16/09/2026
Haga – Gjykata që u themelua për drejtësi, sot vulosi një padrejtësi historike.
Jam e tronditur dhe e revoltuar nga vendimi ndaj ish-drejtuesve të Ushtrisë Çlirimtare të Kosovës. Dënimi i tyre me gjithsej 81 vite burg është goditje jo vetëm ndaj katër individëve, por edhe ndaj ndërgjegjes së një populli që pagoi me gjak të drejtën për të jetuar i lirë.
Ku ishte kjo drejtësi kur shqiptarët vriteshin, masakroheshin, dhunoheshin dhe dëboheshin nga shtëpitë e tyre? Ku është drejtësia për mijëra viktima, të zhdukurit dhe familjet që ende presin eshtrat e të afërmve?
Reçaku, Krusha, Meja, Izbica, Pokleku dhe Suhareka nuk janë thjesht emra vendesh. Janë plagë të hapura dhe dëshmi të krimeve shtetërore që synuan spastrimin e Kosovës nga shqiptarët. Megjithatë, sot drejtuesit e rezistencës shqiptare (me apo pa të metat e tyre) dënohen me dekada burg, ndërsa shumë urdhërues dhe ekzekutorë të krimeve të regjimit serb nuk mbajtën kurrë përgjegjësi të plotë.
Kosova nuk pushtoi askënd.
Kosova nuk shkoi në tokën e askujt.
Kosova luftoi në shtëpinë e vet për mbijetesë dhe liri.
Si avokate, besoj te drejtësia e bazuar mbi prova dhe përgjegjësi individuale. Por drejtësia që ndëshkon me gjithë peshën njërën palë, historikisht viktimë, ndërsa lë në hije krimet masive të agresorit, është padrejtësi e institucionalizuar.
Një vendim mund të dënojë njerëz, por nuk mund ta ndryshojë të vërtetën historike. Historinë nuk mund ta rishkruajnë sallat e gjyqit; atë e kanë mbajtur mbi supe shqiptarët.
Liria e Kosovës është një nga ngjarjet më të bukura të historisë sonë kombëtare dhe askush nuk mund ta cilësojë atë si krim.
Asnjë shqiptar nuk do ta pranojë me zemër këtë vendim.
Urime për padrejtësinë e radhës, “Your Honours”!
RuleOfLaw
