حكمت المحكمه, 17 salem salem Street agouza (2026)

13/05/2026

#حماده
راجل بيبيع خضار كان علي علاقه بربة منزل لقوها مقتوله ومطعونه
#١٥ـحكايه

19/04/2026

في صيف ٢٠١٦ تحديدا كنت في شهر اغسطس
موبايلي رن حوالي الساعه ٧.٣٠ الصبح كنت نايم وغطسان في النوم ولا اخفي سرا كنت قد عزمت علي ان لن اذهب الي المحكمه لسببين اولهم اجازه قضائيه في اغلب دوائر المحكمه سواء الجزئيه او الابتدائيه وثاني سبب الحر
تسللت اصابعي الي الهاتف اللعين بشوف مين لقيت موكل كان عندي من فتره كبيره
قفل بسرعه ومطولش في الاتصال كملت نومي اتصل بعدها بحوالي ربع ساعه اضطريت ارد ماهو اللي يتصل بحد الساعه ٧.٣٠ الصبح مرتين اكيد في حاجه مهمه
رديت عليه بصوت خافت حتي لا تستيقظ زوجتي واسمع كلامتها الجميله 😁 زي هو احنا كل يوم نقوم علي صوت حد هو إحنآ علطول عايشين في الوش والصداع ده
وطبعا لازم اقعد اشرح لها ان المحامي زي دكتور النسا مش معقول هيقول للست اللي بتولد رجعي الطفل لغاية لما اجيلك او متخليهوش ينزل دلوقتي استني لما افوق واشرب القهوه وينتهي الحديث علي لاشئ
المهم رد عليا الموكل باعتذارات كتيره وانا اسف انك نايم وماشابه ذلك
فرديت عليه بخير يا حاج …..
قالي يا استاذ انا دلوقتي عايز رايك في حاجه
رديت عليه اتفضل يا حاج
قالي يا استاذ انا مش عارف اقولك ايه
قلت له طيب يا حاج اول ما تعرف قولي وانا موجود ان شاء الله
قالي اصل مراتي مدت ايدها عليا
طبعا في اللحظه دي قلت اكيد انا لسه نايم لان مش معقول الاعمار دي وبتمد ايدها علي بعض
‏بس تأكدت بعد كده من طريقة كلامه أن الموضوع طلع صح بس بردو أنا نفسي أعرف ايه اللى حصل يخلي مراته تمد ايديها عليه فسالته معلش يا حاج أنا آسف هو ايه اللى خلي الحاجه تمد ايدها عليك ‏
رد عليا وقالي خناقه زي أي خناقه
‏سالته ايه المطلوب مني وأنا اعمله رد قال لي أنا عايز اعمل محضر فيها سكت للحظات استجمع قوايا وطبعا كانت مراتى بتبصلي بنص عين وقالت لي في حاجة قلت لها لا ما مفيش حاجة وخرجت بسرعة من الاوضة قبل ما اسمع كلمات تأنيب الضمير
رديت وقلت له ساعتها هرجع واكلمك تاني
والحاج ده ماشاء الله حاجه كده زي سراج منير في عنتر ولبلب 😊 شكل وهيبه وشنب ومحترم وكلمته حكم في اي قعده
اكيد في حاجه غلط
كلمت الحاج وقلت له انا ساعه ان شاء الله وهكون في المكتب تقدر تشرفني
روحت المكتب ولقيت الحاج داخل عليا بعد ساعتين وشويه من المكالمه وهيئته وشكله مش اللي انا متعود عليه هدومه مكركبة وشه فيه خدش خفيف بصلي وقعد من غير ولا كلمة قلت له مالك يا حاج في إيه قال لي بصوت واطي
أصل أم العيال مدت إيدها عليا انا ضحكت افتكرت هزار بس هو ما ضحكش وبصلي وسكت شوية وبعدين كمل وهو بيحاول يلم كرامته والسبب سبب تافه خالص قلت له خير يا حاج
قالي كنت بكلم لامؤخذه جارتي اللي فوق لكن يمين بالله ما في حاجه بينا انا كنت بكلمها علشان كانت طالبه مني خدمه في تامينات مدينة نصر الحاجه سمعت قالت لي انا سامعاك بتهزر مع جارتنا قلت لها عيب يا حاجه هو انا وش ده قالت لي احلف الصراحه مردتش احلف قالت لي يبقي الكلام صح وانا بقالي فتره شاكه فيك زعقت فيها راحت مدت ايدها عليا وسحبت ايد المقشه وكانت عايزه تتخانق لولا اني لميت الموضوع
طبعا انا بالنسبه خناقه زي دي مع ناس في السن ده صعب اني احلها قانونا عرضت عليه ندخل ابنه الكبير رفض
عرضت عليه ندخل بنته رفض وكان اخر حاجه اني اقنعه اني اكلمها واحاول اهدي الدنيا بس هو كان عايز يعمل محضر ضرب وبعدين يطلقها

#١٥ـحكايه

27/02/2026

(اسرع قضية)
البداية كانت كلمة واحدة بس أستاذ محمد هو أنا ينفع أطلقها من غير ما تعرف
بعد مساء الخير المعتاد وصوت متردد على الطرف التاني لقيته دخل في الموضوع مباشرة كأنه شايل السؤال ده بقاله شهور ومش قادر يستحمل أكتر.
رديت بهدوء أهلاً وسهلا يا فندم اتفضل
سكت لحظة وبعدين كررها بنبرة أوضح
يعني ينفع أطلق مراتي من غير ما تعرف
السؤال في ظاهره قانوني
لكن اللي وراه كان أكبر بكتير من مجرد إجراء شرعي
قلت له طيب إيه رأيك تشرفني في المكتب علشان أفهم من حضرتك أكترما حبيتش أجاوبه في التليفون
لأن في شغلانتنا كلمة زي أطلقها من غير ما تعرف مش مجرد استفسار دي غالبا وراها وجع أو خوف أو قرار اتاخد بدري عن ميعاده
رجع بعد أسبوع نفس الكرسي نفس المكان بس ملامحه كانت أهدى
قعد وقال من غير مقدمات أنا رحت كلمتها ما سألتوش قال إيه سيبته يحكي
قال إنه قعد قدامها لأول مرة من غير صوت عالي من غير اتهامات من غير عناد قال لها إنه حاسس إنهم بقوا غرب وإنه كان بيفكر يطلقها من غير ما تعرف علشان يهرب من لحظة المواجهة
قال لي هي ما صرختش ما اتخانقتش هي بس قالت لي كنت قولي بدري يا راجل
الجملة دي كسرت فيه حاجة وسألته وصلتوا لإيه
قالي اتفقنا ان احنا نتطلق بهدوء وعايز حضرتك معايا علشان الطلاق هيبقي ودي
روحت معاه وتم الطلاق في هدوء واتعلمت ان أهم من قرار الطلاق هو الطريقة اللي بتطلق بيها نفسك من خوفك

#١٥ـحكايه

13/02/2026

الشوارع حواديت مش بس زحمة وعربيات وكلاكسات
كل شارع حافظ أسرار ناس عدت عليه وهي مكسورة وناس عدت وهي بتحلم وناس خرجت منه على المحكمة وناس خرجت منه على بيت جديد
قدام كل محكمة في شارع في حد واقف ماسك ورقته بإيد بتترعش وفي حد مستني حكم يمكن يغير عمره كله
أنا اتعلمت إن الشارع مش مكان الشارع بداية قصة وكل قضية اشتغلت فيها كان أول سطر فيها
بدأ بخطوة على رصيف
الشوارع حواديت
وأصعب الحواديت هي اللي ما بتتحكيش غير قدام القاضي

11/02/2026

من كام يوم كده كنت بنضف أرشيف القضايا اللي خلصت في آخر تلات سنين
إحساس جميل وغريب في نفس الوقت وانت بترجع بالزمن لورا ذكريات كتير بتعدي قدام عينك مع كل ملف اشتغلت فيه ومع كل قضية قريتها ومع كل حكاية سمعتها ومع كل أسرة دخلت حياتها في يوم
تحس بفخر حقيقي وانت باصص على كمية الورق اللي كتبته دعاوى عقود
مذكرات الي اخره
وتسأل نفسك باستغراب هو أنا كتبت كل ده إمتى
كل ملف في مكتب المحامي مش مجرد ورق اطلاقا
ده مشكلة حقيقية لناس بجد اسر كاملة
كان ليك دور كبير بقي او صغير إنك تساهم في حلها
من زوجة كانت في خلافات صعبة مع جوزها وقفت جنبها لحد ما خدت حقوقها كاملة هي وعيالها
لزوج كانت مراته قاسية عليه وعلى أولاده
لشخص اشترى شقة أو أسس شركة أو بدأ مشروع وانت كنت عنصر أساسي في إن كل حاجة تمشي صح قانونا ويتحفظ حقه.
للشاب اللي ساقه القدر إنه يبقى متهم واقف ورا القضبان في قضية مهدد فيها بحبس ومستقبل ضايع فكنت واقف جنبه لحد ما خرج حر طليق في الشارع
صعب قوي الملل أو الفتور يدخل حياة المحامي
لأن المحاماة كل يوم فيها حال يوم تبقى مدعي ويوم تاني تبقى مدعى عليه في نفس القاعة.
وفي يوم تقف قدام الجنايات تلتمس البراءة والرأفة وممكن في نفس اليوم
تقف قدام نفس المحكمة وتطلب أقصى عقوبة لو انت محامي المجني عليه.
يكفي المحامي فخر إن كل ملف في مكتبه حكاية ما بتتنسيش من حياة حد.
إزاي زوجة تنسى سنين الخلاف والقضايا
لحد ما خدت حقها وحق عيالها
وإزاي واحد ينسى يوم كان متهم في جناية ومستقبله كان في الهوا لولا إن براءته بانت
دي لحظات ما بتمسحش من الذاكرة وبطلها الأول والأخير المحامي حتى لو ناس كتير تنكرت له أو نسيت تعبه.
المحاماه عشق لعبة شطرنج

10/02/2026

مفهوم العدالة من وجهة نظري هي
أن تسير وفي يدك حقيبة سوداء تحمل فيها مظالم الناس رزما رزما تحفظ أسماء أصحابها عن ظهر قلب وتعرف كل إجراء انت قمت بيه وكم المظلومين اللي كنت السبب في انصافهم وانك رجعت حقوقهم
ولما روحك تطلع إلى السماء تنادي المغسلين فزعا وتقولهم اوعوا تبلوا أوراق الحقيبة فتتلف فأنا بحاجة لمراجعتها قبل الامتحان
العدالة أن لا يعلو صوت فوق صوت القضاء وأن يكون لديوان المظالم قصر امن يتفقده المحامي والقاضي قبل أن يتخذ قرارات جديدة لا يُظلم فيه احد فالعدالة منهج حياة إذا سكنت فيك أضاءت لك الحياه

#محامٍ_وأفتخر

07/02/2026

في يناير ٢٠٢٠ الشهر اللي لسه محفور في ذاكرتي لأنه كان سابق الكورونا بشهر تقريبا رن تليفوني.
صوت على الخط مش صوت بنت لا صوت سيدة ومن أول كلمة حسيت إن الصوت ده لامرأة مسنة.
قالت بهدوء كامل:
السلام عليكم ورحمة الله وبركاته رديت السلام فقالت لي ممكن أجي لحضرتك النهارده
سألتها مين معايا قالت لي لما أجيلك ها تعرف وانا الصراحه عندي مشكله في التون ده والنغمه دي والأسلوب ده وصلت ست في حدود الخمسة والستين سنه ست الستات بحق الله قمه في الدين والاناقه والشياكه منقبة لبسها غالي شنطتها واضحة إنها غالية وآيفون في إيدها قعدت قدامي بثبات ومن غير مقدمات قالت لي أنا عايزة أتخلع
هي في العموم اسمها انا عايز اخلع ودي لما الزوجه بتبقي هي السلطه او القويه او جايبه اخرها من الراجل
الكلمة وقعت تقيلة.
خلع؟ في السن ده؟ بعد العشره دي؟
سألتها سؤالين مباشرين
حضرتك جبتي تليفوني منين؟
قالت لي من حد في شارع (…) والشارع معروف عندي في العجوزة.
قلت لها من مين ياعني
رفضت وقالت بهدوء شديد:
في حاجتين مش هقدر أجاوب عليهم سبب الطلاق ورقم تليفون حضرتك
قلت لها نصا يا هانم مش فارق معايا جبتي تليفوني منين ماهو موجود علي اليافطه او علي جوجل إنما يهمني أعرف سبب الطلاق ؟
(أنا بطبعي مش بقبل أي قضية خلع الخلع عندي دايما عليه علامات استفهام حرية حب جديد نزوة متأخرة كلها أسباب مش بقتنع بيها)
سكتت شوية وبعدين قالت لي اعتبرني زهقت من العيشة معاه قلت لها حضرتك في الدين تبقي اسمها وتكفرن العشير ردت عليا وقالت لي نقول بخله اهانته ليا في أوقات كتير كده تمام اقدر اتخلع منه ولا حضرتك عندك اساله تانيه.
قلت لها من فضلك بقالك كام سنه متجوزاه ردت عليا بسؤال عنيف عدد السنين الفعليه ولا المعنويه
لو السنين الفعليه بقالي معاه ٤٧ سنه لو بتتكلم عن الوقت اللي حسيت اني متجوزه يبقوا ٩ سنين
فهمت قصدها وفهمت انها شايله كتير حاولت اقنعها بالطلاق للضرر لقيتها بتقولي انها مش هتقدر تقعد كل المده دي علشان تتطلق
انتهزت الفرصه وسالتها الولاد عارفين قالت لي لسه همهد ليهم
بلغتها بالمطلوب والاتعاب والتوكيل والغريبه انها متاخرتش في أي حاجه من دول (عادة الموكل بيتاخر في الاتعاب 😊)
القضية اترفعت فعلا قبل الكورونا بشهر واحد وبسبب الظروف والجلسات والتأجيلات اتأجلت كتير ملف واقف وزمن بيعدي وحياة بتتاكل على مهل.
وفي النهايه خلعتها.
عدت سنة تقريبا وهي الصراحه كانت كل مناسبه تبعت تهنئ علي حسب المناسبه وفاكر اخر يوم كانت بتستلم الورق من المكتب جاتلي بشنطه فيها كرافته محترمه ومحفظة جلد غاليه مكتوب عليها صنع في أمريكا
وقالت لي الهديه دي بسيطه جدا لحضرتك ومش قيمتك ويارب تعجبك علشان لما حضرتك تلبس الكرافت او تشيل المحفظة تبقي تفتكر الست دي ومشيت ومفهمتش قصدها ايه لانها كانت دايما كلامها فيه غموض ودايما كانت بتوصل رساله.
وفي يوم وأنا بقلب في الفيسبوك لقيت واحد صاحبي كاتب بوست نعي:
توفيت إلى رحمة الله والدتي السيدة (........) كنت ساعتها واقف في المطبخ بعمل فنجان قهوه
الاسم ضربني
وقفت قدام الشاشة
هو هو الاسم
ساعتها عرفت
عرفت إن الست اللي خلعتها كانت والدته وإنها اخدت تليفوني من علي اليافطه مش من حد ولا حاجه وان هي مردتش تقول أسباب الطلاق علشان محدش يعرف حاجه واحنا في الخلع مش بنهتم باسم الأولاد لانها قضيه لا تخص أي من الأطراف سوي الزوج والزوجه
ماتت ومعرفتش الحقيقة كاملة روحت العزاء وانا في قمة حزني
قعدت وقتها ساكت ولأول مرة في حياتي المهنية حسيت بندم صريح مش ندم قانوني لا ندم إنساني.
ندمت إني كنت الأداة اللي قطعت آخر خيط في حياة ست كان ممكك تستحمل أو كان يمكن تمشي من الدنيا وهي في عصمة راجلها
ومن ساعتها اتعلمت إن في قضايا القانون يكسبها لكن الضمير يدفع تمنها العمر كله
#الحكايةـالسابعه
#١٥ـحكايه

18/01/2026

مش كل اللي بيقعد قدامك مظلوم ومش كل قصة هادية نهايتها بريئة

15/01/2026

القانون مش دايما عادل بس عمره ما كان أعمى

04/01/2026

في يوم زحمه وتليفونات واعصابي مشدوده كان عندي قضيه من القضايا الغلسه خارج من المكتب وعايز افصل
والفصلان عندي نوعين يا اما هقفل باب المكتب واشرب كوباية قهوه بعد ما اشغل التليفون علي do not disturb (عدم الازعاج)
او هروح اشرب espresso (اسبريسو) في اي مكان وانا مروح البيت وبرضه هشغل الموبايل علي عدم الازعاج
والصراحه احسن حد كان بيعملها on the run (قبل ما اقاطع)
واليوم ده قلت اخد بعضي واركب عربيتي واروح اعدي عليهم عند داندي مول
الصحراوي ركنت العربيه في الباركينج وكنت بحب المول ده اوي في راحه كده ومحندق وجميل ركنت تحت وطلعت اتمشيت فيه شويه و قلت انزل اخد العربيه اطلع اركنها في محطة البنزين وافتكرت ان اللفه هتبقي طويله علشان اطلع والف من فوق فقلت خلاص اسيبها واخرج من باب فرع شركة اتصالات اتمشي لغاية هناك
وفعلا خرجت ودخلت شربت الاسبرسو وقعدت شويه ونزلت علي الباركينج علشان اخد العربيه ويادوب وصلت واتحركت ١٠٠ متر ولقيت ام ايوه ام كده زي الامهات اللي نعرفها الجميله دي طيبه وبشوشه وماشيه واحده واحده وبتعيط
واول مره اقف لحد سالتها اقدر اساعد حضرتك في حاجه بصتلي وقعدت تعيط عياط انا كنت فاكر شكلها كانت حزينه اوي
قالت لي لا يا ابني متشكره
اصريت اني اعرف مالها وكان يستحيل اسيبها وفاكر اني قلت لها اني في مقام ابنها ممكن تركبي معايا وانا هوصل حضرتك قالتلي ابني ربنا يسامحه ويهديه
ركبت معايا وقعدت تحكي
ابنها علشان يرضي مراته طردها من البيت لانها كانت قاعده معاه علشان ملهاش مكان بعد لما ابوه مات والمالك اخد الشقه راحت قعدت معاه وعلشان البيه من اشباه الرجال اتخانق معاها بعد لما نزلوا مع بعض هو ومراته وهي في المول وسابها وقال لها مترجعيش معايا
طبعا انا دمي غلي
قلت لها اديني تليفونه وانا هتصرف كلمته وقلت له ان مامتك تعبانه وفي المول قالي الف سلامه وقفل السكه في وشي
هي كلمت اختها وقالت لها انها اتخانقت مع ابنها فقالت لها هتبعت ابنها ياخدها استنيت معاها واخدت رقم تليفونها علشان اتابع معاها واطمن عليها
فضلت واقف معاها في الباركينج ماسكه شنطتها بإيد والتانية ماسكة الموبايل يمكن اشباه الرجال يكلمها
قعدت تبص حواليها وتقول لي
أنا ما طلبتش منه حاجة أنا بس كنت عايزة أعيش معاه ما هو انا مليش حد غيره واختي
لقيت نفسي ساكت ومش عارف اتكلم وأول مرة أحس إن السكوت أحيانًا أرحم من أي كلام بعد شوية عربية وقفت نزل شاب شكله محترم ابن أختها أول ما شافها جري عليها حضنها وهي ساعتها بس انهارت النوع ده من الانهيار اللي بييجي لما تحس إنك أخيرا مش لوحدك قبل ما تمشي بصتلي وقالت لي ربنا يجعله في ميزان حسناتك يا ابني رجعت لعربيتي قفلت الباب قعدت دقيقة كاملة ببص قدامي وبفكر إزاي كده إزاي حد يختار رضا حد على حساب اللي ربته وصلت البيت والإسبريسو ما كانش عمل حاجة والـ Do Not Disturb ما فصلنيش
اللي حصل معاها اسمه في ميزان القانون إساءة استعمال حق وجحود وترك دون عائل الابن اللي رمى أمه في الشارع علشان يرضي زوجته ما ارتكبش خلاف أسري ده ارتكب خطأ جسيم ولو الأم دي كانت قررت تمشي في الطريق القانوني القانون كان هيقف في صفها مش شفقة لا ده هيبقي التزام دعوى نفقة أقارب بلاغ ترك دون عائل ومسؤولية مدنية كاملة عن أي ضرر مادي أو نفسي ليها
المهم انا قعدت شويه بكلمها في التليفون كل شهر اطمن عليها
لغاية لما غبت عليها شهرين رجعت كلمتها رد عليا ابن اختها وقال لي انها ماتت 💔
حمدت الله علي نهايتها لانها اخيرا لقت مكان آمن هتنام فيه

حكمت المحكمه

13/05/2026

19/04/2026

27/02/2026

13/02/2026

11/02/2026

10/02/2026

07/02/2026

18/01/2026

15/01/2026

04/01/2026

Address

Telephone

Website

Alerts

Contact The Business

Shortcuts

Share