանը չհամապատասխանող տեղեկատվական հոսքեր։
Հողամասի սեփականատեր «Ա.Կ.Ր.Ա-ԿՈՄ» ՍՊԸ-ի փաստաբան Վահե Սեդրակյանը մանրամասներ է հայտնել խնդրի վերաբերյալ՝ հանրությանը ևս մեկ անգամ իրազեկելու, ավելորդ շահարկումները կանխելու համար․
«Այս ցավոտ և նուրբ խնդրի շուրջ ողջ իրականությունն աղավաղվում է և դա է պատճառը, որ ընկերության ներկայացուցիչների հետ քննարկելուց հետո ցանկանում եմ ներկայացնել իրական և ապացույցներով հիմնավորված փաստեր»:
Սեդրակյանն ընդգծում է՝ ինքը ստանձնել է ընկերության իրավունքների պաշտպանությունը և լավատեղյակ է խնդրին․ «Մամուլով հողամասի սեփականատերերը ներկայացվում են որպես բարոյական կերպար չունեցող անձինք, այնինչ իրականությունը լրիվ այլ է։ «Ա.Կ.Ր.Ա-ԿՈՄ» ՍՊԸ-ն 2007 թվականից հանդիսանում է այն հողամասի սեփականատերը, որի տարածքը Աղաբեկ Խաչատրյանը տարիների ընթացքում ինքնակամ զբաղեցրել է»,-փաստաբանի ներկայացմամբ՝ ընկերության կողմից Աղաբեկ Խաչատրյանին բազմիցս զգուշացվել է, որ այդ տարածքը հանդիսանում է սեփականություն և վերջինս պետք է ազատի այն: Սակայն, Խաչատրյանը շարունակել է զբաղեցնել այլ անձին սեփականության իրավունքով պատկանող հողամասը, որի արդյունքում ընկերությունը դիմել է դատարան ուրիշի ապօրինի տիրապետումից գույքը վերադարձնելու պահանջով»:
Փաստաբան Վահե Սեդրակյանն ուշադրություն է հրավիրում հետևյալ հարցին․
«Մամուլում տեղ գտած տեսանյութում Աղաբեկ Խաչատրյանը հայտնում է, որ ինքը չի իմացել հողամասն այլ անձին պատկանելու մասին, այնինչ վերջինիս դեռ շատ վաղուց զգուշացվել է, որ այն պատկանում է մասնավոր անձի և պետք է ազատվի: եթե նույնիսկ չի իմացել, ապա չպտեք է առանց ճշտելու ինքնակամ գործողություններ իրականացվեին: Աղաբեկ Խաչատրյանը հայտնում է, որ Ամերիկայից սեփականատերը հրաման է տալիս և հողը դրել աճուրդով վաճառում է, այնինչ՝ հողամասն աճուրդով չի վաճառվում և հանդիսանում է մասնավոր սեփականություն»:
Աղաբեկ Խաչատրյանը հայտնում է նաև, որ ինքն էլ ունի թուղթ, գեոդեզիա քաղաքապետարանի կողմից և փաստաթղթերը կիսատ-պռատ թողելուց հետո ոչ մի փաստաթուղթ ուժի մեջ չմտավ։
«Սա իրականությանը չի համապատասխանում, քանի որ Աղաբեկ Խաչատրյանը չէր կարող նշված հողամասի իրավահաստատող փաստաթուղթ ունենալ, քանի որ այն դեռևս 2007 թվականից (իսկ դրանից առաջ պատկանել է այլ սեփականատիրոջ) պատկանել է բացառապես ընկերությանը, որի մասին վերջինս իմացել է: Ինչ վերաբերում է գեոդեզիային, ապա ցանկացած հողամաս կարելի է չափագրել, նշահարել կամ գեոդեզիա անել, դա դեռ չի նշանակում, որ դա սեփականություն է: Եթե վերջինս ուներ իրավահաստատող փաստաթուղթ, ապա դատարանում կներկայացներ»,- հայտնել է փաստաբան Սեդրակյանը:
Վահե Սեդրակյանն ասում է, որ հարցի վերաբերյալ քննարկումների շրջանակում խոսվում է, թե ինչու՞ այդ մասից ընկերությունը չի հրաժարվում կամ օտարում․ «Հողամասը մեր կողմից նշահարվել է և այս հողամասի առանձնահատկությունն այն է, որ կառուցված շինությունները գտնվում են 1.1 հա հողամասի մեջտեղի մասում և այդ մասից հրաժարվելը կնշանակի հողամասի գրեթե կեսից հրաժարում, ինչն ընկերությանը կզրկի իր հողամասն ըստ նպատակի օգտագործելու հնարավորությունից: Հարկ եղած դեպքում կհրապարակվի նաև իրավիճակի հատակագիծը, որտեղ հստակ երևում է, որ կառույցն ընկնում է հողամասի կենտրոնական հատվածում և զորամասի զբաղեցրած հատվածի օտարումը հողամասը կբաժանի երկու մասի, որն էլ անհնարին կդարձնի այն ըստ նպատակի օգտագործելը»։
Ամենախնդրահարույց թեմայի՝ X զորամասը քանդելու մասին: Սեդրակյանը նշում է, որ այս հարցին ի սկզբանե ընկերության ներկայացուցիչները ցուցաբերել են չափազանց զգուշություն և նրբանկատություն, կատարվել են Աղաբեկ Խաչատրյանի գրեթե բոլոր ողջամիտ պահանջները։
Սեդրակյանի խոսքով՝ մեկ տարի է արդեն տարածքն ազատելու վերաբերյալ հարկադիր կատարման ծառայությունում կատարողական վարույթ է հարուցվել, սակայն մինչ այժմ կատարում չի եղել և դա ընկերության ներկայացուցիչների և հարկադիր կատարման ծառայության նրբանկատության և խնդրին ճիշտ լուծում տալու մասին է վկայում, այլապես ընկերությունը կարող էր բողոք ներկայացնել և պահանջել վճռի անհապաղ կատարում: Եթե Աղաբեկ Խաչատրյանի կողմից հրապարակայնորեն բնութագրած կերպարի մարդիկ լինեին սեփականատերերը, ապա կասեին ունենք դատական ակտ և մեզ չի հետաքրքրում ի կատար ածեք և տարածքը հանձնեք մեզ:
«Ա.Կ.Ր.Ա-ԿՈՄ» ՍՊԸ-ի ներկայացուցչի հավաստմամբ՝ բոլորս ի սկզբանե հստակ մի բան ենք ֆիքսել, որ զորամասը չպետք է քանդվի, այն ինչքան էլ ծախսատար լինի պետք է անվնաս տեղափոխվի, բոլորը հասկացել են խնդրի էությունը և ջանք չեն խնայել, որպեսզի ճիշտ լուծում ապահովվի․«Առհասարակ ապամոնտաժման աշխատանքները պարտապանի վրա են, այս դեպքում Աղաբեկ Խաչատրյանի, բայց ընկերությունը ստանձնել է ապամոնտաժելու բոլոր ծախսերը, հրավիրել է հատուկ մասնագետների, որոնք անվնաս կկատարեն զորամասի տեղափոխությունը»:
Ընդ որում, Սեդրակյանն ասում է՝ հանուն ճշմարտության ուզում է նշել, որ Աղաբեկ Խաչատրյանը հարկադիր կատարման ծառայությունը և ընկերության ներկայացուցիչներն ընդհանուր հայտարարի են եկել, որ ընկերությունը հողամաս գնի Աղաբեկ Խաչատրյանի անունով, ընկերությունն իր հաշվին տեղափոխման բոլոր ծախսերը կատարի, իսկ Խաչատրյանը չխոչընդոտի այդ գործընթացին, որն իրականացվել է:
«Ընկերությունը մի քանի միլիոն դրամով մեկ-երկու ամիս առաջ Աղաբեկ Խաչատրյանի անունով հատուկ այս նպատակի համար Աղաբեկ Խաչատրյանի համաձայնությամբ, ՆՐԱ ՆԱԽԸՆՏՐԱԾ ՎԱՅՐՈՒՄ հող է գնել և այդ գործընթացն ամբոջությամբ համաձայնեցվել է վերջինիս հետ»,- Սեդրակյանն ընդգծում է, որ ընկերությունը բոլոր ջանքերը գործադրում է խնդրին լուծում տալու համար և արդեն իսկ իր գործողություններով ապացուցել է, որ ազնվորեն ընդառաջում է ցանկացած ողջամիտ պահանջի:
«Ա.Կ.Ր.Ա-ԿՈՄ» ՍՊԸ-ի փաստաբան Վահե Սեդրակյանի ներկայացրած տվյալների համաձայն՝ փաստորեն Աղաբեկ Խաչատրյանի բոլոր պահանջները կատարվել են, վերջինս համաձայնվել և համաձայնագիր է ստորագրել, սակայն դրա մասին չի բարձրաձայնում և ուղղակի զարմանալի է, որ բոլոր պահանջները կատարելուց հետո կրկին աղմուկ է բարձրացնում: Զոհված հերոսների ծնողների հուզական վիճակը բնականաբար հասկանալի է, բայց իրականում, եթե օբյեկտիվորեն վերլուծենք իրավիճակը, ապա կա դատական ակտ և ընկերությունը պարտավոր չէ ջանքեր գործադրել և շատ հանգիստ կարող էր առանց միլիոնավոր դրամներ ծախսերի իր նպատակին հասնել, բայց ընկերության տնօրենն ընտրեց բարդ ճանապարհ, իսկ այսօր դրա համար վերջինս հալածվում է: Մեկը չի հարցնում օրինակ, ինչ եք պայմանավորվել, ինչպես եք պայմանավորվել, ինչքան գումար եք ծախսել, արդյո՞ք գրավոր պայմանավորվածություն ունեք, ինչու հողամաս գնեցիք, ով էր Ձեզ խնդրել հողամաս գնել: Բնականաբար այդ հարցերը քչերին է հետաքրքրում:
Ընկերության տնօրեն Մելիք Հակոբյանին հայհոյում են ի՞նչի համար, որ իր հողամասը չի ուզում կորցնել, որ դրա համար մի քանի միլիոն դրամ ծախսում է, որ զորամասը ցանկանում է անվնաս տեղափոխել, որ շիտակ և համարձակ գալիս կանգնում է ծնողների առջև և իր իրավունքներն է պաշտպանում, որ ստանձնում է հուշարձանի անվճար և անվնաս տեղափոխումը: Մելիքի ազնիվ ու համարձակ վարքագծի համար նրան անպատվելը, նրա ծնողներին հայհոյելը արդյո՞ք տեղին է, արդյո՞ք Մելիքը չէր կարող փաստաբանի և հարկադիր կատարողի մեջքի հետևում թաքնվելով հասնել իր նպատակին: Ինքն ընտրել է դժվար ճանապարհը, այսինքն ընտրել է խնդրի մասին բաց ճակատով ծնողների հետ անկեղծ խոսելու և մարդկանց խնդիրը ներկայացնելու ճանապարհը, որի համար այսօր թուքումուր է ուտում: Ողջունելի կլիներ, որ այս խառնաշփոթի հեղինակն անկեղծորեն խոսեր բոլոր պայմանավորվածությունների մասին:
