14/06/2026
"စျေးတည့်ရုံနဲ့ ပွဲ မပြီးသေးပါဘူး
ညှိရပါသေးတယ်"
အိမ်ခြံမြေ အရောင်းအဝယ်တစ်ခုမှာ စျေးနှုန်းညှိနှိုင်းလို့ အဆင်ပြေသွားရုံနဲ့ ပွဲက ရာနှုန်းပြည့် ဖြစ်မြောက်သွားပြီလို့ ပြောလို့မရသေးပါဘူး။
တကယ်တမ်း ပွဲပျက်ရတဲ့ အကြောင်းရင်းတွေထဲမှာ စျေးနှုန်းကြောင့်တင်မဟုတ်ဘဲ "Payment (ငွေပေးချေမှုစနစ်)" ညှိမရလို့ ပျက်သွားတဲ့ပွဲတွေ မနည်းလှပါဘူး။ အဲ့ဒီအချိန်မှ ပျက်ရရင် ပိုအသဲကွဲရနိုင်ပါတယ်။
ဒါကြောင့်မို့လို့ အခုနောက်ပိုင်း ကျွန်တော့်ဆီ အရောင်းအပ်ပြီဆိုတာနဲ့ ဂရံမြေဆိုရင် ဂရံရဲ့ ငွေချေမှုသဘောတရား၊ ပါမစ်မြေဆိုရင်လည်း ပါမစ်ရဲ့ ငွေချေမှုသဘောတရားတွေကို အရောင်းရှင်ရော အဝယ်ရှင်ကိုပါ ကြိုတင်ပြီး သေချာရှင်းပြ၊ နားချထားရပါတယ်။
ဒီနေ့မှာတော့ Payment ကြောင့် ပွဲပျက်တတ်တဲ့ အခြေအနေတွေနဲ့ ကျွန်တော့်ရဲ့ လက်တွေ့ကိုယ်တွေ့ အတွေ့အကြုံတချို့ကို ဗဟုသုတအဖြစ် ချပြပေးချင်ပါတယ်။
ဝင်္ကပါလို Payment အဆင့်ဆင့်နဲ့ နှစ်ဖက်စိုးရိမ်စိတ်
ဂရံအမည်ပေါက်မြေကို အရောင်းအဝယ်လုပ်ကြတဲ့အခါ အကြမ်းဖျင်းအားဖြင့် ဒီလိုအဆင့်ဆင့် သွားကြပါတယ်။
ပထမအဆင့် - စျေးနှုန်းညှိနှိုင်းလို့ ပြတ်ပြီဆိုရင် မင်္ဂလာစရံ ချကြပါတယ်။
ဒုတိယအဆင့် - စာရွက်စာတမ်းတွေ စစ်ဆေးပြီး Error ကင်းရှင်းပြီဆိုရင် စရံကြီး (အနည်းဆုံး တန်ဖိုးရဲ့ ၁၀%) ကို ထပ်မံ ချလေ့ရှိပါတယ်။
တတိယအဆင့် (အရေးကြီးဆုံးအပိုင်း) - စရံကြီးချပြီးရင် အဝယ်ဖက်က သတင်းစာကြေညာထည့်၊ အရောင်းဖက်က အရောင်းမြေပုံထုတ်ရပါတယ်။ ဒီအဆင့်မှာ ကြာချိန်က အနည်းဆုံး ၂၁ ရက် (အမြန်ဆုံးဆိုရင် ၂ ပတ် / ၁၄ ရက်) ဝန်းကျင် ရှိတတ်ပါတယ်။
ဒီအရောင်းမြေပုံထွက်တဲ့ အဆင့်ပြီးတာနဲ့ အဝယ်ဖက်က တန်ဖိုးရဲ့ ၅၀% နဲ့ အထက်ကို ပေးချေပြီး မူရင်းစာရွက်စာတမ်းတွေကို လက်ဝယ်ယူလေ့ရှိပါတယ်။
သဘောကတော့ သိန်း ၁၀,၀၀၀ တန်တဲ့မြေဆိုရင် တန်ဖိုးရဲ့ ထက်ဝက်ကျော်ကို ငွေချေလိုက်ပြီဖြစ်တဲ့အတွက် ပစ္စည်းဟာ နှစ်ဦးညီတူမျှတူ ပိုင်ဆိုင်သွားတဲ့ သဘောဖြစ်သွားပါပြီ။ "မြေကို အရောင်းဖက်က ယူထားမလား၊ စာရွက်စာတမ်းကို အဝယ်ဖက်က ယူမလား" ဆိုတဲ့ သဘောတရား ဖြစ်လာပါပြီ။
ဒီနေရာမှာ စပြီး စကားပြောရပါပြီ။ ပြဿနာကလည်း ဒီမှာ စတာပါ။
#အရောင်းဖက်က_စိုးရိမ်စိတ် -
"ငါ့မြေတန်ဖိုးရဲ့ ထက်ဝက်ပဲ ရသေးတာ၊ မူရင်းစာရွက်စာတမ်းကြီး ပေးလိုက်ရမှာ စိတ်မချဘူး" လို့ တွေးပြီး စိုးရိမ်တတ်ကြပါတယ်။
#အဝယ်ဖက်က_စိုးရိမ်စိတ် -
"ငွေက ထက်ဝက်ကျော် ပေးပြီးပြီ၊ ခိုင်မာတဲ့ ပိုင်ဆိုင်မှု အထောက်အထား (စာရွက်စာတမ်း) တစ်ခုမှ လက်ထဲမရှိရင် ငါ့ပိုက်ဆံတွေ ဘယ်လိုလုပ်မလဲ" ဆိုပြီး ကိုယ်ချင်းစာကြည့်ရင် သူတို့လည်း စိုးရိမ်ကြတာပါပဲ။
အရောင်းရှင်များ သိထားသင့်တဲ့ အားသာချက်
တကယ်တော့
အရောင်းဖက်က "ဂရံအမည်ပေါက်" ဖြစ်နေရင် အားသာချက်ရှိပါတယ်။
မိမိအမည်ပေါက် စာရွက်စာတမ်းဖြစ်တဲ့အတွက် မှတ်ပုံတင်စာချုပ်ကြီး မချုပ်ရသေးခင်အထိ အဝယ်ဖက်က မူရင်းစာရွက်စာတမ်းကြီးကို
လက်ဝယ်ကိုင်ထားပိုင်စေဦးတော့...
တရားဥပဒေကြောင်းအရ ပိုင်ဆိုင်မှုက မိမိအပိုင်ပဲ ဖြစ်နေပါသေးတယ်။
တဖက်က ဂရံယူသွားပြီး ကျန်တဲ့ငွေ ထပ်မချေဘူးဆိုရင်တောင် မိမိရဲ့ ပိုင်ဆိုင်မှုအပေါ် သူ ဘာမှ ကျူးလွန်ခွင့် မရှိပါဘူး။
ဒါကို အရောင်းရှင်တွေ နားလည်ထားဖို့ လိုပါတယ်။
ဒီအဆင့်မှာ အရောင်းဖက်က မလိုက်လျောဘဲ တင်းခံနေရင် ပွဲပျက်တတ်လို့ လိုက်လျောပေးဖို့ လိုအပ်ပါတယ်။
နောက်ထပ်တဆင့်အနေနဲ့—
အရောင်းဖက်က ရောင်းခွန်ဆောင်ပြီးတဲ့ အချိန်မှာ ထပ်မံကျန်ရှိတဲ့ ငွေပမာဏကို အဝယ်ဖက်က တလုံးတခဲတည်းဖြစ်စေ အရစ်ခွဲ၍ဖြစ်စေ နှစ်ဖက်ညှိနှိုင်း ပေးချေလေ့ရှိပြီး
စာချုပ်ရုံးမှာ လက်မှတ်ထိုးရန်အတွက် အနည်းငယ် ချန်လှပ်လေ့ရှိပါတယ်။
နောက်ဆုံး မှတ်ပုံတင်ရုံးအဆင့်မှာ ငွေချန်ရခြင်းအကြောင်း—
ဒီအဆင့်တွေ ပြီးသွားရင်တော့ မှတ်ပုံတင်စာချုပ်ရုံးမှာ လက်မှတ်ရေးထိုးကြရမှာပါ။ စာချုပ်ရုံးမှာ လက်မှတ်ထိုးဖို့အတွက် (ဥပမာ- သိန်း ၁၀,၀၀၀ ဝန်းကျင် အရောင်းအဝယ်ဆိုရင်) သိန်း ၅၀၀ ခန့်ကို နှစ်ဖက်သဘောတူ ချန်ထားလေ့ရှိကြပါတယ်။
ဘာကြောင့် ချန်ရတာလဲဆိုရင်...
စာရွက်စာတမ်းတွေ ဘယ်လောက်ပဲ လက်ဝယ်ရထားပါစေဦးတော့၊ စာချုပ်ရုံးမှာ လက်မှတ်မထိုးရသေးရင် အဝယ်အတွက် ပိုင်ဆိုင်မှုက တရားမဝင်သေးပါဘူး။
ဒီအဆင့်ရောက်မှ အကြောင်းအမျိုးမျိုးကြောင့် အရောင်းဖက်က စိတ်အပြောင်းအလဲဖြစ်ပြီး လက်မှတ်မထိုးပေးတာမျိုး သာဓကတွေ အများကြီးရှိခဲ့ဖူးလို့...
အဝယ်ဖက်က ငွေပမာဏတစ်ခုနဲ့ ထိန်းချုပ်လိုတဲ့ သဘောကြောင့် ချန်လှပ်ထားရခြင်း ဖြစ်ပါတယ်။
ဒီအဆင့်ကိုလည်း အရောင်းဖက်က လက်မခံဘဲ "ငွေအပြတ်ရမှ လက်မှတ်ထိုးမယ်" လို့ တင်းခံရင်လည်း အရောင်းအဝယ်က ပျက်သွားနိုင်ပြန်ပါတယ်။
ဒါကြောင့်မို့လို့ အိမ်ခြံမြေ အရောင်းအဝယ် ပွဲတစ်ပွဲ အောင်မြင်ဖို့ဆိုတာ စျေးညှိရုံတင်မကဘဲ... အစကတည်းက Payment Plan (ငွေပေးချေမှု အဆင့်ဆင့်) ကို နှစ်ဦးနှစ်ဖက် နားလည်လက်ခံအောင် ညှိနှိုင်းပေးနိုင်ဖို့ကလည်း
အဓိက သော့ချက်ဖြစ်ကြောင်း
မျှဝေပေးလိုက်ရပါတယ်ခင်ဗျာ။
#ရေးသားသူအား Crd ပေးပါတယ်ခင်ဗျာ။
