30/09/2026
GJYKATA E DREJTËSISË SË BASHKIMIT EUROPIAN:
C-26/25-VENDIM I DHOMËS SË TRETË.PUBLIKUAR ME 21.09.2026
- (Kërkesë për vendim paraprak e paraqitur nga Gjykata e Szeged-it – Hungari) – PQ kundër Drejtorisë së Përgjithshme Kombëtare të Emigracionit, Drejtorisë Rajonale të Rrafsh*t të Madh Jugor, Zyrës për Mbrojtjen e Kushtetutës.
Çështja C-26/25, Bukla:
🔎 (Referencë për një vendim paraprak – Shtetësia e Bashkimit Europian – Neni 20 i TFBE-së – Anëtar i familjes së një shtetasi të Bashkimit që nuk e ka ushtruar kurrë të drejtën e lëvizjes së lirë – Hapësira e lirisë, sigurisë dhe drejtësisë – Kontrollet kufitare, azili dhe emigracioni – Direktiva 2008/115/KE – Kthimi i shtetasve të vendeve të treta që qëndrojnë në mënyrë të paligjshme – Kërcënim për sigurinë kombëtare – Deklaratë nga një autoritet kombëtar i specializuar – Arsyetim – Qasje në dosje – Informacion i klasifikuar – Përparësia e së drejtës së BE-së)
HISTORIKU:
PQ, shtetas i një vendi të tretë, kishte hyrë ligjërisht në Hungari në vitin 2005 dhe kishte jetuar atje për një periudhë të gjatë. Ai kishte krijuar një familje me një shtetase Hungareze dhe së bashku kishin dy fëmijë, të dy shtetas hungarezë. PQ ushtronte përgjegjësinë prindërore së bashku me partneren e tij dhe kishte një marrëdhënie të ngushtë familjare me fëmijët.
▪️Më 6 gusht 2020, duke iu referuar situatës së tij familjare, PQ paraqiti kërkesë për një leje kombëtare qëndrimi të përhershëm. Megjithatë, më 9 shtator 2020, Alkotmányvédelmi Hivatal, Autoriteti Hungarez i ngarkuar me mbrojtjen e sigurisë kombëtare, dha një opinion të paarsyetuar sipas të cilit prania e PQ-së në Hungari cenonte interesat e vendit në fushën e sigurisë kombëtare. Të dhënat mbi të cilat ishte mbështetur ky opinion u klasifikua si informacion që nuk lejohet aksesi.
▪️Më 27 tetor 2020, autoriteti i emigracionit refuzoi kërkesën e PQ-së për leje qëndrimi të përhershëm. Më pas, më 3 dhjetor 2020, autoriteti i sigurisë kombëtare propozoi nxjerrjen e një vendimi kthimi ndaj tij, përsëri mbi bazën e vlerësimit se qëndrimi i tij përbënte cenim të interesave të sigurisë kombëtare.
▪️Më 25 mars 2021, autoriteti i emigracionit la në fuqi refuzimin e kërkesës së tij për qëndrim, duke u mbështetur edhe në një opinion të autoritetit të specializuar të datës 12 shkurt 2021. Më pas, më 6 maj 2021, ndaj PQ-së u nxor vendim kthimi, i shoqëruar me ndalim hyrjeje dhe qëndrimi për një periudhë prej 10 vjetësh.
PQ e kundërshtoi vendimin për kthimin e tij përpara gjykatave hungareze. Problemi kryesor juridik ishte se PQ nuk kishte akses në informacionin e klasifikuar mbi të cilin ishte mbështetur vlerësimi i sigurisë kombëtare. Për më tepër, autoriteti administrativ i emigracionit ishte i detyruar të merrte në konsideratë vlerësimin e autoritetit të specializuar të sigurisë kombëtare.
Në këtë kontekst, Szegedi Törvényszék (Gjykata e Szegedit), duke shqyrtuar çështjen kombëtare, konstatoi se për zgjidhjen e mosmarrëveshjes ishte e nevojshme të sqarohej interpretimi i së drejtës së Bashkimit Europian.
REFERIMI NË GJYKATËN E DREJTËSISË SË BASHKIMIT EUROPIAN:
Në bazë të nenit 267 TFBE, Gjykata Hungareze iu drejtua Gjykatës së Drejtësisë së Bashkimit Europian me kërkesë për vendim paraprak.
PYETJET QË IU DREJTUAN (GJED):
Nëse e drejta e BE-së lejon që një shtetas i një vendi të tretë, i cili është familjar i shtetasve të atij Shteti Anëtar, të përballet me një vendim kthimi për arsye të sigurisë kombëtare:
1/pa u shqyrtuar paraprakisht ndikimi i vendimit mbi jetën e tij familjare dhe mbi fëmijët e mitur;
2/vetëm mbi bazën e një opinioni detyrues dhe të paarsyetuar të një autoriteti të sigurisë kombëtare;
3/pa pasur akses efektiv në informacionin dhe arsyet thelbësore mbi të cilat është mbështetur vendimi;
4/Në një mënyrë që kufizon mundësinë e tij për të ushtruar në mënyrë efektive të drejtën e mbrojtjes dhe të drejtën për një mjet juridik efektiv;
VENDIM I (GJED):
Gjykata e Drejtësisë e BE-së ka sqaruar kufijtë që duhet të respektojnë autoritetet kombëtare kur ndaj një shtetasi të një vendi të tretë, i cili është anëtar i familjes së shtetasve të BE-së, merret një vendim kthimi për arsye të sigurisë kombëtare.
1. Jeta familjare duhet të shqyrtohet përpara vendimit të kthimit.
Autoritetet nuk mund të nxjerrin automatikisht një vendim kthimi pa vlerësuar më parë ndikimin e tij mbi jetën familjare të personit dhe mbi situatën e fëmijëve të mitur, kur autoritetet kanë dijeni për lidhjet familjare me shtetas të BE-së.
2. Neni 20 TFBE dhe marrëdhënia e varësisë.
Edhe kur shtetasi i BE-së nuk e ka ushtruar ndonjëherë të drejtën e lëvizjes së lirë, neni 20 TFBE mund të jetë relevant.
Gjykata thekson rëndësinë e vlerësimit të fakteve që mund të tregojnë ekzistencën e një marrëdhënieje varësie ndërmjet shtetasit të vendit të tretë dhe shtetasit të BE-së.
3. “Siguria kombëtare” nuk e eliminon shqyrtimin individual.
Një vendim kthimi nuk mund të bazohet vetëm në një opinion detyrues dhe të paarsyetuar të një autoriteti të specializuar të sigurisë kombëtare, pa u shqyrtuar rrethanat individuale të çështjes dhe parimi i proporcionalitetit.
4. Informacioni konfidencial dhe e drejta për një mjet juridik efektiv.
Edhe kur vendimi bazohet në informacion konfidencial, personi i prekur duhet të ketë mundësi reale për të kundërshtuar vendimin.
Gjykata konsideron se nuk është e mjaftueshme që personit t’i mohohet edhe përmbajtja thelbësore e arsyeve mbi të cilat është marrë vendimi dhe që mbrojtja e interesave të tij t’i lihet vetëm ndërhyrjes së një prokurori që ka akses në informacionin konfidencial.
5. Roli i Gjykatës Kombëtare
Gjykata kombëtare duhet të garantojë respektimin e të drejtave të mbrojtjes dhe të drejtën për një mjet juridik efektiv, duke marrë parasysh kufizimet që mund të ekzistojnë për shkak të sigurisë kombëtare.
6. Përparësia e së drejtës së BE-së
Gjykata e Drejtësisë rithekson se një gjykatë kombëtare nuk mund të jetë e detyruar të ndjekë interpretimin e një gjykate më të lartë kombëtare kur, në dritën e jurisprudencës së GJED-së, ai interpretim është në kundërshtim me të drejtën e Bashkimit.
VENDIMI C-26/25, BUKLA SJELL NJË SËRË PARIMESH ME RËNDËSI PRAKTIKE PËR ÇËSHTJE:
▪️Të emigracionit dhe kthimit të shtetasve t vendeve të treta;
▪️Të bashkimit familjar;
▪️Të drejtës së qëndrimit të familjarëve të shtetasve të BE-së;
▪️Të mbrojtjes së fëmijëve dhe jetës familjare;
▪️Të sigurisë kombëtare;
▪️Të informacionit të klasifikuar;
▪️Të së drejtës për një mjet juridik efektiv dhe të drejtave të mbrojtjes;
📌 MESAZHI KRYESOR I
JURISPRUDENCËS:
-Edhe në kontekstin e sigurisë kombëtare, autoritetet dhe gjykatat kombëtare duhet të respektojnë kërkesat e së drejtës së BE-së, përfshirë vlerësimin individual, proporcionalitetin, jetën familjare dhe garancitë efektive procedurale.
➡️ Burimi: https://infocuria.curia.europa.eu/tabs/affair?lang=DE&sort=AFF_NUM-DESC&searchTerm=%2522C%252D26%252F25%2522&publishedId=C-26%2F25
