أ /محمود ناصر البهنساوي ـ المحامي

05/08/2026

مضيـت (على بياض) والنتيجة مفاجأة.. إمتى يمشي إيصال الأمانة وتبقى براءة؟"
من اكتر المشاكل اللي بتمر عليا بشكل شبه يومي بشوف أكتر غلطة شائعة بيوقع فيها الناس، وهي الثقة العمياء: "يا استاذ ، أنا مضيت على بياض عشان نخلص شغل، أو كضمان بسيط، وفجأة لقيت مكتوب في الإيصال رقم خيالي! هو ينفع يمضي على بياض وبعدها بمدة يكتبوا الرقم اللي على مزاجهم؟"
الموضوع ده منتشر جداً، وناس كتير بتبقى فاكرة إن طالما "التوقيع حقيقي"، يبقى القضية اتوّسِطت وخلاص.. لكن الحقيقة القانونية والفنية بتقول غير كده خالص!
لو اتعرضت للموقف ده، إيه اللي بيحصل قدام القاضي وخبير الخطوط؟
1 الفرق الزمني بين التوقيع والكتابة (سر الحبر): القانون وخبير الطب الشرعي مش أغبياء. لما بيكتبوا مبلغ كبير بعد مدة طويلة من تاريخ التوقيع (سواء بشهور أو سنين)، بيبان جداً بالفحص الفني اختلاف عمر الحبر، أو اختلاف نوع القلم، أو حتى اختلاف طريقة الضغط على الورقة بين التوقيع القديم والصلب الجديد.
2 "خيانة الإئتمان" في كتابة البيانات: التوقيع على بياض بيعتبره القانون تسليم ورقة على سبيل الأمانة لاستخدامها في حدود معينة. لو الطرف التاني تجاوز الحد ده وملى الإيصال برقم مبالغ فيه أو باسم شخص تاني، دي ثغرة جوهرية بنههد بيها أركان الجريمة.
3 الدفاع الفني قدام المحكمة: المحامي الشاطر مش بيسلم بالواقعة؛ إحنا بنطلب فوراً ندب مصلحة الطب الشرعي (قسم استزييف والتزوير) لفحص الإيصال بيانياً وزمنياً، عشان نثبت للمحكمة بالدليل العلمي إن "التوقيع سابق على الكتابة بمدة طويلة"، وإن الإيصال اتملى بعد ما اتمضى بكتير.
الخلاصة:
إياك تمضي على "ورقة بيضاء" مهما كانت الثقة، لأن اللي يفرط في توقيعه، بيسلم رقبته لغيره. بس لو وقعت الفأس في الراس، اطمن.. القانون والعدالة بيعرفوا يكشفوا التلاعب ويظهروا الحق

10/07/2026

01/07/2026

الموضوع دا بقي متكرر شبه يومي ياريت الناس تاخد بالها خالص تحياتي:
⚖️الاستاذ ⚖️
محمود ناصر راشد
المحامي

10/06/2026

🛑 تعمل إيه لو تم استدعاؤك كشاهد في قضية جنائية؟..
حقوقك وواجباتك ⚖️

أولاً: واجباتك (ما يفرضه عليك القانون)

1. حتمية الحضور: بمجرد إعلانك رسميًا، أنت ملزم بالحضور في الموعد والمكان المحددين. (الامتناع عن الحضور بدون عذر مقبول يدفع المحكمة أو النيابة للحكم عليك بغرامة مالية، وقد يصل الأمر لإصدار أمر بضبطك وإحضارك قانونا ) ، أما شرعاً فهو إثم عظيم، لقوله تعالى: ﴿وَلَا تَكْتُمُوا الشَّهَادَةَ وَمَن يَكْتُمْهَا فَإِنَّهُ آثِمٌ قَلْبُهُ﴾

2. حلف اليمين: لو بلغت السن القانونية (14 سنة كاملة)، أنت ملزم بحلف اليمين القانونية وهي ( أقسم بالله العظيم أن أقول الحق، ولا شيء غير الحق) وده قبل الإدلاء بأقوالك.

3. قول الصدق والالتزام بالأمانة:
لان الشهادة الزور أو تغيير الحقيقة تآمرًا مع متهم أو نكاية فيه مش مجرد ذنب او خطأ...لا دي جنحة أو جناية "شهادة زور" عقوبتها السجن، وممكن عقوبتها توصل للاعدام ، لو ترتب على شهادتك دي صدور حكم بالإعدام على الي انت شاهد عليه👌
أما عند ربنا عز وجل، فهي من أكبر الكبائر التي قرنها الله بالشرك به والعياذ بالله ،حيث قال تعالى: ﴿فَاجْتَنِبُوا الرِّجْسَ مِنَ الْأَوْثَانِ وَاجْتَنِبُوا قَوْلَ الزُّورِ﴾

ثانياً: حقوقك وضماناتك (ما يكفله القانون لك)
زي ما عليك واجبات، القانون كمان بيحيطك بحصانة وضمانات تضمن سلامتك وكرامتك تصديقاً لقوله تعالى: ﴿وَلَا يُضَارَّ كَاتِبٌ وَلَا شَهِيدٌ﴾ والحقوق دي هي:

1. الحق في الحماية (حماية الشهود): لو شعرت بأي تهديد لحياتك أو سلامتك أو أسرتك من قِبل المتهم أو ذويه، تقدر تطلب إدراجك ضمن "برنامج حماية الشهود" ، والضمانات دي منها عدم ذكر بياناتك الشخصية (زي عنوانك) في المحاضر العلنية، وجعلها سرية ومتاحة فقط للقاضي والنيابة.

2. المعاملة اللائقة:
وده حق مكفول ليك عشان كده لا يجوز لجهة التحقيق أو الدفاع توجيه أي إهانة، أو أسئلة تمس كرامتك، أو استخدام وسائل ضغط مادية أو معنوية عليك لتغيير أقوالك.

3. التعويض المالي عن الحضور: يحق ليك كشاهد قانوناً المطالبة بمصاريف الانتقال ومقابل تعطيلك عن عملك جراء الذهاب للمحكمة أو النيابة.

4. الاستثناء من الحضور (لعذر قاهر): لو كنت مريض بمرض يمنعك تماماً من الحركة والتنقل، واثبت ده بتقرير طبي، هنا يحق للمحكمة أو النيابة الانتقال ليك في مكانك لسماع شهادتك.

👈واخيرا هعطيك شوية نصائح قانونية وانت رايح تدلي بشهادتك:

١ـ قل ما رأيته أو سمعته بنفسك فقط:
يعني متنقلش كلام سمعته من الجيران أو الشارع (لان الشهادة السماعية ضعيفة). فعشان كده قل: (شفت كذا) أو (مشفتش كذا) بس 👌
ولأن الشهادة مشتقة من "المشاهدة والمُعاينة"، لقوله تعالى: ﴿إِلَّا مَنْ شَهِدَ بِالْحَقِّ وَهُمْ يَعْلَمُونَ﴾

٢ـ متتكسفض من قول (مش فاكر):
لأن القضايا الجنائية طبيعي ممكن تاخذ وقت طويل، وطبيعي تنسى بعض التفاصيل الدقيقة (زي لون الملابس أو الساعة بالضبط). فالصدق في النسيان أفضل من اختراع تفاصيل ممكن تُفسر ضدك أو تودي واحد في داهية .

٣ـ اقرأ أقوالك قبل التوقيع:
بعد انتهاء التحقيق، من حقك تماماً قراءة كل كلمة سُجلت على لسانك في المحضر للتأكد من أنها تطابق ما قلته بالفعل قبل متوقع 👌

👈وخليك فاكر... الشهادة أمانة وبها تظهر الحقيقة وتتحقق العدالة. فلا تخف من أداء واجبك طالما تقوله بصدق وأمانة ، واجعل نيتك إحقاق الحق.. ولا تنسى قوله تعالى ﴿يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ وَلَوْ عَلَى أَنْفُسِكُمْ أَوِ الْوَالِدَيْنِ وَالْأَقْرَبِينَ...﴾

❓ شاركنا رأيك: لو كنت مكان الشاهد، هل ستتردد في انك تروح للمحكمة؟ وايه هيا أكثر نقطة ممكن تقلقك في الموضوع ده؟

✍️خالص تحياتي وتقديري 🌹

⚖️ الأستاذ ⚖️
محمود ناصر راشد
المحامي

#المحاماة

26/01/2026