25/01/2025
Հարգելի′ ընկերներ և գործընկերներ,
2025 թվականի փետրվարի 10-ին՝ ժամը 09։00-ից մինչև 18։00-ն, ՀՀ փաստաբանների պալատի` Երևան քաղաքի Զաքյան 7-2 հասցեում գտնվող վարչական շենքի 2-րդ հարկի սրահում, տեղի է ունենալու Հայաստանի Հանրապետության փաստաբանների պալատի ընդհանուր ժողով՝ հետևյալ օրակարգային հարցերով.
1) ՀՀ փաստաբանների պալատի խորհրդի անդամների ընտրություն:
2) «ՀՀ հարկային օրենսգրքում փոփոխություններ կատարելու մասին» 12.06.2024 թվականին ընդունված թիվ ՀՕ-285-Ն օրենքի՝ փաստաբանությանը առնչվող խնդրահարույց կարգավորումները դատապարտող հայտարարության ընդունում:
Կարևորում եմ հատկապես օրակարգի 2-րդ հարցի քվեարկությանը փաստաբանների մասնակցությունը, քանի որ հարկային բեռի անհարկի ավելացումը հուզում է թե՛ փաստաբաններին, և թե՛ հանրությանը։
Կարծում եմ՝ յուրաքանչյուր փաստաբան պետք է իր աջակցությունը հայտնի ՀՀ փաստաբանների պալատի խոհրդի կատարած աշխատանքին և իր անմիջական մասնակցությամբ դառնա հարցի պահանջատեր։
Հարգելի՛ փաստաբաններ, հարկային օրենսգրքում փոփոխություններ կատարելու մասին բազմիցս խոսվել է, տարբեր հարթակներում եղել են քննարկումներ։
Արդեն ձևավորվել է հանրության լայն շերտերի վերաբերմունքը, քանի որ հարկային բեռի բարձրացումն անմիջականորեն առնչվում է նաև նրանց իրավունքներին (շահերին)։
Ստեղծված իրավիճակում փաստաբանական համայնքը պարտավոր է ապավինել սեփական ուժերին ու հնարավորություններին:
Գործընկերնե՛ր, ընդհանուր ժողովին ակտիվ մասնակցության արժեքը շատ ավելին է, քան կարող ենք պատկերացնել։
Խնդրում եմ ժամանակ գտնել և մասնակցել առաջիկա ընդհանուր ժողովին՝ Ձեր քվեարկությամբ աջակցելով բարձրացված հարցի լուծմանը։
