GST Legal

16/07/2026

წარმოგიდენთ GST Legal-ის პარტნიორ კომპანიებს, რომლებთანაც წარმატებული თანამშრომლობა გვაკავშირებს!

26/06/2026

გიზიარებთ GST Legal-ის გუნდის მორიგ პროფესიულ წარმატებას, რომელიც 1997 წლიდან დაფუძნებულ სააქციო საზოგადოების სრულ სამართლებრივ მოწესრიგებას უკავშირდება. აღნიშნული კომპანიის რეგისტრაციის პროცესი ბოლო ერთი წლის განმავლობაში საჯარო რეესტრის მიერ არაერთხელ იქნა დახარვეზებული, რის გამოც ვერ ხერხდებოდა მისი „მეწარმეთა შესახებ“ ახალ კანონთან შესაბამისობაში მოყვანა, რამაც თავის მხრივ გამოიწვია კომპანიის საქმიანობის შეჩერება. საკითხის შესწავლას მნიშვნელოვნად ართულებდა ის გარემოება, რომ საარქივო მასალებში, რეგისტრაციის დღიდან დღემდე არსებულ დოკუმენტაციასა და ამონაწერებში მრავალი დეტალი შეუსაბამო იყო ერთმანეთთან.

ამ გამოწვევის საპასუხოდ, GST Legal-ის გუნდმა ჩაატარა საკითხის სიღრმისეული კვლევა. კერძოდ, სრულად იქნა შესწავლილი და გაანალიზებული კომპანიის თითქმის 30-წლიანი სამართლებრივი ისტორია, მათ შორის, განსაკუთრებული სიზუსტით გადამოწმდა ბოლო 10 წლის განმავლობაში მიღებული თითოეული დოკუმენტი. შედეგად, კანონით გათვალისწინებულ და ამავდროულად უმოკლეს ვადებში, ყველა არსებული ხარვეზი წარმატებით აღმოიფხვრა და სააქციო საზოგადოება სრულ შესაბამისობაში იქნა მოყვანილი მოქმედ კანონმდებლობასთან.

კომპანიის ახალ საკანონმდებლო ჩარჩოში მოქცევასთან ერთად, პროცესის ფარგლებში წარმატებით განხორციელდა სამეთვალყურეო საბჭოს წევრების ცვლილება. ასევე, სტრატეგიული ბიზნესპროცესების შეუფერხებლად წარმართვის მიზნით, სამეთვალყურეო საბჭოს მიერ კომპანიის დირექტორისათვის მოხდა შესაბამისი უფლებამოსილების მინიჭება, როგორც საზოგადოების საკუთრებაში არსებული ქონების შემდგომი რეალიზაციისთვის, ისე სხვა მნიშვნელოვანი კორპორაციული საკითხების ეფექტურად გადაჭრისთვის.

GST Legal-ის ჩართულობით, კომპანიამ მიიღო შესაძლებლობა ბიზნესსაქმიანობის უსაფრთხოდ გაგრძელებისა და განვითარებისთვის.

22/06/2026

მოხარულები ვართ გაგიზიაროთ ინფორმაცია ჩვენი გუნდის მორიგი წარმატების შესახებ, რომელიც კომპლექსური და მრავალწლიანი სასამართლო დავის ჩვენი კლიენტის სასარგებლოდ დასრულებას უკავშირდება.

დავა ჯერ კიდევ 2017 წელს დაიწყო, რომელიც მსხვილ კერძო-სამართლებრივ პრობლემას ეხებოდა. დავის უზრუნველყოფის მიზნით, სასამართლოს დეპოზიტზე 2017 წლიდან დაყადაღებული იყო დიდი ოდენობის თანხა, რაც კლიენტისთვის წლების განმავლობაში დიდ ფინანსურ ტვირთს წარმოადგენდა.

გარდა ამისა, 2021 წლის სასამართლო განჩინებით დანიშნული იყო ექსპერტიზა, რომლის პასუხიც 2026 წლის თებერვლამდე, თითქმის ხუთი წლის განმავლობაში, არ იყო წარმოდგენილი, რაც მხოლოდ ჩვენი ჩართულობის შედეგად მივიღეთ. საქმე დაწყების დღიდან, ფაქტობრივად შეჩერებული იყო და მხოლოდ მოსამზადებელი სხდომის ეტაპზე იმყოფებოდა.

GST Legal აღნიშნულ პროცესში 2025 წლის დეკემბრიდან ჩაერთო. ჩვენი გუნდის მიერ შემუშავებულმა სწორმა სამართლებრივმა სტრატეგიამ მრავალწლიან გაჭიანურებულ საქმეში უმოკლეს დროში მოახდინა გარდატეხა და პროცესი მოსამზადებელი ეტაპიდან დინამიკურად წაწია წინ.

ჩვენი აქტიური ჩართულობის შედეგად, 2026 წლის თებერვალში სასამართლოს წარედგინა ექსპერტიზის დასკვნა, რამაც საბოლოო გადაწყვეტილების მიღება დააჩქარა. 2026 წლის 22 ივნისს კი საქმისწარმოება ოფიციალურად დასრულდა და სასამართლომ გადაწყვეტილება მოპასუხის - ჩვენი მხარის სასარგებლოდ გამოიტანა.

ეს შემთხვევა კიდევ ერთხელ ადასტურებს, რომ მაღალ პროფესიონალიზმსა და საქმის მიმართ სწორ მიდგომას შეუძლია წლების განმავლობაში უიმედოდ გაჭიანურებული დავებიც კი კლიენტის სრული გამარჯვებით დაასრულოს.

19/06/2026

მოხარულები ვართ გაგიზიაროთ, რომ 2026 წლის 21-22 მაისს გაიმართა ტრენიგნი თემაზე: "გარიგების უზრუნველყოფისა და აღსრულების სამართლის სპეციფიკური საკითხები", რომელსაც GST Legal-ის მმართველი პარტნიორი, სოფიო მაჭავარიანი გაუძღვა.

სოფიომ დამსწრე საზოგადოებასთან განიხილა ისეთი საკითხები, როგორებიცაა: უზრუნველყოფის საშუალებების სწორი შერჩევა და გამოყენება, საჯარო რეესტრში რეგისტრაციის ასპექტები და ხარვეზების პრევენცია და კრედიტორთა უფლებების გარანტიები გაკოტრებისა და რეაბილიტაციის პროცესში.

ტრენინგმა წარმატებულად ჩაიარა!

08/06/2026

2026 წლის 16 და 17 მაისს გაიმართა ტრენინგი "საკორპორაციო სამართლის პრაქტიკული ასპექტები", რომელსაც GST Legal-ის პარტნიორი, სამართლის დოქტორი სოფიო მაჭავარიანი გაუძღვა.

ტრენერმა შეხვედრაზე ტრენინგის მონაწილეებს გააცნო როგორც თეორიული, ისე პრაქტიკული საკითხების სიღრმისეული ანალიზი, რომელიც ამ სფეროში მის მრავალწლიან გამოცდილებასა და საკორპორაციო სამართლის მიმართულებით სადოქტორო ნაშრომზე მუშაობისას მის მეცნიერულ კვლევებს ეფუძნებოდა.

25/05/2026

მიმდინარე წლის აპრილში გაიმართა ტრენინგი თემაზე — „შრომის სამართლის აქტუალური საკითხები და სასამართლო პრაქტიკა“.

შეხვედრის ერთ-ერთ სესიას უძღვებოდა GST Legal-ის მმართველი პარტნიორი - სოფიო მაჭავარიანი, რომელმაც მონაწილეებს მრავალწლიანი პროფესიული გამოცდილება გაუზიარა და პრაქტიკულ მაგალითებზე დაყრდნობით გააცნო საერთო სასამართლოების მიერ დამკვიდრებული ახალი მიდგომები.

მოხარულები ვართ აღვნიშნოთ, რომ ტრენინგი წარმატებით დასრულდა. GST Legal მომავალშიც აქტიურად განაგრძობს საზოგადოებისთვის მნიშვნელოვანი და აქტუალური პროექტების განხორციელებას.

21/05/2026

მოხარულები ვართ გაგიზიაროთ, რომ 2026 წლის 5 აპრილს გაიმართა გადახდისუუნარობის სამართლის ტრენინგი, რომელსაც GST Legal-ის მმართველი პარტნიორი, სოფიო მაჭავარიანი გაუძღვა. სოფიო გადახდისუუნარობის პრაქტიკოსთა ასოციაციის (bripa) წევრს წარმოადგენს.

სოფიო მაჭავარიანმა ტრენინგის მონაწილეებს საკუთარი მრავალწლიანი გამოცდილება გაუზიარა და დეტალურად მიმოიხილა ის სამართლებრივი, თუ პრაქტიკული გამოწვევები, რომლებსაც ბიზნესი გადახდისუუნარობისა თუ რეაბილიტაციის პროცესში აწყდება.

გადახდისუუნარობის სამართალი დღეს ბიზნესგარემოს ერთ-ერთი ყველაზე დინამიური და კომპლექსური მიმართულებაა, სწორედ ამიტომ, მნიშვნელოვანია თითოეულ პრაქტიკოს იურისტს ჰქონდეს ღრმა, პრაქტიკული ცოდნა და გამოცდილება ამ მიმართულებით.

12/04/2026