15/08/2024
. . . . . . . . New Peshawar Valley. . . . . . . . . .
دفتر پریس سیکرٹری برائے وزیراعلیٰ خیبرپختونخوا
ہینڈ آوٹ نمبر364
پشاور۔9 اگست 2024
وزیراعلیٰ خیبرپختونخوا سردار علی امین خان گنڈا پور کا نیو پشاور ویلی ہاؤسنگ پروجیکٹ کی تیز رفتار ترقی پر زور
وزیراعلیٰ خیبرپختونخوا سردار علی امین خان گنڈا پور نے متعلقہ حکام کو نیو پشاور ویلی ہاؤسنگ پراجیکٹ پر کام کی رفتار تیز کرنے کی ہدایت کی ہے۔ وزیراعلیٰ ہاؤس پشاور میں منعقدہ ایک اہم اجلاس میں منصوبے پر پیشرفت کا تفصیلی جائزہ لیا گیا۔یہ منصوبہ پشاور کے عوام کے معیار زندگی کو بلند کرنے کے لیے حکومت کے اہم اقدامات میں سے ایک سمجھا جاتا ہے۔ وزیراعلیٰ نےمتعلقہ حکام کو ہدایت کی کہ مذکورہ ہاؤسنگ پراجیکٹ کی بین الاقوامی معیارکے مطابق تعمیر و ترقی یقینی بنائی جائے۔ انہوں نے مزید واضح کیا کہ نیو پشاور ویلی ہاؤسنگ پراجیکٹ کو علاقے میں بڑھتی ہوئی آبادی کی ضروریات کو پورا کرنے کے لیے شہری منصوبہ بندی اور بنیادی ڈھانچے کی ترقی میں اعلیٰ ترین معیارکا عکاس ہونا چاہیے۔
مزید برآں، وزیر اعلیٰ نے اس منصوبے میں اربن فارسٹری کو بھی شامل کرنے کی اہمیت کو اُجاگر کرتے ہوئے ماحولیاتی پائیداری کو فروغ دینے اور اس کے رہائشیوں کے معیار زندگی کو بہتر بنانے کے لیے ہاؤسنگ اسکیم کے اندر چھوٹے جنگلات متعارف کرانے کی ہدایت کی ہے ۔ محکمہ بلدیات کے سیکرٹری داؤد خان، پشاور ڈو یژن کے کمشنر ریاض خان محسود، پشاور ڈویلپمنٹ اتھارٹی کے ڈائریکٹر جنرل خالد محمود نیو پشاور ویلی سٹی کے پراجیکٹ ڈائریکٹر سید عبدالودود شاہ اور دیگر متعلقہ حکام نے اجلاس میں شرکت کی۔
