Իրավաբանական և հաշվապահական խորհրդատվություն

01/02/2024

❓ԱՁ, թե՞ ՍՊԸ:

ԱՁ-ի դեպքում ֆիզիկական անձն իր ողջ գույքով է պատասխանատվություն կրում ԱՁ-ի պարտավորությունների համար:

ՍՊԸ-ի հիմնադիրները որևէ անձնական պատասխանատվություն չեն կրում ՍՊԸ-ի պարտականությունների համար, և նրանց պատասխանատվությունը սահամանափակվում է միայն ՍՊԸ-ի կանոնադրական կապիտալում իրենց ներդրածի չափով:

Եթե մի քանի անձինք ցանկանում են իրականացնել համատեղ ձեռնարկատիրական գործունեություն, այդ դեպքում անհրաժեշտ է գրանցել իրավաբանական անձ՝ ՍՊԸ կամ բաժնետիրական ընկերություն՝ կախված բաժնետերերի քանակից փակ կամ բաց:

Հարկային առումներով որևէ տարբերություն չկա՝ ձեռնարկատիրական գործունեությունն իրականացվում է ԱՁ-ի, թե ՍՊԸ-ի միջոցով:

Հաշվապահական հաշվառման առումով ԱՁ-ն ավելի պարզ գործընթացներ ունի, իսկ փաստաթղթավորման ծավալն՝ ավելի քիչ,քան ՍՊԸ-ի դեպքում:

📌Եղե՛ք տեղեկացված մեզ հետ:

27/01/2024

✔️Լինենք տեղեկացված!

⚖️Բարձրագույն Դատական Խորհուրդը հայտարարում է՝

1. «Հայաստանի Հանրապետության քաղաքացիական դատավարության օրենսգրքում փոփոխություն և լրացում կատարելու մասին» 2023 թվականի դեկտեմբերի 22-ի ՀՕ-11-Ն օրենքով սահմանված էլեկտրոնային համակարգը (այսուհետ՝ Համակարգ) արդեն իսկ գործարկվել է https://cabinet.armlex.am ինտերնետային կայքի հասցեով:

2. Վերոնշյալ օրենքը, որի ուժի մեջ մտնելը պայմանավորված է էլեկտրոնային համակարգի գործարկմամբ, ուժի մեջ է մտնելու սույն հայտարարության հրապարկմանը հաջորդող տասներորդ օրվանից՝ 2024 թվականի փետրվարի 1-ից:

3. 2024 թվականի փետրվարի 1-ից սկսած՝ դատարան ներկայացվող նոր դատական գործերով բոլոր դատավարական փաստաթղթերը (հայցադիմում, դիմում, բողոք, պատասխան, դիրքորոշում, միջնորդություն և այլն) պետք է կազմվեն և ներկայացվեն Համակարգի միջոցով՝ Համակարգի կողմից տրամադրվող գործիքակազմին և առաջադրվող պահանջներին համապատասխան (բացառությամբ պետական գաղտնիք կազմող տեղեկությունների, որոնք ներկայացվում են միայն նյութական եղանակով) ներքոնշյալ սուբյեկտների կողմից՝

3.1. իրավաբանական անձինք, անհատ ձեռնարկատերերը, պետական և տեղական ինքնակառավարման մարմինները, գնումների հետ կապված վեճերով վարույթում պատասխանողները, ներկայացուցիչ հանդիսացող փաստաբանները, սնանկության գործով կառավարիչները, նոտարները և արտոնագրված հաշտարարները՝ անկախ Համակարգի միջոցով որևէ անգամ որևէ գործողություն կատարած լինելուց կամ չլինելուց,

3.2. ֆիզիկական անձինք, որոնք քաղաքացիական գործի շրջանակներում առնվազն մեկ անգամ Համակարգի միջոցով կատարել են որևէ գործողություն և հետագայում գործը քննող դատարանին տեղյակ չեն պահել Համակարգից օգտվելու անհնարինության մասին:

25/01/2024

Սիրելի ընկերներ, քանի որ ես բազմաթիվ բնագավառներում եմ և իրականացնում եմ մի շարք գործունեություններ և միշտ ընկերներիս կողմից տրվում է հարց, թե ի՞նչ մասնագիտություն ունեմ և ինչո՞վ եմ զբաղվում, այդ իսկ պատճառով ցանկանում եմ տեղեկացնել իմ գործունեության մասին։

📌Մասնագիտությամբ` Իրավաբան եմ (բիզնես իրավաբանության ոլորտում), Հաշվապահ, Քոուչ (քոուչ֊մոտիվատոր), «Իրականացրու նպատակներդ 101 օրում» մոտիվացիոն ծրագրի հեղինակ, Բիզնես էթիկայի ոլորտում` թրեյներ, և սույն ոլորտի չորս գրքերի՝ «Գործարար Էթիկա», «Գործարար Էթիկայի հիմունքներ», «Բիզնես էթիկայի պարզ արվեստը» և «Բիզնեսը և էթիկան» հեղինակ։

📌«Akademikka Training Institute»-ի պաշտոնական ներկայացուցիչն եմ Հայաստանում ✨️

📌Սովորել եմ «Chicago-Kent College of Law»-ի բիզնես իրավաբանության բաժնում, սովորել եմ՝ «ArmCoaching Coaches Development Center»-ում՝ քոուչինգ✨️

📌Գրել եմ հինգերորդ գիրքս, որը կոչվում է՝ «Կանայք»: Գրում եմ վեցերորդ գիրքը, որը կոչվելու է` «Կանայք և Տղամարդիկ»։

📌Հանդիսանում եմ՝ «Women's business club» ֊ ի հիմնադիրը:

📌Ունեմ «Ռեյկի»֊ի առաջին աստճանի որակավորում։

📌 Դասախոսում եմ «ՀՊՏՀ Գյումրու մասնաճյուղ»֊ում։

Կյանքում կարևորում եմ առաջին հերթին լավ ՄԱՐԴ, լավ ԸՆԿԵՐ լինելը✨️

24/01/2024

✍🏼Փորձաշրջանը աշխատանքային պայմանագիր կնքելիս,ժամկետները.

Աշխատանքային պայմանագրի կնքման ժամանակ կողմերի համաձայնությամբ կարող է սահմանվել փորձաշրջան:

Այն կարող է սահմանվել գործատուի ցանկությամբ աշխատողի համապատասխանությունը տվյալ աշխատանքին ստուգելու նպատակով, կամ աշխատանքի ընդունվողի ցանկությամբ` առաջարկվող աշխատանքին իր համապատասխանությունը որոշելու համար:

📌Փորձաշրջանի մասին պայմանները պետք է սահմանվեն աշխատանքային պայմանագրով:

Փորձաշրջանի ընթացքում աշխատողն ունի բոլոր իրավունքները և կրում է բոլոր պարտականությունները, որոնք սահմանված են աշխատանքային օրենսգրքով, այլ օրենքներով և նորմատիվ իրավական ակտերով, կոլեկտիվ և աշխատանքային պայմանագրերով:

Փորձաշրջանի ժամկետը չի կարող երեք ամսից ավելի լինել, բացառությամբ ՀՀ աշխատանքային օրենսգրքով նախատեսված դեպքերի:

ՀՀ օրենսդրությամբ նախատեսված դեպքերում նաև մինչև տասներկու ամիս ժամկետով կարող է սահմանվել փորձաշրջան:

Եղե՛ք տեղեկացված:

10/12/2023

⚖️Փոխառության պայմանագիր՝ պարտքով գումար հանձնելու իրավական տարբերակ

❔Ի՞նչ է փոխառության պայմանագիրը

Փոխառության պայմանագրով մեկ կողմը (փոխատուն) մյուս կողմի (փոխառուի) սեփականությանն է հանձնում դրամ կամ տեսակային հատկանիշով որոշվող այլ գույք, իսկ փոխառուն պարտավորվում է փոխատուին վերադարձնել միևնույն գումարի դրամ (փոխառության գումարը) կամ փոխատուից ստացված գույքին հավասար քանակի և նույն տեսակի ու որակի գույք:

❔Ի՞նչ ձևով է կնքվում փոխառության պայմանագիրը

Օրենքը սահմանում է, որ փոխառության պայմանագիրը կնքվում է հասարակ գրավոր ձևով։ Այս պայմանագիրը նոտարարական վավերացում չի պահանջում։

Ի հավաստումն փոխառության պայմանագրի և դրա պայմանների` կարող է ներկայացվել փոխառուի տված ստացականը կամ փոխատուի կողմից փոխառուին որոշակի դրամական գումար կամ որոշակի քանակի գույք տալը հավաստող այլ փաստաթուղթ:

❕Գրավոր ձևը չպահպանելը հանգեցնում է փոխառության պայմանագրի անվավերության: Նման պայմանագիրն առոչինչ է:

Փոխառության պայմանագիրը կնքված է համարվում դրամ կամ այլ գույք հանձնելու պահից:

Փոխառության պայմանագրի կնքման դեպքում կողմերը քննարկում են նաև փոխատուի կողմից տոկոսներ ստանալ կամ չստանալը։ Օրենքը թույլատրում է երկու դեպքում էլ կնքել պայմանագիրը։ Այս դեպքում, պայմանագրում պետք է հստակ կետով նշված լինի տոկոսների առկայությունը կամ դրանց բացակայությունը։

Տոկոսներ սահմանելու դեպքում փոխառության պայմանագրում հստակ պետք է սահմանվեն տոկոսների չափը և հաշվարկման կարգը: Փոխառության պայմանագրի կնքման պահին տոկոսների չափը չի կարող գերազանցել Հայաստանի Հանրապետության կենտրոնական բանկի սահմանած բանկային տոկոսի հաշվարկային դրույքի կրկնապատիկը:

Եթե փոխառուն պայմանագրով սահմանված չի կատարում իր պարտավորությունը, ապա փոխառության պայմանագրով նախատեսված տոկոսները դադարում են, իսկ այդ գումարին ենթակա են վճարման միայն ՀՀ քաղաքացիական օրենսգրքի 411 հոդվածի 1-ին կետով նախատեսված չափով տոկոսներ՝ սկսած այն օրվանից, երբ գումարը պետք է վերադարձվեր մինչև գումարը փոխատուին վերադարձնելու օրը:Անտոկոս փոխառության գումարը փոխառուն կարող է վերադարձնել վաղաժամկետ:

Տոկոսներով տրամադրված փոխառության գումարը կարող է վաղաժամկետ հետ վերադարձվել միայն փոխատուի համաձայնությամբ, եթե այլ բան նախատեսված չէ օրենքով կամ փոխառության պայմանագրով:

Փոխառության գումարը համարվում է վերադարձված այն փոխատուին հանձնելու կամ նրա բանկային հաշվին փոխանցելու պահին, եթե այլ բան նախատեսված չէ փոխառության պայմանագրով:

08/12/2023

⚖️Ի՞նչ է անշարժ գույքի վարձակալության պայմանագիրը և ի՞նչպես պետք է այն կնքել։

Վարձակալության պայմանագրով վարձատուն պարտավորվում է վճարի դիմաց վարձակալի ժամանակավոր տիրապետմանը և (կամ) օգտագործմանը հանձնել գույք:

Նախ հասկանանք, թե ինչ է իրենից ներկայացնում անշարժ գույքը։

📌Անշարժ գույք են համարվում հողամասերը, ընդերքի մասերը, մեկուսի ջրային օբյեկտները, անտառները, բազմամյա տնկիները, ստորգետնյա և վերգետնյա շենքերը, շինությունները և հողին ամրակցված այլ գույքը, այսինքն` այն օբյեկտները, որոնք անհնար է հողից անջատել առանց այդ գույքին կամ հողամասին վնաս պատճառելու կամ դրանց նշանակության փոփոխման, դադարման կամ նպատակային նշանակությամբ հետագա օգտագործման անհնարինության:

📌Հավելենք նաև, որ անշարժ գույքի վարձակալության պայմանագիրը պետք է կնքվի գրավոր ձևով, և ենթակա է նոտարական կարգով վավերացման, իսկ պայմանագրից ծագող իրավունքները ենթակա են պետական գրանցման: Գործարքի նոտարական ձևը չպահպանելը կամ պետական գրանցում չիրականացնելը հանգեցնում է գործարքի առոչնչության:

Անշարժ գույքի վարձակալության պայմանագրի նոտարական կարգով վավերացման համար անհրաժեշտ է վարձատուի և վարձակալի կամ նրանց կողմից լիազորված անձանց ներկայությունը և հետևյալ փաստաթղթերը՝

✔️Ֆիզիկական անձանց դեպքում՝ անձնագիր, իսկ իրավաբանական անձանց դեպքում՝ ընկերության պետական գրանցման վկայականը և կանոնադրություն, ընկերության անունից հանդես եկող անձի անձնագիրը
✔️Ֆիզիկական անձի կողմից լիազորված անձի ներկայանալու դեպքում՝ նոտարական կարգով տրված լիազորագիր, իսկ իրավաբանական անձի դեպքում՝ ընկերության լիազոր մարմնի կողմից տրված լիազորագիր
✔️Ֆիզիկական անձ հանդիսացող վարձատուի համար անհրաժեշտ է ամուսնու համաձայնությունը, ում ստորագրության իսկությունը հաստատվում է նոտարի կողմից (համաձայնությունը ձևակերպվում է նոտարական գրասենյակում, բացառությամբ օրենքով սահմանված դեպքերի)
✔️Իրավաբանական անձի դեպքում հնարավոր է նաև մասնակիցների կամ բաժնետիրերի որոշման անհրաժեշտություն
✔️Տարածքի սեփականության վկայականը․ այն դեպքում, եթե վարձակալության է հանձնվում տարածքի կամ շինության մի հատվածը, անհրաժեշտ է նաև լիցենզվորված չափագրողի կողմից կատարված չափագրության ներկայացում
✔️ՀՀ ԿԱ անշարժ գույքի կադաստրի պետական կոմիտեի աշխատակազմի կողմից տրված միասնական տեղեկանք՝ տարածքի նկատմամբ գրանցված իրավունքների և սահմանափակումների վերաբերյալ։

Վերոնշյալ փաստաթղթերը ներկայացնելուց հետո, պայմանագիրը ներկայացվում է նոտարի կողմից վավերացման, որից հետո անհրաժեշտ կից փաստաթղթերի հետ մեկտեղ պետք է 30 աշխատանքային օրվա ընթացքում ներկայացնել ՀՀ ԿԱ անշարժ գույքի կադաստրի պետական կոմիտե՝ պայմանագրից ծագող իրավունքների պետական գրանցման համար:

Այս պահանջները չպահպանելը կհանգեցնի գործարքի անվավերության: Նման գործարքն առոչինչ է:

01/12/2023

Հնարավորինս պահպանեք և հետևողական եղեք օրենքներին👌

#իրավաբան

25/11/2023

Գիտեի՞ք որ ...

07/11/2023

07/03/2022

Սիրելի աղջիկներ և կանայք, մեր մայրեր և տատիկներ, ամբողջ հոգով շնորհավորում եմ բոլորիդ միջազգային տոնի՝ մարտի 8-ի առիթով:

Ցանկանում եմ, որ ձեր սրտերում անսահման սեր ապրի: Մարդկային ամբողջությունը խաղաղության և ներդաշնակության մեջ է, իսկ ներդաշնակությունը քրիստոնեական սերն է:

Մեր բոլոր դժբախտությունները հենց նման սիրո բացակայության արդյունք են, այդ պատճառով մաղթում եմ ձեզ սեր քրիստոնեական լայն իմաստով:

Շարունակեք նվիրված և ամբողջ սրտով ծառայել ձեր ընտանիքներին՝ ապահովելով մեր Հայրենիքի զարթոնքն և առաջընթացը 😘😘😘