03/06/2026
((دعوى إثبات حالة))
كلنا بنسمع عن محضر إثبات حاله بتاع الشرطه وبنشتغل عليه لإثبات الموضوع والواقعه
النهارده معانا إثبات حاله بشق مدني وأفضل من محضر اثبات الحاله ودليل قوي وحجة واضحه ودليل يساند الطلبات
قانون الإثبات في الماده 133 والماده 134
أجازت لصاحب الواقعه رفع دعوى قضائية بصفة مستعجله لإثبات الواقعه ومش بس كده كمان تقدير التلف أو حصر الأضرار
الدعوى دي مجرد إثبات حاله وتقدير الأضرار وحصرها ومش بيحصل فيها نزاع بين الخصوم
الدعوى دي بتترفع في المحكمه اللي الواقعه حصلت فيها ومحتاجين نثبتها
الدعوى دي بتنظر أمام القضاء المستعجل
بس لازم تكون دعوي موضوعها مستعجل
ازاي
بحيث تتوافر ضرورة الاستعجال فيها
ازاي بردو
يعني تبقي الحاله اللي عايزين نثبتها قابله للتغيير بمرور الوقت زيادة أو نقصا
واحنا علشان كده بنعمل الدعوى لاثبات الحاله وهي في مهدها
يعني مثلاً أنا اتلفت حاجه لحد او انا مقاول أو حرفي بصنعه معينه واتلفت شئ وتوقعت إن الراجل هيرفع عليا دعوى تعويض وانا خايف الموضوع يزيد عن حد الضرر اللي انا عملته بفعله أو اهماله ولما تيجي المعاينه والخبير علشان يقدر التلف يلاقي الدنيا وسعت على الآخر
أو العكس في حد اتلفلي شئ أو مثلا اتاجر مني مكان علشان يفتحه لشغل معين وانا موافق عليه اتفجأت أنه فتح شغل غير اللي اتفقنا عليه وانا مش موافق عليه شغل مش كويس للمكان أو للجيران أو للسمعه
فاعمل دعوى إثبات حاله بردو علشان لما اجي ارفع دعوى طرد وفسخ للاخلال ببنود الإتفاق يكون معايا دليل بكده قبل ما يغير الشغل ويتناصح عليا
المهم الدعوى دي دعوى اثباتيه محضا
حتى أن الدعوى دي ما فيهاش حاجه اسمها إستئناف علشان ما فيش مصلحه من الاستئناف للمستأنف
لأن الدعوى ذي ما قلنا ما فيهاش نزاع ولا خصومه هو إثبات وقتي مستعجل سريع مفيد مريح وكل حاجه حلوه
وبس كده
