Amsalu.A.Mitiku Law Office

18/07/2021

"Dhimmoota Hariiroo Hawaasaa irratti daangaa seerri kaa'e keessatti himanni yoo hin dhihaanne darba yerootiin daangeeffama:
Maddi:- /teyib Nure
✅.Waraqaa ragaa dhaaltummaa sobaan fudhatame akka haqamuuf gaaffiin waggaa 10(kudhan) keessatti yoo hin
dhihaanne waggaa 10 booda dhihaachuu yookiin gaafachuu hin danda'u.

161650 ta'e irratti "waraqaa ragaa dhaaltummaa sobaan argame akka haqamuuf gaaffiin gaafatamuuf darbiinsi yeroo raawwatiinsa qabu
waggaa 10 akka ta'e" seera hariiroo hawaasaa keewwata 1677,1845,1846,fi seera deemsa falmii hariiroo hawaasaa
keewwata 358 fi 359 waliin wal qabsiisuun hiikoo dirqisiisaa kennee ture.
✅Qabeenyi dhaamoon argame waggaa kudhan(10) keessatti yoo hin gaafatamne darbinsa yerootiin waan daangeeffamuuf
waggaa 10 booda gaaffii akkanaa gaafachuun himannaa Mana Murtiitti dhiheessuu hin danda'u,yoo himannaa dhiheeffates kufaa jalaa ta'a,shh keewwattoota 1677(1) fi 1845.
✅.Mormiin dhaamoo taasifame irratti dhiyaatu dhaamoon dubbifamee jedhe beekee kaasee mormii isaa torbee lama(2) keessatti Qulqulleessituu dhaalaatiif erga ibseen booda yeroo
itti aanu ji'a sadi(3) keessatti yoo ta'ee,fi sababa kamiinuu,garuu waggaa shan(5) keessatti mormii yoo dhiheessine darbiinsa yerootiin waan daangeeffamuuf booda
dhiheeffachuu hin danda'u,shh keewwata 973 fi 974.
✅.Himataan(dhaaltuun) mirgaa fi qabeenya dhaalaa himatamaan qabame,qabeenyicha deebisiisuuf qabeenyichi himatamaan qabamuu beeke irraa eegalee waggaa sadi(3)
keessatti yoo himannaa hin dhiheessine darba yerootiin waan daanga'uuf waggaa sadi booda gaafachuu hin danda'u,shh
keewwata 1000(1).
✅.Qabeenya dhaalaa ilaalchisee falmiin dhaalaa fi garee sadaffaa yookiin nama dhaaltuu hin taane jidduu ka'u darbiinsi
yeroo raawwatiinsa qabu waggaa kudhaniidha.Himanni waggaatti kudhan booda dhiyaatu kufaadha jechuudha,shh
keewwata 1845.
✅.Qabeenya dhaalaa ilaalchisee falmii dhaaltota jidduu ka'uuf darbiinsi yeroo rogummaa qabu waggaa 3/sadiidha,shh
keewwata 1000(1).
✅Himataan qabeenyi dhaalaa himatamaan jalaa qabamuu beekes beekuu baates dhaalchisaan erga du'e yookiin himataan mirga isaa gaafachuu danda'e irraa eegalee waggaa kudha shan(15) keessatti yoo hin gaafanne waggaa 15 booda darbiinsa yerootiin hafaa waan ta'uuf gaafachuu hin
danda'u,shh keewwata 1000(2).
✅.Gahee qoodinsa qabeenya dhaalaa ilaalchisee qoodinsi qabeenyaa raawwatamuu erga beekee kaasee waggaa tokko(1) keessatti gaaffii yoo hin dhiheessine darba yerootiin waan
daangeeffamuuf waggaa tokko booda gaafachuu hin danda'u.Sababa kamiinuu dhaalchisaan erga du'ee kaasee
herregamu waggaa kudhan(10) keessatti gaaffii gahee isaatiif yoo hin dhiheessine darbiinsa yeroo seerri kaa'een waan
daangeeffamuuf waggaa 10 booda gaafachuu hin danda'u,shh keewwata 1080(3).
✅.Waliigalteen kennaa erga taasifameen(raawwatameen) booda raawwiif waggaa 10 keessatti gaaffii yoo hin dhiheessine darbiinsa yerootiin waan daangeeffamuuf namni kennaan qabeenya argate sana waggaa 10 booda akka raawwatamuuf gaafachuu hin danda'u,shh keewwata 1676(1),fi 1845.
✅.Abbaan mirgaa qabeenya irratti erga murtiin kennameen booda waggaa 10 keessatti akkaataa murtiitiin akka raawwatamuuf yoo hin gaafanne yookiin iyyata raawwii yoo hin dhiheeffanne waggaa 10 booda akkaataa murtiitiin
akka raawwatamuuf gaafachuu hin danda'u,sdfhh keewwata 384.
✅.Waliigalteen akka raawwatamu yookiin waliigalteen waan hin raawwatamneef miidhaa qaqqabeef namni Beenyaa gaafatu waggaa 10 keessatti himannaa Mana Murtii idileetti
yoo hin dhiheessine darbiinsa yerootiin waan daangeeffamuuf waggaa 10 booda gaafii Beenyaa akka kanfalamuuf gaafachuu hin danda'u,shh keewwata 1845.
✅.Waliigaltee imaanaa yeroo meeshaan deebi'u caqafame meeshaan himatamaa biratti kaa'ame hanqina qaba jedhamee gaafatamu waggaa tokko(1) keessatti himanni yoo hin dhihaanne waggaa tokko booda dhihaachuu hin danda'u,shh keewwattoota 2291,2292,fi 2298(1).
✅.Darbiinsi yeroo waggaa lamaa seera hariiroo hawaasaa keewwata 1810(2) jalatti tumame raawwatiinsa kan qabu"waliigaltee hanqina eeyyamaa yookiin dandeettii dhabuutiin raawwatame diigsisuuf dhihaatu qofa irrattiidha.
✅.Waliigaltee meeshaa yookiin qabeenya Geejjiba Galaanaa ilaalchisee meeshaa harkatti erga galfatee kaasee
waggaa tokko(1) keessatti himata yoo hin dhiheessine waggaa 1 booda gaafachuu hin danda'u,Seera Galaanaa keewwattoota 146,203,180,fi shh keewwattoota 1826,1828,fi 1829(A).
✅.Dhimma waliigaltee ilaalchisee darbiinsi yeroo ifa ta'ee seeraan yoo hin tumamne,darbiinsi yeroo waliigaltee waliigalaa keessatti tumame waggaa 10(kudhan) raawwatiinsa qaba.
✅.Wabii qabiinsa qabeenya hin sochoone(Mortgage) ilaalchisee mirgi hafaa kan ta'u(Lapse of Mortgage right)
guyyaa waliigalteen qabiinsa qabeenyaa(wabii) galmaa'e irraa
eegalee waggaa kudhan(10) darbuun dura mirga qabiinsaa fayyadamuu yoo hin eegalle darbiinsa yerootiin waan
daangeeffamuuf waggaa 10 yoo darbe gaafachuu hin danda'u,shh keewwata 3058(1)(3).
✅.Beenyaa waliigalteen alaatiin miidhaa qaqqabeef gaafatamu,guyyaa miidhaan qaqqabe irraa kaasee waggaa lama(2) keessatti yoo himanni hin dhihaanne darbiinsa yerootiin waan daangeeffamuuf waggaa lama booda
gaafachuu hin danda'u,shh keewwata 2143(1).
✅.Qabeenya tasgabbaa'aa irratti jeequmsi ka'e akka dhaabbatuuf himanni dhihaatu waggaa 2 keessatti yoo hin
dhiyaanne waggaa lama booda himata dhiheessuu hin danda'u,yoo dhiheesses kufaadha,shh keewwata 1149(2).
✅.Dhimmoota Hojjataa fi Hojjachiisaa ilaallatan kamiyyuu guyyaa balleessaan raawwatame irraa eegalee waggaa tokko
(1) keessatti himannaa dhiheessuu danda'a,woggaan tokko yoo darbe immoo himannaa dhiheessuu hin danda'u,Labsii
Hojjataa fi Hojjachiisaa Lakkoofsa 1156/2011 keewwata 189.
✅.Qabiyyee Lafa Baadiyaa Naannoo Oromiyaa himatamaan itti fufiinsaan kunuunsaa waggaa 12 ol itti
fayyadamaa ture,waliigaltee seeraan alaatiin qabiyyicha qabachuu hanga hin mirkanoofnetti himanni himatamaa irratti
dhihaatu darbiinsa yeroo waggaa 12 tiin waan daangeeffamuuf waggaa 12 booda himanni yoo dhiyaate kufaadha.Dambii
Lakkoofsa 151/2005 keewwata 32.
✅.Gareen murtii Mana Murtii Hawaasummaa Gandaa irratti komii qabu,guyyaa 10 keessatti garagalchi Murtii akka kennamuuf gaafatee guyyaa 15 keessatti murtichi garagalfamee kennameefi,erga garagalcha Murtii fudhatee irraa kaasee guyyaa 30 keessatti ol'iyyata isaa Mana Murtii
idilee Aanaatti yoo hin dhiheeffanne guyyaa 30 booda dhiheeffachuu hin danda'u,Labsii Lakkoofsa 128/1999
keewwata 34(2)(3).
✅.Sirna ariirii irratti ol'iyyannichi murtiin erga kennamee kaasee guyyaa 10 keessatti dhihaachuu/gaafatamuu
qaba.Yeroo seerri kaa'e keessatti ol'iyyanni yoo hin gaafatamne yeroon darbinaan ol'iyyannisaa fudhatama hin
qabu.
✅.Murtiin yookiin ajajni bakka ani hin jirretti kenname akka naaf ka'u jedhamee gaafatamu,erga murticha yookiin
ajajicha beekee kaasee guyyoota 30 keessatti yoo iyyata hin dhiheessine Baatii tokko booda dhiheessuu hin danda'u,sdfhh*keewwata 78(1).
✅.Dhimma hariiroo hawaasaa irratti murtiin erga kennameen booda ol'iyyanni guyyoota 60 keessatti yoo hin
dhihaanne(hin gaafatamne) ji'a lama(2) booda ol'iyyannoo gaafachuu hin danda'u,sdfhh keewwata 323(1).
✅.Falmii hojii irratti murtiin erga kennameen booda ol'iyyanni ijibbaataatti guyyoota 90 keessatti dhihaachuu
qaba,ji'a sadi booda immoo ol'iyyanni ijibbaataatti gaafachuu hin danda'amu.
:"
✅.Jildii 24ffaa Lakk.Galmee 161650,
✅.Jildii 8ffaa Lakk.Galmee 38152,
✅.Jildii 11ffaa Lakk.Galmee 53223,
✅.Jildii 6ffaa Lakk.Galmee 25664,
✅.Jildii 11ffaa Lakk.Galmee 52407,
✅.Jildii 6ffaa L.G. 20295,25567,26422,
✅.Jildii 20ffaa L.G.120841,
✅.Jildii 10ffaa L.G.40418,
✅.Jildii 10ffaa L.G.42691,
✅.Jildii 8ffaa L.G.35018,
✅.Jildii 8ffaa L.G.29363,fi 38935,
✅Jildii 22ffaa L.G.131151,
✅.Jildii 10ffaa L.G.48094,
✅.Jildii 19ffaa L.G.101675,
✅.Jildii 12ffaa L.G.55229,
✅.Jildii 12ffaa L.G.48012,
✅.Jildii 14ffaa L.G.80642,
✅.Jildii 17ffaa L.G.98358,
✅.Jildii 8ffaa L.G.34940,
✅.Jildii 14ffaa L.G.78444,
✅.Jildii 11ffaa L.G.34406,
✅.Jildii 6ffaa L.G.34406,
✅.Jildii 21ffaa L.G.13698 fi 134188,
✅.Jildii 22ffaa L.G.140538 ta'an odeeffannoo dabalataatiif dubbisuu dandeessu "
!!
Maddi:-
Maddi:- /teyib Nure

15/07/2021

Good Remedy

13/07/2021

Himannaa Yakkoota Bunaan Wal Qabatan: Seera Rogummaa
Qabuu fi Aangoo Mana Murtii

Maddii
:::::::::::::::::::::::::::::::::::::::::::::::::::::::::::::
Labsii Sirna To'annoo Gabaa fi Qulqullina Oomishaalee Qonnaa
Naannoo Oromiyaa Lakk. 234/2013 Gurraandhala 21, 2013
Caffee Oromiyaan raggaasifamee jira. Labsiin ammaa kun
Labsii Sirna To'annoo fi Qulqullina Buna Naannoo Oromiyaa
lakk. 160/2002 guutummaan haqeera.
Hiikkoo jalatti "oomishaalee qonnaa" jechuun "bunas" kan
haammatu ta'uu ibsuun gochoonni dhorkamanii fi adabbiin wal
duraa duubaan taassifameera. Walumaa galatti labsiin kun
oomishaalee qonnaa kanneen biroo dabalatee qulqullinaa fi
daldaala buna naannoo Oromiyaa kan bituudha.
Gama biroon Labsiin Qulqullina Buna Federaalaa Lakk.
1051/2009 dhimmoota wal fakkaatoo qulqullinaa fi daldaala
bunaan wal qabataniif dhorkaa fi adabbiiwwan tarreessee jira.
Ammas ijoon falmii kaasaa jiru naannoo Oromiyaa keessatti
yakkoonni qulqullinaa fi daldaala bunaan wal qabatan gaafa
mudatan Labsii isa kamiin (kan Mootummaa Naannoo
Oromiyaa, lakk.234/2013 moo kan Mootummaa Federaalaa
lakk. 1051/2009) jalatti himatamuu qabu kan jedhuudha.
Kana dura himannaa yakkoota bunaan wal-qabatan ilaalchisee
seera rogummaa qabuu fi aangoo mana murtii irratti kan
armaan gadii kana isiniif qoodeen ture.
Manni Murtii Waliigalaa Oromiyaa dhaddacha gaafa guyyaa
08/08/2012 ooleen Lakk.Galmee 327502 ta'e irratti murtii
kenneen ijoo lama adda baase.
1. Dhimmota yakkaa bunaan wal qabatan kan seera
Mootummaa Federaalaa fi Naannootiin altokkicha uwwisa
argatan ilaalchisee seerri rogummaa qabu kami? kan jedhuuf
Labsii Naannoo 160/2002 osoo hin taanee Labsii Qulqullina
Buna Federaalaa lakk.1051/2009 ta'uu qaba jechuun murtii
laate.
2. Dabalataan dimmicha ofitti fuudhee ilaaluuf Labsii Federaala
1051/2009 kwt. 21(1) jalatti Mana Murtii sadarkaa jalqabaa
Federaalaaf aangoon kennamee waan jiruuf bakka bu'ummaan
ilaaluuf aangoo kan qabu mana murtii Ol'aanaa Naannooti
jechuun Manni Murtii Aanaa dhimma yakkaa bunaan wal
qabatu irratti aangoo akka hin qabne akeeke. (Labsii
Federaalaa jalatti himannaan dhiyaachuu qaba jedhamnaan
dhimmi aangoo falmii hin kaasisu.)
Dhimmichi himatamtoonni buna seeran ala geejiban
jedhamuun Seera Yakkaa kwt.32(a), 37 fi Labsii Sirna To'annoo
Qulqullinaa fi Daldaala Buna Naannoo Oromiyaa
Lakk.160/2002 Kwt.23(6) jalatti kan himataman yammuu ta'u,
Manni Murtii Aanaa ragaa bitaa fi mirgaa erga dhaga'ee booda
himatamaa 1ffaa adabbii hidhaa cimaa waggaa sadii fi baatii
torbaan akkasumas qarshii kuma shantamaan, himatamaa
2ffaa adabbii hidhaa cimaa waggaa sadii fi qarshii kuma
sadiin wal duraa duubaan akka adabaman murteesse.
Himatamtoonni murtii kana komachuun Mana Murtii
Ol'aanaatti oliyyatan. Manni Murii Ol'aanaa murtii jalaa cimse.
Kanuma komachuun MMWO tti oliyyatan. Manni Murtii
Waliigalaa Oromiyaa Dhaddachi Yakkaa dhimmicha erga
simatee booda ni dhiyeessisa jedhee yaada bitaa fi mirgaa
dhaga'uun murtii keessatti waan armaan gadii kana
xiinxaleera.
Galmicha irraa kallattiin kan fudhatame!
``Bu`uura Heera Mootummaa Federaalawaa Diimokiraatawaa
Rippaabilika Itoophiyaa Lakk.1/1995 Kwt. 55(5) tiin aangoon
seera yakkaa baasuu kan Mana Maree Bakka Bu`oota
Uummataa yammuu ta`u,Mootummaan Naannoo immoo seera
yakkaa baasuuf aangoo kan qabaatu, dhimmoota haala ifaa
ta`een yakka jedhamanii seera yakkaa mootummaan
Federaalaa baase keessatti hin haammatamne irratti akka ta`e
tumaa kana irraa ni hubatama.
Kanumaan akkuma Mootummaan Federaalaa aangoo seera
yakkaa baasuuf aangeffameen, to`annoo qulqullina bunaa fi
daldaala bunaa ilaalchisee Labsii Qulqullina buna Federaalaa
Lakk.1051/2009 akkasumas Mootummaan Naannoo Oromiyaa
Labasii buna Naannoo Oromiyaa Lakk. 160/2002 baafatee
labsiileen lamaan kun hojii irra kan jiraniidha. Gama dhimma of
harkaa qabnutti yammuu deebi`amu immoo oliyyattoonni kun
kan himataman buna seeraan alaa geejibsiisan jedhamanii
akka ta`e himannaa Mana Murtii jalaatti isaan irratti dhiyaate
irraa ni hubatama.
Buna seeraan ala geejibsiisuun yakka jedhamee Labsii
Qulqullina Bunaa Federaalaa Lakk. 1051/2009 Kwt.19(10)
jalatti akkasumas Labsiin Buna Naannoo Oromiyaa
Lakk.160/2002 Kwt. 23(6) jalatti ifaan tumamee jira.Yommuu
gochaan tokko yakka jedhamee seera Federaalaa jalatti
akkasumas seera Naannoo jalattis tumame, seera isa kamtu
dhimmichaaf rogummaa qabaata? gaafii jedhutu ka`a.
Gaaffii kanaaf Heerri Mootummaa Federaalaa keewwatni 55(5)
deebii gahaa ni laata. Kunis mootummaan Naannoo seera
yakkaa baasuuf aangoo kan qabaatu, dhimmoota haala ifa
ta`een yakka jedhamanii seera yakkaa Mootummaan
Federaalaa baase keessatti hin tumamne irratti akka ta`e ifaan
lafa kaa`ee jira. Kana jechuun Mootummaan Naannoo tokkoo
dhimma seera Mootummaa Federaalaa armaan ol itti
caqasameen yakka jedhamee tumame irratti seera yakkaa
baasuu hin danda`u jechuudha. Gara dhimma of harkaa
qabnutti yoo deebi`amu `buna seeraan ala geejibsiisuun
kanuma labsii buna mootummaa Feederaalaa armaan olitti
caqasameen yakka jedhamee osoo jiruu Labsii buna
Mootummaa Naannoo Oromiyaa keessatti irra deebiidhaan
yakka jedhamee kan tumame fudhatama kan qabaatu miti.
Walumaa galatti sababoota armaan olitti caqasameen dhimma
kanaaf Labsiin rogummaa qabu Labsiin Buna Naannoo
Oromiyaa lakk.160/2002 kwt. 23(6) jalatti osoo hin taanee
Labsii Qulqullina Buna Federaalaa lakk.1051/2009 Kwt. 19(10)
jalatti ta`uu qaba jedhameera.
Erga dhimma kanaaf Labsiin Qulqullina Bunaa Federaalaa
Lakk.1051/2009 Kwt.19(10) tu rogummaa qaba jedhame
immoo Mana Murtii isa kamtu dhimmicha sadarkaa jalqabaaf
fuudhee ilaaluuf aangoo qaba? kan jedhus qabxii ilaalamuu
qabu ta`ee argameera.
Qabxiin kun akka ilaalametti akkuma Labsiin Qulqullina Buna
Federaalaa Lakk.1051/2009 Kwt.21(1) irraa hubachuun
dandaa`amutti dhimma kana sadarkaa jalqabaaf ilaalee murtii
kennuuf aangoo kan qabu, Mana Murtii Sadarkaa Jalqabaa
Federaalaa yommuu ta`u, dhimma Mana Murtii Sadarkaa
Jalqabaa Federaalaa sadarkaa jalqabaatti ilaaluuf aangoo
qabu , Mana Murtii Ol`aanaa Naannoo akka ta`e Labsii
Gurmaa`iinsaa, Aangoo fi Ittigaafatamummaa Manneen Murtii
Oromiyaa Hundeessuuf bahe lakk.216/2011 Kwt. 30(4) irraa
kan hubatamuu waan ta`eef dhimma kana bakka bu`ummaan
ilaaluuf aangoo kan qabu Mana Murtii Ol`aanaa GAONF ta`ee
osoo jiruu Manni Murtii Aanaa dhimma aangoo irratti hin
qabne of itti fuudhuun Labsii buna Mootummaa Naannoo
Oromiyaa Lakk.160/2002 Kwt.23(6) jalatti kan dhimmichaaf
rogummaa hin qabne jalatti murtii balleessummaa oliyyattoota
irratti kennuun adabbiis haaluma kanaan shallaguun
murteessee Manni Murtii Ol`aanaas komii oliyyannoo
oliyyattoonni murtii mana murtii Aanaa kana irratti
dhiyyeeffatan bu`uura s/d/f/yakkaa kwt.195(1) tiin kufaa
gochuun ajajni kenne ture sirrii ta`ee waan hin argamneef
murtiin balleessummaas ta`e adabbiin mana murtii Aanaa
kennee fi ajajni Mana Murtii Ol`aanaa kennee ture bu`uura s/d/
f/yakkaa kwt.195(2)(a) sagalee guutuun diigamee Abbaan
Alangaa Oliyyattoota Mana Murtii dhimmicha ilaaluuf aangoo
qabutti himachuu ni danda`a jedhamee murtaa`eera.``
Erga jedhee booda Manni Sirreessaa murtiin jalaa diigamuu
beekee oliyyattoota akka gadi lakkisu ajajni haa darbuuf
jechuun dhorkaa jiru kaasee galmee cufeera.
Dhiheenya kanas buna seeraan ala utuu geejibsiifamuu
qabame tokko irratti MMWO dhaddachi yakkaa L.G.328441
ta'e irratti dhaddacha gaafa guyyaa 18/05/2013 ooleen
xiinxalaa fi murtii wal fakkaataa kennee jira.
Murtiin kun dirqisiisummaa addaa qabaachuu baatus gara
fuula duraatti dhimma wal fakkaataa mudatuuf Manneen Murtii
Oromiyaaf dhagaa bu'uuraa waan kaa'e fakkaata. Kana irraa
kan hubatamu himanni gara fuulduraatti hundaa'uu qabu
dhimma Labsii Federaalaan uwwisa argate yoo ta'e Labsii
Qulqullina Buna Federaalaa lakk.1051/2009 jalatti ta'ee,
dhimmicha ofitti fudhatee ilaaluuf aangoo kan qabus Mana
Murtii Ol'aanaa ta'uu namatti argisiisa.
Yeroo murtii kun kennamu Labsiin 160/2002 hin haqamne ture.
Kana jechuun Labsiin haaraan lakk.234/2013 labsii kana haqee
dhimma qulqullinaa fi gabaa bunaaf uwwisa kennuun isaa
ejjennoo murtii MMWO waan jijjiirsisu hin fakkaatu.Kanaaf
dhimmoota Labsii 1051/2009 jalatti haguuggiin seeraa
kennameef irratti himannaan hundaa'uu kan qabu labsiidhuma
kana jalatti ta'uu akeeka. Yoo kana hin taane bu'aa isaa irra
miidhaan isaa ammas ni caala. Gaafa murtiin haala kanaan
diigamu himatamtoonni to'annoo jalaa akka ba'aniif ajaji
kennama. Himata irra deebiin hundeessuuf carraan himatamaa
argachuu ni xaqqaata, gidduutti haqni dhiibama. Kun yaada
dhuunfaadha. Dogongora jiruuf na oofkalchaa jechaa,
ejjennoon kanaan faallaa ni jajjabeeffama. Ulfaadhaa!
Maddii
Waxabajjii 01, 2013, A.L.I
Sulultaa, Oromiyaa

26/06/2021

29/05/2021

26/01/2021

DANSA!!!!